மாணவர் முரசு
இ-பேப்பர்
உக்ரேன் மீது போர் தொடுத்த ரஷ்யாவைக் கண்டிக்க வேண்டும் என்று உக்ரேனிய அதிபர் ஸெலென்ஸ்கி கோரிக்கை விடுத்து இருக்கிறார். நியூயார்க்கில் நடக்கும் ஐநா பொதுச் சபை கூட்டத்தில் காணொளி மூலம் அவர் உரையாற்றினார்.
போர் நடுவர் மன்றம் எனும் ஒன்றை சிறப்பு அதிகாரங்களுடன் அமைக்க வேண்டும். உக்ரேனில் அரங்கேற்றி வரும் போர் குற்றங்களைப் பற்றி அந்த மன்றம் விரிவாக விசாரணை நடத்த வேண்டும் என்று அவர் கோரிக்கை விடுத்தார்.
உக்ரேனுக்கு மேலும் ஆயுதங்களை வழங்க வேண்டும். உலகளவில் ரஷ்யாவை கண்டிக்க வேண்டும் என்பவை உள்ளிட்ட அமைதி வழிமுறை ஒன்றையும் உக்ரேனிய அதிபர் அந்தப் பேரவை கூட்டத்தில் முன்வைத்தார். கூட்டத்தில் அவரின் உரைக்கு பலத்த ஆதரவு இருந்தது.
ரஷ்ய அதிபர் புட்டின் 300,000 ராணுவ சேமப் படையினரை பணிக்குத் திரும்பும்படி அழைப்பு விடுத்த அதேநாளன்று, ஐநாவில் ஸெலென்ஸ்கி பேசினார்.
இதனிடையே, ஐநா கூட்டத்தில் உரையாற்றிய பிரிட்டிஷ் பிரதமர் லிஸ் டிரஸ், ரஷ்யாவை வீழ்த்தி உக்ரேன் வெற்றி பெறும்வரை உக்ரேனுக்கு ராணுவ உதவி தொடர்ந்து வழங்கப்படும் என்று சூளுரைத்தார். ஐநா கூட்டத்தில் பல தலைவர்களும் ரஷ்ய அதிபரைக் கண்டித்தனர்.
"உக்ரேன் மீது போர் தொடுத்து அதில் ரஷ்யா தோல்வி அடைந்துவிட்டது. ரஷ்யாவின் அந்த நடவடிக்கைக்கு எதிராக மேற்கத்திய நாடுகள் உக்ரேனுக்கு வலுவான ஆதரவு அளிக்கின்றன.
"'இதைத்தான் அதிபர் புட்டினின் செயல்கள் காட்டி இருக்கின்றன," என்று பிரிட்டிஷ் பிரதமர் கூறினார்.
இவ்வேளையில், உக்ரேனில் போராட சேமப் படை வீரர்களைத் திரட்டப் போவதாக ரஷ்ய அதிபர் புட்டின் அறிவித்ததை அடுத்து ரஷ்யாவின் பல நகர்களிலும் ஆர்ப்பாட்டங்கள் கிளம்பியதாக ரஷ்ய சுயேச்சை மனித உரிமை அமைப்பான ஓவிடி-இன்ஃபோ தெரிவித்தது.
நாடு முழுவதும் 39 நகர்களில் கிட்டத்தட்ட 1,307 பேர் கைதானதாகத் தெரிவிக்கப்பட்டது. மாஸ்கோவில்தான் ஆக அதிகமாக 527 பேரை அதிகாரிகள் கைது செய்தனர். அதிபர் புட்டின் உக்ரேன் மீது படையெடுத்து இருப்பதை ஆட்சேபித்து அந்த ஆர்ப்பாட்டங்கள் நடந்தன.
இதனிடையே, ஆர்ப்பாட்டங்களுக்கு யாராவது ஏற்பாடு செய்தால் அல்லது அவற்றில் கலந்துகொண்டால் 15 ஆண்டு வரையிலான சிறைத்தண்டனை விதிக்க முடியும் என்று மாஸ்கோ அதிகாரிகள் எச்சரித்தனர்.
ஆனாலும் அதையும் மீறி ஆர்ப்பாட்டம் நடந்ததாகத் தெரிவிக்கப்பட்டது. புட்டினின் அறிவிப்பைத் தொடர்ந்து ரஷ்யாவைவிட்டு வெளியேறுவதற்கான ஒரு வழி விமானப் பயணச் சீட்டு விலை உயர்ந்துவிட்டதாகத் தெரிவிக்கப்பட்டது.
