மாணவர் முரசு
இ-பேப்பர்
அனைத்துலக விமானப் போக்குவரத்து படுவேகமாக சூடுபிடிக்கத் தொடங்கி உள்ளது.
அதனால் ஏற்படக்கூடிய முழு அனுகூலத்தையும் பயன்படுத்திக்கொள்ளும் வகையில் சாங்கி விமான நிலையம் ஆக அதிக எண்ணிக்கையில் ஊழியர்களை வேலையில் சேர்க்க முயற்சிகளை முடுக்கிவிட்டு உள்ளது.
6,600க்கும் மேற்பட்ட ஊழியர்களை வேலையில் சேர்க்கும் நடவடிக்கையை விமான நிலையம் தொடங்கி இருக்கிறது.
சன்டெக் சிங்கப்பூர் மாநாடு மற்றும் கண்காட்சி மையத்தில் நாளை வெள்ளி, சனிக்கிழமைகளில் விமானப் போக்குவரத்துத் தொழில்துறை சந்தை நடக்கிறது.
அந்தச் சந்தையில் நேரடியாக பலரும் வேலையில் சேர்க்கப்படுவார்கள் என்று சாங்கி விமான நிலையக் குழுமம் தனது இணையத்தளத்தில் தெரிவித்தது.
அந்தச் சந்தையில் 20க்கும் மேற்பட்ட நிறுவனங்கள் நேரடி நேர்காணல்களை நடத்தி ஊழியர்களைச் சேர்க்கும். முன்களப் பயணிகள் சேவை வேலைகளுக்கு ஊழியர்களைச் சேர்ப்பதில் ஒருமித்த கவனம் செலுத்தப்படும்.
அதேபோன்று புத்தாக்கம், தொழில்நுட்பத்தில் புதிதாக உருவாக்கப்பட்டு உள்ள வேலைகளுக்கும் ஊழியர்கள் சேர்க்கப்படுவார்கள். விமான நிலையத்தில் பல்வேறு வேலைகளையும் பார்ப்பவர்கள், தர உத்தரவாதக் குழுப் பணியாளர்கள் ஆகியோருக்கும் தேவை இருக்கும்.
விமான நிலைய அவசரகாலச் சேவை, இணையப் பாதுகாப்பு அதிகாரிகள் ஆகியோரும் புதிதாக வேலையில் சேர்க்கப்படுவர்.
இப்போதைய போக்குவரத்துத் துறையின் வளர்ச்சியை அடிப்படையாக வைத்துப் பார்க்கையில், சாங்கி விமான நிலையம், கொவிட்-19க்கு முன்பு இருந்த பயணிகள் அளவில் பாதிக்கும் மேற்பட்ட அளவை இந்த ஆண்டு கையாளும் என்று எதிர்பார்க்கப்படுவதாக குழுமம் தெரிவித்தது.
சாங்கி விமான நிலையத்துக்குச் சுறுசுறுப்பு திரும்புகிறது. அதிக விமானங்கள், பயணிகள் வருவார்கள், போவார்கள். அதனால் விமான நிலைய ஊழியர்கள் அதிகம் தேவை என்பதை அது சுட்டியது.
கொவிட்-19 தொற்று காலத்தில் கிட்டத்தட்ட மூன்றில் ஒரு பங்கு ஊழியர்களை விமானப் போக்குவரத்துத் தொழில்துறை இழந்துவிட்டது. விமானப் போக்குவரத்துத் துறை அடுத்த ஆண்டில் கொவிட்-19க்கு முன்பு இருந்த நிலையை எட்டிவிடும் என்று அனைத்துலக விமானப் போக்குவரத்துச் சங்கம் கணிக்கிறது.
விமான நிலையக் குழுமம் 6,600 பேரை சேர்த்தாலும்கூட 2019ல் இருந்த ஊழியர்களின் அளவை எட்ட இன்னும் மேலும் பலரையும் சேர்க்க வேண்டி இருக்கும்.
போட்டித்திறன்மிக்க சம்பளம், நல்ல ஊக்குவிப்புகள், சிறந்த வாழ்க்கைத்தொழில் வாய்ப்புகளை வழங்குவதாக நிறுவனங்கள் அறிவித்து உள்ளன.