மாணவர் முரசு
இ-பேப்பர்
இந்தோனீசியாவிலிருந்து தருவிக்கப்படும் உறைந்த கோழிகளுக்கான தேவை தொடர்ந்து அதிகளவாக நீடித்தால் பாத்தாம் தீவில் புதிய பண்ணை ஒன்று அமைக்கப்பட்டு அதன் மூலம் சிங்கப்பூருக்குப் புதிய கோழிகள் உற்பத்தியாகலாம். இது குறித்து சிங்கப்பூருக்கான இந்தோனீசியத் தூதர் சூர்யோ பிராட்டோமோ நேற்று தகவல் தெரிவித்தார்.
இந்தோனீசியாவிலிருந்து கடந்த ஞாயிற்றுக்கிழமை முதல் உறைந்த கோழிகள் கொண்டுவரப்படத் தொடங்கிவிட்டன. இவ்வாண்டு இறுதிக்குள் கிட்டத்தட்ட 1,000 டன் கோழி சிங்கப்பூரை வந்தடையும் எனத் தாம் எதிர்பார்ப்பதாக திரு சூர்யோ குறிப்பிட்டார்.
இந்தோனீசிய உற்பத்தியாளர்கள் சிலருடன் தாம் பேசியதாகவும் பாத்தாமில் ஒரு பண்ணை அமைக்க அவர்கள் திட்டமிட்டுள்ளதாகவும் அவர் சொன்னார். கோழிகளுக்கான தேவையை நிறுவனங்கள் அடுத்த ஆண்டுக்குள் அறிந்துகொண்டு அதற்கு ஏற்பப் பண்ணையின் அளவை உறுதிசெய்யலாம் என்று திட்டமிடப்பட்டிருப்பதாகவும் அவர் குறிப்பிட்டார்.
"பாத்தாமில் நாங்கள் பண்ணையை அமைத்தால், புதிய கோழிகளை சிங்கப்பூருக்குள் கொண்டுவருவதற்கு அதிகக் காலம் பிடிக்காது," என்றார் அவர்.
இதற்கிடையே, சிங்கப்பூரை வந்தடைந்த முதல் தொகுப்பு உறைந்த கோழிகள் விற்றுத் தீர்ந்துவிட்டன. கோழிச்சோறுக் கடைக்காரர்களே இந்த உறைந்த கோழிகளை வாங்கியோரில் பெரும்பான்மையினர் ஆவர். உறைந்த கோழிகளுக்கான அடுத்தடுத்த தொகுப்புகள் வரும் வாரங்களில் சிங்கப்பூரை வந்தடையும்.
லியோங் ஹப் விநியோக வளாகத்திற்கு நேற்றுக் காலை வருகை தந்திருந்த நீடித்த நிலைத்தன்மை, சுற்றுப்புற மற்றும் மனிதவள மூத்த துணை அமைச்சர் கோ போ கூன், இந்தோனீசியாவிலிருந்து தருவிக்கப்படும் உறைந்த கோழிக்கான தேவையை அரசாங்கம் கண்காணித்து வருவதாகக் கூறினார்.
தேவைக்கேற்ப கோழிகளின் உற்பத்தியும் அதிகரிக்கும் என்றார் அவர். இந்நிலையில் அமெரிக்கா, தாய்லாந்து, பிரேசில், அர்ஜெண்டினா போன்ற நாடுகளிலிருந்து தாங்கள் கொண்டுவரும் கோழிகளும் இந்தோனீசியாவிலிருந்து தாங்கள் கொண்டுவரும் உறைந்த கோழிகளும் வேறுபடுவதாக லியோங் ஹப் விநியோக நிறுவனத்தைச் சேர்ந்த திரு அல்ஃபிரட் லீக் குறிப்பிட்டார்.
இந்தோனீசியாவின் உறைந்த கோழி தலா 2-2.3 கிலோ எடை கொண்டதாகவும் மற்ற நாடுகளின் கோழி 1.5-1.6 கிலோ எடை கொண்டதாகவும் அவர் சொன்னார். அத்துடன் இந்தோனீசியாவிலிருந்து கோழிகள் சிங்கப்பூரை வந்தடைய, மூன்றே நாள்கள்தான் எடுக்கும் என்றும் மற்ற நாடுகளிலிருந்து கோழி வருவதற்கு 30 முதல் 60 நாள்களாகும் என்றும் அவர் சுட்டினார்.