மாணவர் முரசு
இ-பேப்பர்
உலகின் ஆக நீளமான ஆற்றுவழி சொகுசுக் கப்பல் சேவையை இந்தியப் பிரதமர் நரேந்திர மோடி நேற்று தொடங்கிவைத்தார்.
எம்வி கங்கா விலாஸ் என்று பெயரிடப்பட்டுள்ள அந்தச் சொகுசுக் கப்பல் தனது 51 நாள்
பயணத்தை வாரணாசியிலிருந்து தொடங்கியது. வரும் மார்ச் மாதம் 1ஆம் தேதியன்று அசாம் மாநிலத்தில் உள்ள திப்ருகரை அது சென்றடையும் என்று எதிர்பார்க்கப்படுகிறது.
"உலகின் ஆக நீளமான
ஆற்றுவழி சொகுசுக் கப்பல் சேவை கங்கை ஆற்றில் தொடங்கியிருப்பது ஒரு மைல்கல்லாகும். இந்திய சுற்றுப்பயணத்துறை புதிய அத்தியாயத்திற்குள் அடியெடுத்து வைத்திருப்பதை இது பறைசாற்றுகிறது," என்று மெய்நிகர் வாயிலாக சொகுசுக் கப்பல் சேவையைத் தொடங்கிவைத்துத் தெரிவித்தார் பிரதமர் மோடி.
இந்த ஆற்றுவழி சொகுசுக் கப்பல் சேவை சுற்றுப்பயணத்
துறைக்குக் கூடுதல் வருமானத்தைக் கொண்டு
வருவதுடன் புதிய வேலைவாய்ப்பு களையும் உருவாக்கும் என்றார் பிரதமர் மோடி.
"இந்தியாவை வெறும் வார்த்தைகளால் உள்ளடக்கிவிட முடியாது. அதை இதயபூர்வமாக மட்டுமே உணர்ந்து அனுபவிக்க முடியும்," என்று கங்கை ஆற்றில் தனது கன்னிப் பயணத்தைத் தொடங்கிய எம்வி கங்கா விலாஸில் இருந்த வெளிநாட்டு ஊழியர்களிடம் மோடி கூறினார்.
அடுத்த 51 நாள்களில் ஏறத்தாழ 3,200 கிலோமீட்டர் தூரம் கடந்து, 27 ஆறுகளையும் பல மாநிலங்களையும் கடந்து சென்று திப்ருகரை கங்கா விலாஸ் சென்றடையும்.
கங்கா விலாஸில் பயணம் செய்பவர்கள் உலக மரபுடைமைத் தளங்கள், தேசியப் பூங்காக்கள், ஆறுகளில் உள்ள கப்பல்துறைகள், பீகார் தலைநகர் பாட்னா, ஜார்கண்ட் மாநிலத்தின் சாஹிப்கஞ்ச், மேற்கு வங்காளத் தலை
நகர் கோல்கத்தா, பங்ளாதேஷ் தலைநகர் டாக்கா, அசாமின் கௌஹாத்தி உட்பட 50 சுற்றுலாத் தலங்களுக்குச் சென்று அவற்றை நேரில் பார்த்து ரசிக்கலாம்.
அதுமட்டுமல்லாது, வாரணாசி யில் தினந்தோறும் நடைபெறும் பிரசித்திபெற்ற 'கங்கா ஆரத்தி'யையும் பயணிகள் பார்க்கும் வகையில் சொகுசுக் கப்பல் அங்கு சிறிது நேரம் நங்கூரமிடப்படும்.
சாரனாத்தில் உள்ள பௌத்த சமயத் தலம், அசாமில் உள்ள ஆகப் பெரிய ஆற்றுத் தீவான மஜுலியையும் பயணிகள் கண்டு களிக்கலாம்.
பீகார் யோகா பள்ளி, விக்ரம்ஷிலா பல்கலைக்கழகத்துக்கும் பயணிகள் அழைத்துச் செல்லப்படுவர். வங்கக் கடல் டெல்டா பகுதி வழியாகவும் காசிரங்கா தேசிய பூங்கா வழியாகவும் சொகுசுக் கப்பல் செல்லும்.
கங்கா விலாஸ் சொகுசுக் கப்பல் மூன்று மாடிகளைக் கொண்டது. 18 சொகுசு அறை
களைக் கொண்டுள்ள அக்கப்பலில் அனைத்து வசதிகளுடன் ஒரே நேரத்தில் 36 சுற்றுப்பயணிகள் பயணம் செய்யலாம்.
கங்கா விலாஸின் கன்னிப் பயணத்தில் தற்போது சுவிட்சர்லாந்தைச் சேர்ந்த 32 பயணிகள் பயணம் மேற்கொண்டு வருகின்றனர். இந்த சொகுசுக் கப்பல் பயணத்துக்கான ஒருநாள் செலவு ஏறத்தாழ 25,000 ரூபாய் (ஒரு பயணிக்கான கட்டணம்).