மாணவர் முரசு
இ-பேப்பர்
ஸ்ட்ரெய்ட்ஸ் டைம்ஸ், பிஸ்னஸ் டைம்ஸ், பெரித்தா ஹரியான், தமிழ் முரசு உட்பட பல நாளிதழ்களை வெளியிடும் எஸ்பிஎச் ஊடகக் குழுமம் அதன் செய்திப் பிரிவின் முக்கியத் தலைமைப் பதவிகளில் மாற்றங்களை அறிவித்துள்ளது.
'இஎம்டிஎம்' என்று அழைக்கப்படும் ஆங்கிலம், மலாய், தமிழ் ஊடகக் குழுமத்தின் முதன்மை ஆசிரியரும் ஸ்ட்ரெய்ட்ஸ் டைம்ஸ் நாளிதழின் ஆசிரியருமான வாரன் ஃபெர்னாண்டஸ், 56, புதிய வாய்ப்பு களுக்காக தனது பதவியிலிருந்து விலகுகிறார்.
இதையடுத்து, தற்போது பிஸ்னஸ் டைம்ஸ் ஆசிரியராக உள்ள வோங் வெய் கோங், 54, 'இஎம்டிஎம்' முதன்மை ஆசிரியராக நியமிக்கப்படுகிறார் என்று எஸ்பிஎச் ஊடகக் குழுமத்தின் அறிக்கை தெரிவித்தது.
'சிஎன்ஏ' மின்னிலக்கப் பதிப்பின் தலைமை ஆசிரியராக இருந்த ஜெய்மி ஹோ, 49, ஸ்ட்ரெய்ட்ஸ் டைம்ஸ் ஆசிரியர் பொறுப்பை ஏற்கிறார்.
தற்போது பிஸ்னஸ் டைம்ஸின் நிர்வாக ஆசிரியராக உள்ள திருவாட்டி சென் ஹுய்ஃபென், 46, பிஸ்னஸ் டைம்ஸின் ஆசிரியர் ஆகிறார்.
இந்த மாற்றங்கள் அனைத்தும் அக்டோபர் 26ஆம் தேதி நடப்புக்கு வருவுள்ளன.
திரு ஃபெர்னாண்டஸ், 2012ஆம் ஆண்டிலிருந்து ஸ்ட்ரெய்ட்ஸ் டைம்ஸ் ஆசிரியராகவும் 2016ஆம் ஆண்டிலிருந்து இஎம்டிஎம் முதன்மை ஆசிரியராகவும் பதவி வகித்து வருகிறார்.
"நம்பகமான செய்திகளுக்கும் கண்ணோட்டங்களுக்கும் பல சிங்கப்பூரர்கள் நம்பியிருக்கும் ஸ்ட்ரெய்ட்ஸ் டைம்ஸ் மற்றும் அதன் துணை நிறுவனங்களுக்கு முதன்மை ஆசிரியராகப் பணியாற்றியது எனக்குக் கிடைத்த பெருமை," என்று திரு ஃபெர்னாண்டஸ் தெரிவித்தார்.
"வாசகர்களின் மாறிவரும் தேவைக்கு ஏற்ப நானும் என்னுடைய சகாக்களும் பல்லூடக செய்தி அறையாக மாற்றியுள்ளோம். இதனை முன்னெடுத்துச் செல்லும் சவால்மிக்க பணியை என்னுடைய சகாக்கள் எதிர்நோக்குகின்றனர்," என்றார் அவர்.
எஸ்பிஎச் மீடியா டிரஸ்ட்டின் தலைவரான கோ பூன் வான், கடந்த பத்து ஆண்டுகளாக தனிச்சிறப்புமிக்க அர்ப்பணிப்புடன் செயலாற்றிய வாரன் ஃபெர்னாண்டசுக்கு நன்றி தெரிவித்துக் கொண்டார்.
"ஸ்ட்ரெய்ட்ஸ் டைம்ஸ் தொடர்ந்து பல தளங்களில் செய்தி வழங்கும் ஊடகமாகவும் நிறுவனத்தின் சின்னமாகவும் வளர்ச்சி அடைய வெற்றிகரமான வழியை அவர் அமைத்துக் கொடுத்துள்ளார். அவரது எதிர்கால முயற்சிகள் அனைத்தும் வெற்றிபெற வாழ்த்துகிறோம்," என்றும் திரு கோ குறிப்பிட்டார்.
செய்தித் தாளாக இருந்த ஸ்ட்ரெய்ட்ஸ் டைம்சை, நாள் முழுவதும் பல தளங்களில் வலம் வரும் பல்லூடகமாக வாரன் மாற்றினார் என்று எஸ்பிஎச் மீடியா தெரிவித்தது. 2022ல் உலக செய்தி பதிப்பாளர் சங்கத்தின் தங்க விருது உட்பட உள்ளூரிலும் வெளிநாடுகளிலும் ஸ்ட்ரெய்ட்ஸ் டைம்ஸ் ஏராளமான விருதுகளைப் பெற்று உள்ளது. 2021ஆம் ஆண்டில் நடைபெற்ற ஆசிய மின்னிலக்க ஊடக விருது நிகழ்ச்சியில் சிறந்த செய்தி இணையத்தளம் விருதையும் அது வென்றுள்ளது. 2000ஆம் ஆண்டில் தொடங்கப்பட்ட எஸ்டி பள்ளி மாணவர் கைச்செலவு நிதியத்துக்கும் வாரன் தலைவராக இருந்துள்ளார்.
இவருக்கு அடுத்ததாக முதன்மை ஆசிரியர் பொறுப்பை ஏற்கவிருக்கும் திரு வோங், 2016ஆம் ஆண்டிலிருந்து பிஸினஸ் டைம்ஸ் ஆசிரியராக இருந்து வருகிறார்.
"திரு வோங் நிர்வாகத்தின்கீழ் சிங்கப்பூரின் ஒரே நிதி நாளி தழான 'பிஸ்னஸ் டைம்ஸ்' மின்னிலக்க உத்தியில் கால் பதித்தது. இதன் காரணமாக நாளிதழின் வளர்ச்சி மாதம் இரண்டு மடங்காகவும் மின்னிலக்கச் சந்தா மூன்று மடங்காகவும் அதிகரித்தது," என்று எஸ்பிஎச் மீடியாவின் அறிக்கை சுட்டிக்காட்டியது.
"தொடர்ந்து மாறிவரும் உலகில் ஸ்ட்ரெய்ட்ஸ் டைம்ஸ், பிஸ்னஸ் டைம்ஸ், மொழி நாளிதழ்களான பெரித்தா ஹரியான், தமிழ் முரசு ஆகிய நான்கு நாளிதழ்களும் சிங்கப்பூரர்கள் நம்பும் குரலாக இருக்க வேண்டும்," என்று திரு வோங் வலியுறுத்தினார்.
"இதனை அடைய என்னுடைய செய்தி அறையின் சக ஊழியர் களுடன் சேர்ந்து பணியாற்ற இருக்கிறேன். அவர்களுடைய ஆதரவும் இதற்கு அவசியம்," என்று அவர் மேலும் கூறினார்.
ஸ்ட்ரெய்ஸ் டைம்ஸ் ஆசிரியர் பொறுப்பை ஏற்கும் திரு ஹோ, ஏறக்குறைய 300 திறமைவாய்ந்த செய்தியாளர்கள், ஆசிரியர்கள், தயாரிப்பாளர்களை வழிநடத்துவார்.
அவர்களுடன் சேர்ந்து தாக்கத்தை ஏற்படுத்தும் வகையில் மின்னிலக்கப் பதிப்பை முதன்மை செய்தித் தளமாக உருவாக்கும் முயற்சி எடுக்கப்படும் என்றார் அவர்.
1997 முதல் 2013 வரை வெளியுறவு அமைச்சின் அரசாங்கப் பணியில் இருந்த ஹோ, ஐரோப்பா, அமெரிக்கா, மலேசியா மற்றும் இந்தோனீசியா ஆகிய நாடுகளின் இருதரப்பு உறவு விவகாரங்களைக் கவனித்துக்கொண்டார்.
2013ல் மீடியாகார்ப்பில் இணை ஆசிரியராக சேர்ந்த அவர், வானொலி, சிஎன்ஏ இண்டர்நேஷனல் நியூஸ், சிஎன்ஏ டிஜிட்டல் போன்றவற்றில் பல்வேறு பொறுப்பு களை வகித்தார். பிஸ்னஸ் டைம்ஸ் ஆசிரியர் பொறுப்பை ஏற்கும் திருவாட்டி சென், இருபது ஆண்டுகள் எஸ்பிஎச் ஊடகத்தில் பணியாற்றிய அனுபவம் கொண்டவர். இவர், திருவாட்டி டான் சாய் சியோங்குக்குப் பிறகு 2வது பெண் ஆசிரியர் ஆகிறார்.