மாணவர் முரசு
இ-பேப்பர்
சிங்கப்பூரும் நியூயார்க்கும் உலகின் ஆக செலவுமிக்க நகர்கள் எனும் பெயரைப் பெற்றுள்ளன.
லண்டனைச் சேர்ந்த 'இக்கானோமிஸ்ட் இன்டெலிஜன்ஸ் யூனிட்' நடத்திய 'உலகளாவிய வாழ்க்கைச் செலவினம்' குறியீடு எனும் வருடாந்திர ஆய்வு ஒன்றில் இவ்விரு நகர்களும் முதலிடத்தில் உள்ளன.
முன்னதாக, இப்பட்டியலில் முதலிடத்தில் இருந்த இஸ்ரேலின் டெல் அவிவ் நகர் இப்போது கீழே இறங்கி மூன்றாவது இடத்தில் உள்ளது.
உக்ரேனில் நிலவிவரும் போரும் கொவிட்-19 பெருந்தொற்றுக் கட்டுப்பாடுகளும் விநியோகத் தொடரைப் பாதித்துள்ள நிலையில், உலகின் ஆகப் பெரிய நகர்களில் விலைவாசி கிடுகிடுவென உயர்ந்துள்ளதை ஆய்வு காட்டியது.
உலகின் ஆக செலவுமிக்க நகர்கள் பட்டியலில் நியூயார்க் முதல் இடத்தில் இருப்பது இதுவே முதன்முறை.
சிரியாவின் தலைநகர் டமாஸ்கசும் லெபனானின் டிரிப்போலி நகரும் மிகவும் செலவு குறைந்த நகர்களாக தொடர்ந்து நீடிக்கின்றன.
கடந்த ஆகஸ்ட், செப்டம்பர் மாதங்களில் நடத்தப்பட்ட இந்த ஆய்வுக்கு எடுத்துக்கொள்ளப்பட்ட 172 நகர்களில் விலைவாசி சராசரியாக 8.1 விழுக்காடு உயர்ந்து உள்ளது.
இப்பட்டியலில் நகர்களின் தரவரிசையில் வலுவான அமெரிக்க டாலரின் தாக்கத்தைம் ஆய்வு காட்டியது. உலகம் முழுவதும் 50,000 பொருள்களின் விலை டாலருக்கு மாற்றப்பட்டது.
பணவீக்கத்தைத் தணிக்க, அமெரிக்க மத்திய வங்கி வட்டி விகிதத்தைக் கணிசமாக உயர்த்தியுள்ளதைத் தொடர்ந்து இவ்வாண்டு அமெரிக்க டாலரின் மதிப்பு கூடியுள்ளது.
இதற்கிடையே, அமெரிக்காவின் லாஸ் ஏஞ்சலிஸ், சான் ஃபிரான்சிஸ்கோ நகர்களும் முதல் 10 இடங்களுக்குள் வந்தன.
குறிப்பிடும்படியாக, ரஷ்யத் தலைநகர் மாஸ்கோவும் செயிண்ட் பீட்டர்ஸ்பர்க் நகரும் பட்டியலில் வேகமாக மேலே வந்துள்ளன.
மாஸ்கோ 88 இடங்களும் செயிண்ட் பீட்டர்ஸ்பர்க் 70 இடங்களும் மேலேறின. ரஷ்யா மீது மேற்கத்திய நாடுகள் தடைகள் விதித்துள்ளதால் ரஷ்யாவின் பல நகர்களில் விலைவாசி உயர்ந்துள்ளது.
இந்த ஆய்வுக்குத் தலைமை தாங்கிய திருவாட்டி உபசனா டட், "உக்ரேன் போர், ரஷ்யா மீதான மேற்கத்திய நாடுகளின் தடை விதிப்பு, கொவிட்-19 தொடர்பில் சீனாவின் கடுமையான கொள்கைகள் ஆகியவை விநியோகத் தொடருக்கு இடையூறு விளைவித்துள்ளன.
"அவற்றுடன் சேர்த்து, வட்டி விகித உயர்வும் நாணயப் பரிவர்த்தனை விகிதத்தில் ஏற்பட்டுள்ள மாற்றமும் உலகம் முழுவதும் பல நாடுகளில் விலைவாசியை உயர்த்தியுள்ளன," என்று கூறினார்.
"இவ்வாண்டின் வாழ்க்கைச் செலவினக் குறியீட்டில், விலைவாசி உயர்வைத் தெளிவாகப் பார்க்க முடிகிறது. எங்களிடம் உள்ள 20 ஆண்டுகாலத் தரவில், 172 நகர்களில் சராசரி விலைவாசி இவ்வளவு உயர்ந்திருப்பது இதுவே முதன்முறை," என்றும் அவர் சொன்னார்.
உலகின் ஆக செலவுமிக்க நகர்கள் பட்டியலில் முதல் 10 இடங்களுக்குள் வந்த நகர்கள்:
1. சிங்கப்பூர்/நியூயார்க்
3. டெல் அவிவ்
4. ஹாங்காங்/லாஸ் ஏஞ்சலிஸ்
6. ஸூரிக்
7. ஜெனிவா
8. சான் ஃபிரான்சிஸ்கோ
9. பாரிஸ்
10. கோப்பன்ஹேகன்