மாணவர் முரசு
இ-பேப்பர்
மலேசியாவின் பினாங்கில் உள்ள குடிநுழைவு தடுப்புக்காவல் நிலையம் ஒன்றில் இருந்த மியன்மாரைச் சேர்ந்த 500க்கும் மேற்பட்ட ரோஹிங்கியா கைதிகள் நேற்று தப்பி ஓடிவிட்டனர்.
அந்தச் சம்பவத்தில் ஆறு பேர் மரணமடைந்துவிட்டனர்.
ரோஹிங்கியா கைதிகள் 528 பேர், பினாங்கு-கெடா மாநில எல்லையில் இரு பக்கமும் அமைந்துள்ள அந்த நிலையத்தில் இருந்து நேற்று அதிகாலை 4.30 மணிக்குத் தப்பி ஓடியதாக குடிநுழைவுத் துறை தெரிவித்தது.
அந்தச் சம்பவத்துக்கான காரணம் பற்றி புலன் விசாரணை நடந்துவருவதாகவும் அது கூறியது. அதேவேளையில், கைதிகள் தப்பி ஓடிய சம்பவத்துக்கு ஓர் ஆர்ப்பாட்டம் காரணம் என்றும் அந்த ஆர்ப்பாட்டம் திடீரென்று கலவரமாக மாறியதாகவும் 'தி ஸ்டார்' தெரிவித்தது.
அச்சம்பவத்தின் போது அந்த நிலையத்தின் முக்கிய வாயில் கதவை கைதிகள் உடைத்து விட்டனர். கம்பித் தடுப்புகளையும் பெயர்த்துத் தள்ளினர் என்று குடிநுழைவு தலைமை இயக்குநர் கைருல் சாய்மி தாவூத் கூறினார்.
இதனிடையே, தப்பி ஓடியவர்களில் 391 பேரை அதிகாரிகள் மீண்டும் கைது செய்துவிட்டதாகவும் அவர்களில் குறைந்தபட்சம் ஆறு பேர் மாண்டுவிட்டதாகவும் கெடா மாநில காவல்துறை ஆணையர் வான் ஹசான் அகம்மது நேற்று கூறினார்.
தப்பிவிட்ட 131 பேரைக் பிடிக்க வேட்டை தொடங்கி இருக்கிறது. இதற்காக இந்த இரண்டு மாநிலங்களிலும் 13 இடங்களில் சாலைத் தடுப்புகள் அமைக்கப்பட்டுள்ளன என்று காவல்துறை குறிப்பிட்டது.
அந்த நிலையத்தில் இருந்து 8 கி.மீ. தொலைவில் பினாங்கில் உள்ள ஜாவி என்ற நகரில் அதிக வாகனங்கள் செல்லும் சாலையில் குறுக்கே புகுந்து ஓடியபோது அந்த ஆறு பேரும் வாகனங்களில் அடிபட்டு பலியாகிவிட்டதாக ஆணையர் வான் ஹசான் தெரி வித்தார்.
மாண்டவர்களில் ஒரு பையன், ஒரு சிறுமி உள்ளிட்ட இருவரும் அடங்குவர். சம்பவம் நிகழ்ந்த போது நிலையத்தில் 137 சிறார்கள் உட்பட மொத்தம் 664 பேர் இருந்ததாகத் தெரிவிக்கப்பட்டது.
மியன்மாரில் நடந்த மூர்க்க மான இன வன்செயல்களிலிருந்து தப்பிக்க ரோஹிங்கியா அகதிகள் பல நாடுகளுக்கும் சட்டவிரோதமாக தப்பி ஓடீனர்.
அவர்களில் பலரும் லங்காவி வழியாக மலேசியாவுக்குள் நுழைந்தனர். அகதிகளை அங்கீகரிக்காத மலேசியா, ரோஹிங்கியா அகதிகளைச் சட்டவிரோத குடியேறிகளாகக் கருதுகிறது.