மாணவர் முரசு
இ-பேப்பர்
சாங்கி விமான நிலையத்தின் இரண்டாம் முனையம் ஈராண்டுக்குப் பிறகு முதல்முறையாக அடுத்த மாதம் மீண்டும் திறக்கப்படவிருக்கிறது. தென்கிழக்காசிய நகரங்களுக்குச் சேவை வழங்கும் சிங்கப்பூர் ஏர்லைன்ஸ் விமானங்கள் அனைத்தும் அதன்பிறகு இரண்டாம் முனையத்தில் இருந்தே கிளம்பும் என்று தெரிவிக்கப்பட்டுள்ளது.
முதற்கட்டமாக, மலேசியா, தாய்லாந்து ஆகியவற்றுக்குச் செல்லும் சிங்கப்பூர் ஏர்லைன்ஸ் விமானங்கள், அடுத்த மாதம் 11ஆம் தேதியன்று மூன்றாம் முனையத்திலிருந்து இரண்டாம் முனையத்தின் தெற்குப் பிரிவுக்கு மாற்றப்படும். தென்கிழக்காசியாவின் மற்ற நகரங்களுக்கான விமானச் சேவைகள் அனைத்தும் அக்டோபர் 13ஆம் தேதி இரண்டாம் முனையத்திற்கு மாற்றப்படும்.
அதைத் தொடர்ந்து, ஏர் இந்தியா, ஏர் இந்தியா எக்ஸ்பிரஸ் ஆகிய நிறுவனங்களின் விமானச் சேவைகள், அடுத்த மாதம் 18ஆம் தேதியிலிருந்து இரண்டாம் முனையத்தில் இருந்து கிளம்பும் என்று கூறப்பட்டது.
சாங்கி விமான நிலையத்தின் இரண்டாம் முனையத்தைப் பயன்படுத்தும் விமான நிறுவனங்களின் முழுப் பட்டியல் விரைவில் வெளியிடப்படும் என்று சாங்கி விமான நிலையக் குழுமம் தெரிவித்தது.
கொவிட்-19 கிருமிப்பரவலுக்கு முன்பே இரண்டாம் முனையத்தின் புதுப்பிப்புப் பணிகள் குறித்து குழுமம் அறிவித்திருந்தது. ஆண்டுக்கு ஐந்து மில்லியன் கூடுதல் பயணிகளைக் கையாளும் அளவிற்கு வசதிகளை மேம்படுத்துவது இலக்கு. அடுத்த மாதத்திலிருந்து முனையத்தின் 50 விழுக்காட்டுப் பகுதி செயல்படத் தொடங்கும் என்று குழுமம் கூறியது.
முனையத்தின் தெற்குப் பகுதியில் வந்தடையும் பயணிகள் பயணப்பெட்டிகளை மீண்டும் பெற்றுக்கொள்வதற்கான நடைமுறைகள், கடந்த மே மாத இறுதியில் இருந்து படிப்படியாகச் செயல்படத் தொடங்கின. முனையத்தின் வடக்குப் பகுதியில் புதுப்பிப்புப் பணிகள் 2024ஆம் ஆண்டு நிறைவடையும் என எதிர்பார்க்கப்படுகிறது.
கிருமிப்பரவலுக்கு முன்னர் சாங்கி விமான நிலையத்திற்கு ஓராண்டில் ஏறக்குறைய 70 மில்லியன் பயணிகள் வந்துசென்றனர்.
தற்போது கிருமிப்பரவல் தொடர்பான கட்டுப்பாடுகள் தளர்த்தப்பட்ட நிலையில், அந்த எண்ணிக்கையில் கிட்டத்தட்ட 58 விழுக்காட்டுப் பயணிகள் வந்துசெல்வதாகக் கூறப்படுகிறது. விமானச் சேவைகளின் எண்ணிக்கை ஏறத்தாழ 67 விழுக்காட்டை எட்டியுள்ளது.
புதுப்பிக்கப்பட்ட இரண்டாம் முனையத்தில் இடவசதி அதிகம் என்பதுடன் பயணிகளைக் கவரும் வகையில் இயற்கை சார்ந்த வடிவமைப்புகள் இடம்பெற்றுள்ளதாக சாங்கி விமான நிலையக் குழுமம் தெரிவித்தது.