ரிங்கிட் மதிப்புக்கு நிகரான சிங்கப்பூர் வெள்ளி புதிய உச்சத்தைத் தொட்டுள்ளது. நேற்றைய நிலவரப்படி ஒரு சிங்கப்பூர் வெள்ளிக்கு நிகரான ரிங்கிட்டின் மதிப்பு 3.19ஆக இருந்தது.
இதனால் சிங்கப்பூரில் மலேசிய ரிங்கிட் நாணயத்தைப் பெறுவதில் சிலர் ஆர்வம் கொண்டுள்ளனர்.
ரிங்கிட்டின் மதிப்பு சரிவடைந்துவரும் நிலையில் வெளிநாட்டு நாணய மாற்றுநர்கள் அதிக எண்ணிக்கையில் வாடிக்கையாளர்கள் மலேசிய ரிங்கிட்டை வாங்க வருவதாகக் கூறினர்.
"ரிங்கிட்டின் மதிப்பு குறைந்திருப்பதால் பல சிங்கப்பூரர்கள் அதிக அளவிலான பணத்தொகையை ரிங்கிட்டாக மாற்றுகின்றனர் என்றார் சங்கம் எக்ஸ்சேஞ்ச் நாணய மாற்று நிறுவனத்தின் இஸ்மத் ரியாஸ், 34.
"மலேசிய ரிங்கிட்டின் மதிப்பு குறைந்திருப்பதால் சிங்கப்பூர் வெள்ளியை மாற்றும்போது முன்பிருந்ததைவிட கூடுதலான மலேசிய ரிங்கிட்டை பெறுகிறார்கள். அதே நேரத்தில் ரிங்கிட்டை சிங்கப்பூர் வெள்ளியாக மாற்றம்போது இவ்வளவுதானா என்று கேட்கிறார்கள்," என்றார் அவர்.
சென்ற மாதம் சிங்கப்பூரில் பல நாணய மாற்றுக் கடைகளில் ரிங்கிட் தீர்ந்துபோனது.
"இந்த வாரயிறுதியில் குடும்பத்தினருடன் ஜோகூர் செல்லத் திட்டமிட்டுள்ளோம். $1,000க்கு ரிங்கிட் மாற்றினேன். 3,170 ரிங்கிட் கிடைத்தது. இந்த அளவிற்கு ரிங்கிட் கிடைத்ததேயில்லை," என்றார் திருவாட்டி ஆனந்தலதா, 56.
இணையத்தில் ஒரு வெள்ளிக்கான ரிங்கிட் விலை 3.19 என்று குறிப்பிடப்பட்டிருந்தாலும் அந்த விலை வங்கி பரிமாற்றத்திற்கானது என்றும் ரொக்கத்தை நாணய மாற்றுநர்களிடம் பெறும்போது அதற்கான விலை சற்று மாறுபட்டிருக்கும் என்றும் மற்றொரு நாணய மாற்றுநர் முஹம்மது யாசிர், 31, விளக்கமளித்தார்.
சிங்கப்பூரில் பணிபுரியும் மலேசிய ஊழியர்களுக்கு ஒரு பக்கம் நாணய பரிவர்த்தனை மூலம் அதிக ரிங்கிட் பெறுவதில் மகிழ்ச்சி என்றாலும் இதனால் மலேசியாவில் விலைவாசி ஏற்றம் ஏற்படுமோ என்ற கவலையில் உள்ளனர்.
"சம்பளத்தை ரிங்கிட்டாக மாற்றும்போது மகிழ்ச்சியாக உள்ளது. ஆனால் ரிங்கிட் மதிப்பு குறைந்துகொண்டே போனால் மலேசியாவில் விலைகூடிக்கொண்டே போனாலும் போகும். ஏற்கெனவே விலையேற்றம் பாதித்துவருகிறது," என்றார் கடந்த எட்டு ஆண்டுகளாக மலேசியாவின் கெடாவிலிருந்து சிங்கப்பூர் வந்து பொறியாளராகப் பணியாற்றும் ஸ்ரீ சரவணராஜன், 42.
கூடுதல் செய்தி:
ஹர்ஷிதா பாலாஜி