மாணவர் முரசு
இ-பேப்பர்
செப்டம்பர் 27 முதல் அக்டோபர் 6 வரை அனைத்து தொடக்கப்பள்ளிகளும் தொடக்கநிலை 1 முதல் 5 வரை பயிலும் மாணவர்களுக்கு வீட்டிலிருந்து கற்கும் நடைமுறையைக் கடைப்பிடிக்கும்.
உள்ளூர் அளவில் கொவிட்-19 தொற்று வேகமாக அதிகரித்து வரும் வேளையில், கல்வி அமைச்சு சனிக்கிழமை (செப்டம்பர் 18) இந்த அறிவிப்பை வெளியிட்டது.
தேசிய பாடத்திட்டத்தை வழங்கும் சிறப்புக் கல்விப் பள்ளிகளுக்கும் இந்த நடைமுறை பொருந்தும் என்று அமைச்சு தெரிவித்தது.
“கொவிட்-19 தடுப்பூசிக்கு இன்னும் தகுதிபெறாத மாணவர்களை இந்த ஏற்பாடு நன்கு பாதுகாக்கும்,” என்று அமைச்சு குறிப்பிட்டது.
இவ்வாண்டு தொடக்கப்பள்ளி இறுதியாண்டுத் தேர்வு (பிஎஸ்எல்இ) செப்டம்பர் 30ஆம் தேதி தொடங்கி அக்டோபர் 6ஆம் தேதி முடிவடைகிறது. தேர்வு தொடங்குவதற்கு முன்பு செப்டம்பர் 25 முதல் 29 வரை தொடக்கநிலை 6 மாணவர்கள் விடுப்பில் (study break) செல்வார்கள்
பள்ளிகளில் கிருமி பரவும் அபாயத்தைக் குறைக்கவும் தனிமை உத்தரவு அல்லது கட்டாய விடுப்பில் வைக்கப்படும் மாணவர்களின் எண்ணிக்கையைக் குறைக்கவும் வீட்டிலிருந்து கற்கும் நடைமுறை உதவும் என்று அமைச்சு விவரித்தது.
இந்த நடைமுறை நடப்பில் இருக்கும் காலத்தில் கூடுதல் ஆதரவு தேவைப்படும் மாணவர்களுக்குப் பள்ளிகள் தொடர்ந்து திறந்திருக்கும். பெற்றோரால் வீட்டிலிருந்து வேலை செய்ய முடியவில்லை அல்லது மாற்று பராமரிப்பு ஏற்பாடுகளைச் செய்ய முடியவில்லை என்றால் அவர்கள் உதவிக் கோரி பள்ளிகளை அணுகலாம்.
கல்வி அமைச்சின் பாலர் பள்ளிகள், மாணவர் பராமரிப்பு நிலையங்கள் ஆகியவை வழக்கம்போல இயங்கும்.
வீட்டிலிருந்து கற்கும் நடைமுறை நடப்பில் இருக்கும் காலத்தில் ஆன்டிஜன் விரைவுப் பரிசோதனை செய்துகொள்ளுமாறு மாணவர்கள் கேட்டுக்கொள்ளப்படுகின்றனர்.
