மாணவர் முரசு
இ-பேப்பர்
கொவிட்-19 பெருந்தொற்று சிங்கப்பூரர்களின் சுகாதாரத்தைக் கணிசமாகப் பாதித்துள்ளது. குறைவானோரே உடற்பயிற்சியில் ஈடுபடுகின்றனர். நாள்பட்ட நோய், புற்றுநோய் பரிசோதனைகளுக்குச் செல்பவர்களின் எண்ணிக்கையும் குறைந்துள்ளது.
சிங்கப்பூரர்கள் தங்களது சுகாதாரத்தைக் கவனித்துக்கொள்வதற்கான அவசியத்தை இது உணர்த்துவதாக சுகாதார அமைச்சு தெரிவித்துள்ளது. தேசிய மக்கள்தொகை சுகாதார ஆய்வை அமைச்சு நேற்று வெளியிட்டது.
கொள்ளைநோய் பரவலின்போது மூத்த குடிமக்கள் கொவிட்-19 தடுப்பூசியுடன் சளிக்காய்ச்சல், நுரையீரல் நோய்களுக்கும் தடுப்பூசி போட்டுக்கொண்டனர். நிமோகோக்கல், இன்ஃபுளுவென்சா எனப்படும் சளிக்காய்ச்சல்களுக்கான தடுப்பூசி போட்டுக்கொண்டோருக்கான விகிதம் அதிகரித்து இருப்பது நம்பிக்கை அளிக்கும் விஷயமாக உள்ளது. மேலும், மனவுளைச்சலை சமாளிக்க சுகாதாரப் பராமரிப்பு நிபுணர்களிடம் உதவி கோர கூடுதலானோர் முன்வந்தனர்.
2020 ஜூலைக்கும் கடந்த ஆண்டு ஜூலைக்கும் இடைப்பட்ட காலகட்டத்தில் 18 முதல் 74 வயதுக்குட்பட்டோரிடம் இந்த ஆய்வு நடத்தப்பட்டது.
சுகாதாரப் பரிசோதனையில் பங்கேற்றவர்களின் எண்ணிக்கை சரிந்தது. பெருந்தொற்று காரணமாக பரிசோதனை சேவை உள்ளிட்ட அவசரமற்ற சேவைகள் தள்ளிவைக்கப்பட்டது இதற்குக் காரணமாக இருந்திருக்கலாம் என்று அமைச்சு கூறியது.
குறிப்பாக, நாள்பட்ட நோய்களுக்கான பரிசோதனை விகிதம் 2019ல் 66 விழுக்காடாக இருந்தது. கடந்த ஆண்டு இது 59 விழுக்காடாக சரிந்தது.
இந்த ஆய்வுக்கு உட்படுத்தப்பட்டவர்களில் ஏறக்குறைய 7 விழுக்காட்டினர், தங்களுக்கு நீரிழிவு இருப்பதாகத் தெரிவித்தனர். ஏறத்தாழ 14 விழுக்காட்டினர் தங்களுக்கு உயர் ரத்தக் கொழுப்பு இருப்பதாகவும் 16 விழுக்காட்டினர் தங்களுக்கு உயர் ரத்த அழுத்தம் இருப்பதாகவும் தெரிவித்தனர். ஆனால் உண்மை நிலவரத்தை இது பிரதிபலிக்காமல் இருக்கலாம் என்று அமைச்சு கூறியது.
"கொவிட்-19 பெருந்தொற்றின்போது குறைவானோரே நாள்பட்ட பரிசோதனைக்குச் சென்றனர். எனவே, நாள்பட்ட நோய்கள் பெரிய அளவில் கண்டறியப்படாமல் இருக்கலாம்," என்று அது சொன்னது.
எடையை அளவிடுதல், சிறுநீர், ரத்தப் பரிசோதனைகளைச் செய்தாலொழிய தங்களுக்கு நாள்பட்ட நோய்கள் இருப்பது பலருக்கும் தெரியாமல் இருக்கலாம்.
அடுத்த ஆண்டின் பிற்பகுதியில் 'மேலும் ஆரோக்கியமான எஸ்ஜி' எனும் பிரதான நோய்த் தடுப்புத் திட்டத்தை செயல்படுத்த சிங்கப்பூர் தயாராகி வரும் வேளையில் இந்த முடிவுகள் வந்துள்ளன.
நீரிழிவு, உயர் ரத்த அழுத்தம், உயர் ரத்தக் கொழுப்பு, மார்பகம், கர்ப்பப்பை, பெருங்குடல் மலக்குடல் புற்றுநோய்கள் ஆகியவற்றுக்கான பரிசோதனைகளுக்கு இந்தத் திட்டத்தின் கீழ் முழுமையாக நிதி வழங்கப்படும்.
இந்த ஆய்வில் தெரியவந்துள்ள கவலைக்குரிய மற்றோர் அம்சம், பரிந்துரைக்கப்பட்ட வாரத்திற்கு குறைந்தது 150 நிமிடங்கள் மிதமான முதல் தீவிர உடல் செயல்பாட்டை குறைவானர்களே மேற்கொண்டுள்ளனர், குறிப்பாக மூப்படையும் மக்கள்.
கிட்டத்தட்ட 80 விழுக்காட்டிலிருந்து 2021ல் இது 71 விழுக்காட்டாகக் குறைந்தது. குறிப்பாக, 2021ஆம் ஆண்டில் தொடர்ச்சியான உடற்பயிற்சி 60 முதல் 74 வயது வரையுள்ள வயதான பெரியவர்களிடையே மிகக் குறைவாகவும் (24 விழுக்காடு), 18 முதல் 29 வயது வரையுள்ள இளம் வயதினரிடையே மிக அதிகமாகவும் (40.5 விழுக்காடு) இருந்தது.
மனநலத்தைப் பொறுத்தவரை, மன உளைச்சலைச் சமாளிக்க சுகாதார நிபுணர்களிடமிருந்து உதவியை நாட அதிகமானோர் குறிப்பாக இளம் வயதினர் தயாராக உள்ளனர். 2019ல் 47.8% ஆக இருந்த இந்த எண்ணிக்கை 2021ல் 58.3% ஆக உயர்ந்துள்ளது. இதில் 60 முதல் 74 வரையுள்ளோர் குறைந்த விருப்பமுள்ளவர்களாகவும் 30 முதல் 39 வரையுள்ளோர் மிகவும் விருப்பமுள்ளவர்களாகவும் இருக்கின்றனர்.
இது மனநலம் குறித்த பொதுமக்களின் விழிப்புணர்வை அதிகரிப்பதை பிரதிபலிக்கிறது. மேலும் மன நிலைமை குறித்த தவறான எண்ணம் குறைந்திருப்பதையும் காட்டுகிறது. அதிக சிங்கப்பூரர்கள் தொற்றுநோய்க்கு பிறகு மனநல நிபுணர்களிடமிருந்து உதவி பெற விரும்புகிறார்கள் என்பதை ஆய்வு காட்டியது.