மாணவர் முரசு
இ-பேப்பர்
தங்குமிடச் செலவு, தனியார் போக்குவரத்து செலவைத் தவிர்த்த சிங்கப்பூரின் மூலாதாரப் பணவீக்கம், கடந்த ஏப்ரலில் தொடர்ந்து உச்சம் தொட்டது. மின்சாரம், எரிவாயு, உணவு, சில்லறை விற்பனை பொருள்கள் ஆகியவற்றின் விலையேற்றமே இதற்குக் காரணம்.
மூலாதாரப் பணவீக்கம் ஆண்டு அடிப்படையில் கடந்த ஏப்ரல் மாதம் 3.3 விழுக்காடு ஏற்றம் கண்டது. கடந்த மார்ச் மாதம், பணவீக்கம் 10 ஆண்டுகளில் காணப்படாத அளவாக 2.9 விழுக்காடு உயர்ந்திருந்தது.
வரும் மாதங்களில் மூலாதாரப் பணவீக்கம் மேலும் உயரும் என முன்னுரைக்கப்படுவதாக சிங்கப்பூர் நாணய ஆணையமும் வர்த்தக, தொழில் அமைச்சும் நேற்று தெரிவித்தன. பின்னர் ஆண்டிறுதியில் அது மிதமடையும் என எதிர்பார்க்கப்படுகிறது.
என்றாலும், புவிசார் அரசியல் மற்றும் கொவிட்-19 பெருந்தொற்று காரணங்களால் பணவீக்கம் ஏற்றமாக இருக்கும் சூழல் நிலவி வருகிறது.
ஏப்ரலில் ஒட்டுமொத்த பணவீக்கம் ஆண்டு அடிப்படையில் 5.4 விழுக்காடாகப் பதிவானது. மார்ச் மாத விகிதத்துக்கும் இதற்கும் இடையில் மாற்றம் எதுவுமில்லை.
தனியார் போக்குவரத்துத் துறையில் பணவீக்கம் ஆண்டு அடிப்படையில் கடந்த ஏப்ரல் மாதம் 18.3 விழுக்காடாக இருந்தது. மார்ச் மாதம் அது 21.5 விழுக்காடாக இருந்தது.
ஆனால், மின்சார, எரிவாயு விலைகள் ஆண்டு அடிப்படையில் ஏப்ரலில் 19.7 விழுக்காடு உயர்ந்தன. மார்ச் மாதம் அந்த ஏற்றம் 17.8 விழுக்காடாக இருந்தது.
உணவுப் பொருள்கள் விலை உயர்வும் அதிகரித்து வந்தது. ஆண்டு அடிப்படையில் ஏப்ரலில் உணவு விலைகள் 4.1 விழுக்காடு அதிகரித்தன. தங்குமிட பணவீக்கம் 3.9 விழுக்காடாகப் பதிவானது.
உக்ரேன்-ரஷ்யா போர், வட்டார பெருந்தொற்று நிலவரம் காரணமாக விநியோகச் சங்கிலிக்கு ஏற்பட்டுள்ள பாதிப்பால் சிங்கப்பூருக்கு வெளியிலிருந்து வரும் பணவீக்க நெருக்குதல் தொடர்ந்து வலுவாக இருக்கும் என சிங்கப்பூர் நாணய ஆணையமும் வர்த்தக, தொழில் அமைச்சும் எச்சரித்தன.
குறுகிய காலத்தில், புவிசார் அரசியல் நிலவரத்தாலும் இறுக்கமான விநியோக சூழலாலும் கச்சா எண்ணெய் விலைகள் ஏற்றமாக இருக்கும். மேலும், உணவு போன்ற இதர பொருள்களின் விலைகளும் தொடர்ந்து அதிகமாக இருக்கும் என எதிர்பார்க்கப்படுகிறது.
ஆண்டு முழுமைக்குமான பயனீட்டாளர் விலை உயர்வு 4.5 விழுக்காட்டிற்கும் 5.5 விழுக்காட்டிற்கும் இடைப்பட்டு இருக்கும் என முன்னுரைக்கப்படுகிறது.
மூலாதாரப் பணவீக்கம் 2.5 விழுக்காட்டிற்கும் 3.5 விழுக்காட்டிற்கும் இடைப்பட்டு இருக்கும் என முன்னுரைக்கப்படுகிறது.