மாணவர் முரசு
இ-பேப்பர்
அமெரிக்க நாடாளுமன்ற நாயகர் நேன்சி பெலோசி தலைமையிலான அமெரிக்க நாடாளுமன்றக் குழு இருநாள் வருகை மேற்கொண்டு இன்று சிங்கப்பூர் வருகிறது.
அதிபர் ஹலிமா யாக்கோப், பிரதமர் லீ சியன் லூங் ஆகியோரையும் பல அமைச்சர்களையும் அந்தக் குழு சந்திக்கும் என்று சிங்கப்பூர் வெளியுறவு அமைச்சின் பேச்சாளர் ஒருவர் நேற்று தெரிவித்தார்.
திருவாட்டி பெலோசி தலைமையில் ஆறு பேரைக் கொண்ட நாடாளுமன்றக் குழு சிங்கப்பூர், மலேசியா, தென்கொரியா, ஜப்பான் ஆகிய நாடுகளுக்கான பயணங்கள் உட்பட ஆசியப் பசிபிக் வட்டாரத்திற்குப் பயணம் மேற்கொள்வதாக அவரது அலுவலகம் அறிவித்தது.
இந்த வட்டாரத்தில் உள்ள அமெரிக்காவின் அசைக்கமுடியாத, வலுவான நட்பு நாடுகள், நண்பர்களுடன் கூடிய உறவு களைத் தன் வருகை மறுஉறுதிப்படுத்தும் என்று திருவாட்டி பெலோசி தெரிவித்தார்.
"சிங்கப்பூர், மலேசியா, தென்கொரியா, ஜப்பான் நாடுகளுக்குச் செல்லும் எங்கள் குழு, அங்கு உயர்நிலைச் சந்திப்புகளை நடத்தும்.
"அமைதி, பாதுகாப்பு, பொருளியல் வளர்ச்சி, வர்த்தகம், கொவிட்-19 தொற்று, பருவநிலை நெருக்கடி, மனித உரிமைகள், ஜனநாயக ஆளுமை ஆகியவை உள்ளிட்ட பொதுவான நலன்களையும் நன்னெறிகளையும் மேலும் எப்படி மேம்படுத்தலாம் என்பது பற்றி விவாதிக்கப்படும்," என்று திருவாட்டி பெலோசி அறிக்கை ஒன்றில் தெரிவித்தார்.
"அமெரிக்க அதிபர் பைடனின் வலுவான தலைமைத்துவத்தின்கீழ், இந்த வட்டாரத்தில் விவேகமிக்க, உத்திபூர்வ ஈடுபாட்டைக் கொண்டிருக்க அமெரிக்கா உறுதியான கடப்பாட்டைக் கொண்டுள்ளது.
"சுதந்திரமான, செழிப்புமிக்க இந்தோ-பசிபிக் வட்டாரம் அமெரிக்காவும் உலகமும் செழித்தோங்க முக்கியமானது," என்றும் அவர் குறிப்பிட்டு இருக்கிறார்.
அமெரிக்காவில் அதிபர், துணை அதிபர் இருவருக்கும் அடுத்த நிலையில் இருப்பவர் நாடாளுமன்ற நாயகர்.
அவர் தலைமையில் நாடாளுமன்றக் குழு சிங்கப்பூருக்கு வருகையளிப்பது இதுவே முதல்முறை என்று தெரிகிறது.
அமெரிக்கத் துணை அதிபர் கமலா ஹாரிஸ் 2021 ஆகஸ்ட்டில் சிங்கப்பூருக்கு வருகையளித்தார். 2022 மார்ச்சில் பிரதமர் லீ சியன் லூங் அமெரிக்காவுக்கு பயணம் மேற்கொண்டார். பிறகு 2022 மே மாதம் அமெரிக்கா சென்ற திரு லீ, ஆசியான்-அமெரிக்கா சிறப்பு உச்சநிலை கூட்டத்தில் கலந்துகொண்டார்.
அமெரிக்க அதிபர், துணை அதிபர், நாடாளுமன்ற நாயகர் இதர நாடாளுமன்ற உறுப்பினர்களை அப்போது பிரதமர் லீ சந்தித்தார்.
தம்முடைய குழுவில் அமெரிக்கா-ஆசிய பசிபிக் வலுவான பங்காளித்துவ உறவுக்கு ஆதரவான பலரும் இடம்பெற்று இருக்கிறார்கள் என்று திருவாட்டி பெலோசி தெரிவித்து இருக்கிறார். பயன்தரக்கூடிய சந்திப்புகளை நடத்த தாங்கள் விரும்புவதாக அவர் குறிப்பிட்டு இருக்கிறார்.
அமெரிக்க நாடாளுமன்ற நாயகர் தனது அறிக்கையில் தைவான் பற்றி எதையும் குறிப்பிடவில்லை. இருந்தாலும் அவர் தைவானுக்கு பயணம் மேற்கொள்ளக்கூடும் என்று ஊகச் செய்திகள் தலைதூக்கி இருக்கின்றன. இந்தச் செய்தி அமெரிக்காவுக்கும் சீனாவுக்கும் இடையில் சூட்டைக் கிளப்பிவிட்டு இருக்கிறது.
சிங்கப்பூருக்கு வரும் அமெரிக்க நாடாளுமன்றக் குழுவில் இடம்பெற்று இருப்போரில் நாடாளுமன்ற உறுப்பினர் ராஜா கிருஷ்ணமூர்த்தியும் ஒருவர்.
அவர், வேவுத்துறை தொடர்பான நாடாளுமன்ற நிரந்தரத் தேர்வுக் குழுவின் உறுப்பினர். அதோடு, மேற்பார்வை, சீர்திருத்தம் பற்றிய நாடாளுமன்றக் குழுவின் பொருளியல் பயனீட்டாளர் கொள்கை தொடர்பான துணைக் குழுவுக்குத் தலைவராகவும் திரு ராஜா இருக்கிறார்.