மாணவர் முரசு
இ-பேப்பர்
இந்தியாவில் முதன்முறையாகக் கண்டறியப்பட்ட பி1617 உருமாறிய கொரோனா
இந்தியாவில் முதன்முறையாகக் கண்டறியப்பட்ட உருமாறிய கொரோனா கிருமி இப்போது அதிகாரபூர்வமாக 53 நாடுகளில் அல்லது பகுதிகளில் பதிவாகி இருப்பதாக உலக சுகாதார நிறுவனம் நேற்று வெளியிட்ட அறிக்கை தெரிவிக்கிறது.
'பி1617' எனக் குறிப்பிடப்படும் அந்த உருமாறிய கொரோனா கிருமி மேலும் எட்டுப் பகுதிகளில் காணப்படுவதாக அதிகாரபூர்வமற்ற தகவல்கள் உலக நிறுவனத்திற்குக் கிடைத்துள்ளன.
அந்த உருமாறிய கிருமி, மேலும் சற்று உருமாறியதை அடுத்து, பி16171, பி16172, பி16173 என மூன்று வகைகளாக அடையாளப்படுத்தப்பட்டுள்ளது.
அவற்றில், முதல் வகை 41 நாடுகளிலும் இரண்டாம் வகை 54 நாடுகளிலும் மூன்றாம் வகை ஆறு நாடுகளிலும் கண்டறியப்பட்டுள்ளன.
நிறுவனத்தின் வாராந்திர நோய்த்தொற்றியல் தகவல் அறிக்கையில் இந்தப் புள்ளிவிவரங்கள் இடம்பெற்றுள்ளன.
பி1617 உருமாறிய கிருமி அதிகமாகப் பரவும் தன்மை கொண்டது எனக் குறிப்பிட்டுள்ள அந்த அறிக்கை, அதனால் ஏற்படும் நோயின் தீவிரத்தன்மை, நோய் தொற்றும் அபாயம் ஆகியவை குறித்து ஆராய்ந்து வருவதாகக் கூறியிருக்கிறது.
உலகளவில் கடந்த ஒரு வாரமாக, புதிய கொரோனா பாதிப்புகளும் உயிரிழப்புகளும் தொடர்ந்து குறைந்து வந்துள்ளன. அக்காலகட்டத்தில், புதிதாக 4.1 மில்லியன் பேர் கிருமித்தொற்றால் பாதிக்கப்பட்டனர்; 84,000 பேர் இறந்துவிட்டனர். முந்திய வாரத்தை ஒப்புநோக்க, முறையே இவை 14 விழுக்காடும் இரண்டு விழுக்காடும் குறைவு.
கடந்த ஏழு நாள்களில், ஐரோப்பாவில் புதிய கொரோனா பாதிப்புகளும் மரணங்களும் பெரிதும் குறைந்துள்ளன. அதனைத் தொடர்ந்து, தென்கிழக்காசியாவில் குறைவாகப் பதிவாகியுள்ளது.
தென், வடஅமெரிக்கா, கிழக்கு மத்தியத் தரைக்கடல் பகுதி, ஆப்பிரிக்கா, மேற்கு பசிபிக் ஆகிய வட்டாரங்களில் புதிய பாதிப்புகளின் எண்ணிக்கை, முந்திய வாரத்தில் பதிவான அளவை ஒத்திருந்தது.
"உலகளவில் கடந்த நான்கு வாரங்களாக கொரோனா தாக்கம் குறைந்து வந்துள்ளபோதும், இன்னும் கிருமி தொற்றுவதும் அதனால் இறப்பதும் அதிகமாகவே இருக்கிறது. உலகம் முழுவதும் பல நாடுகளிலும் புதிய பாதிப்பு குறிப்பிடத்தக்க அளவு அதிகரித்துள்ளது," என்று அந்த அறிக்கை கூறுகிறது.
கடந்த ஏழு நாள்களில் ஆக அதிகமாக இந்தியாவில் 1,846,055 பேர் புதிதாக தொற்றால் பாதிக்கப்பட்டனர். இது, அதற்கு முந்திய வாரத்தைக் காட்டிலும் 23% குறைவு. பிரேசில் (451,424), அர்ஜெண்டினா (213,046), அமெரிக்கா (188,410), கொலம்பியா (107,590) ஆகிய நாடுகள் அடுத்த இடங்களைப் பிடித்தன.