மாணவர் முரசு
இ-பேப்பர்
இதுவரை இல்லாத வகையில், அமெரிக்க டாலருக்கு நிகரான இந்திய ரூபாயின் மதிப்பு 80ஐத் தாண்டியது. நேற்று வணிகம் தொடங்கியதும் ஓர் அமெரிக்க டாலருக்கு 80.06 ரூபாய் என்ற அளவிற்குச் சரிந்ததை புளூம்பெர்க் தரவுகள் காட்டின.
அமெரிக்காவில் பணவீக்கம் அதிகரித்து வருகிறது. வட்டி விகிதமும் உயர்த்தப்பட்டுள்ளது. அத்துடன், உலகின் ஆகப் பெரிய பொருளியலாகத் திகழும் அமெரிக்காவில் பொருளியல் மந்தநிலை ஏற்படலாம் என்ற அச்சமும் நிலவுகிறது.
இதனால், அண்மைய வாரங்களாக முதலீட்டாளர்கள் தங்களது முதலீடுகளை டாலருக்கு மாற்றுவது அதிகரித்துள்ளது.
அமெரிக்க நாணயக் கொள்கை கடுமையாக்கப்பட்டுள்ளதால் இந்தியா உள்ளிட்ட வளரும் நாடுகளிலிருந்து முதலீடுகள் வெளியேறுவது அதிகமாகியுள்ளது.
இவ்வாண்டில் மட்டும் 30.8 பில்லியன் அமெரிக்க டாலரை (S$43 பில்லியன்) வெளிநாட்டு முதலீட்டாளர்கள் இந்தியாவிலிருந்து மீட்டுக்கொண்டுள்ளனர்.
இந்நிலையில், வெளிப்புறக் காரணங்களால்தான் இந்திய ரூபாயின் மதிப்பு தொடர்ந்து சரிந்து வருகிறது என்று இந்திய நிதியமைச்சர் நிர்மலா சீதாராமன் நேற்று முன்தினம் எழுத்து வழியாக அந்நாட்டு நாடாளுமன்றத்தில் தெரிவித்தார்.
"ரஷ்யா - உக்ரேன் போர், உயர்ந்துவரும் கச்சா எண்ணெய் விலை, இறுக்கமான அனைத்துலக நிதிச் சூழல் ஆகியவையே அமெரிக்க டாலருக்கு நிகரான இந்திய ரூபாயின் மதிப்பு வீழ்ச்சியடைய முக்கியக் காரணங்கள்," என்று திருவாட்டி நிர்மலா சுட்டினார்.
அதே நேரத்தில், பிரிட்டிஷ் பவுண்டு, ஜப்பானிய யென், யூரோ ஆகிய நாணயங்களுக்கு நிகரான இந்திய ரூபாயின் மதிப்பு வலுவடைந்து இருப்பதாக அவர் குறிப்பிட்டார்.
இந்தியாவின் வணிகப் பற்றாக்குறை, இதற்குமுன் இல்லாத வகையில், சென்ற ஜூன் மாதம் 26.18 பில்லியன் அமெரிக்க டாலராக உயர்ந்தது என்று கடந்த வாரம் வெளியிடப்பட்ட அதிகாரபூர்வத் தரவுகள் காட்டின. உயர்ந்துவரும் கச்சா எண்ணெய், நிலக்கரி விலைகளே இதற்குக் காரணம் எனச் சொல்லப்படுகிறது.
ரூபாய் மதிப்பு சரிந்து வருவதால் இறக்குமதிப் பொருள்களுக்கு அதிக கட்டணம் செலுத்த வேண்டி இருக்கும். அதனால், அப்பொருள்களின் விலை மேலும் உயரலாம். தொடர்ந்து அதிகரித்துவரும் பணவீக்கத்தால் மக்களின் வாங்கும் திறன் குறையலாம். இதனால் தேவை குறைந்து, அது நாட்டின் பொருளியலிலும் தாக்கத்தை ஏற்படுத்தக்கூடும்.
மாறாக, ரூபாய் மதிப்பு வீழ்ச்சி வெளிநாடுவாழ் இந்தியர்களுக்கு நல்ல தகவல். அவர்கள் சொந்த ஊருக்கு அனுப்பும் பணம், ரூபாய் மதிப்பில் அதிகமாக இருக்கும்.