மாணவர் முரசு
இ-பேப்பர்
உள்ளூரில் இன்று (ஆகஸ்ட் 24) பிற்பகல் நிலவரப்படி புதிதாக 111 பேருக்கு கொவிட்-19 கிருமித்தொற்று உறுதி செய்யப்பட்டுள்ளதாக சுகாதார அமைச்சு தெரிவித்துள்ளது.
அவர்களில் 33 பேருக்கு எப்படி கிருமி தொற்றியது என்பது இன்னும் கண்டறியப்படவில்லை.
எஞ்சிய 78 பேர், முன்னதாக கிருமி தொற்றியவர்களுடன் தொடர்புடையவர்கள்.
அவர்களில் 24 பேர், உட்லண்ட்சில் உள்ள நார்த் கோஸ்ட் லாட்ஜ் வெளிநாட்டு ஊழியர் தங்குவிடுதியுடன் தொடர்புடையவர்கள்.
முன்னதாக கிருமி தொற்றியவர்களுடன் தொடர்பில் இருந்த 30 பேருக்குக் கண்காணிப்புப் பரிசோதனை மூலம் தொற்று கண்டறியப்பட்டது.
24 பேருக்குத் தொற்று உறுதியானபோது அவர்கள் ஏற்கெனவே தனிமை உத்தரவின்கீழ் வைக்கப்பட்டுவிட்டனர்.
நார்த் கோஸ்ட் லாட்ஜ் விடுதியில் கொவிட்-19 பரிசோதனை நடவடிக்கை நிறைவுபெற்றுள்ளது. 12 பேரின் பரிசோதனை முடிவுகள் இன்னும் வெளிவரவில்லை. கடந்த மூன்று நாட்களாக அங்கு வசிக்கும் மொத்தம் 5,300க்கும் மேற்பட்டோரிடம் கொவிட்-19 பரிசோதனை மேற்கொள்ளப்பட்டது.
உள்ளூரில் கிருமி தொற்றியவர்களில் நால்வர் தடுப்பூசி போட்டுக்கொள்ளாத அல்லது ஒருமுறை மட்டும் தடுப்பூசி போட்டுக்கொண்ட 70 வயதுக்கு மேற்பட்ட மூத்தோர். அவர்களுக்குக் கடுமையான நோய்த்தொற்று பாதிப்பு ஏற்படும் அபாயம் நிலவுகிறது.
இந்நிலையில், வெளிநாடுகளிலிருந்து சிங்கப்பூருக்கு வந்த ஐந்து பேருக்குத் தொற்று உறுதி செய்யப்பட்டுள்ளது. அவர்கள் இங்கு வந்தவுடன் வீட்டில் இருக்கும் கட்டாய உத்தரவு பிறப்பிக்கப்பட்டதாக சுகாதார அமைச்சு தெரிவித்துள்ளது.
சிங்கப்பூர் வந்திறங்கியபோது அவர்களில் நால்வருக்குத் தொற்று கண்டறியப்பட்டது. இங்கு வந்த பிறகு தங்குமிடத்தில் இருக்கும் கட்டாய உத்தரவை நிறைவேற்றி வந்தபோது எஞ்சிய ஒருவருக்கு தொற்று கண்டறியப்பட்டது.
சிங்கப்பூரில் கிருமித்தொற்றால் பாதிக்கப்பட்டோர் மொத்த எண்ணிக்கை 66,687ஆக உள்ளது.
