மாணவர் முரசு
இ-பேப்பர்
சிங்கப்பூரின் மேற்கு வட்டாரத்தில் பரோட்டா விலை குறைவாகவும் மத்திய வட்டாரத்தில் காப்பி விலை குறைவாகவும் விற்கப்படுவது ஆய்வு ஒன்றில் கண்டறியப்பட்டுள்ளது. தனிநபர், குடும்ப வருமானத்திற்கு ஏற்ப வெளியில் உணவருந்தும் செலவும் அதி கரிக்கும் என அந்த ஆய்வு தெரிவிக்கிறது.
உணவு விலைகள் பற்றி கொள்கை ஆய்வுக் கழகம் நேற்று வெளியிட்ட ஆய்வறிக்கை யில் இந்த விவரங்கள் தெரிவிக்கப்பட்டன.
2022 செப்டம்பர் முதல் நவம்பர் வரை யிலும் 2023 ஜனவரி முதல் பிப்ரவரி வரையிலும் உணவங்காடி நிலையங்கள், காப்பிக் கடைகள், உணவு நிலையங்கள் ஆகிய இடங்களில் விற்கப்படும் உணவுகளின் விலைகளை கழகம் திரட்டியது. அதில் இரண்டாவது காலகட்டத்தில் 18ல் 13 உணவுகளின் விலை குறிப்பிடத்தக்க அளவு அதிகரித்து இருந்தது. மேலும் 2வது காலகட்டத்தில் வெவ்வேறு வட்டாரங்களில் உணவு விலைகள் வேறுபட்டிருந்தன.
இரண்டாவது முறையாக இந்த ஆய்வை நடத்தியுள்ள கொள்கை ஆய்வுக் கழகம் 'மக்கான் குறீயீடு' என்ற பெயரில் உணவு விலைகளை மதிப்பிட்டு வருகிறது.
இதற்கு முன் 2017ல் இந்த ஆய்வு மேற்கொள்ளப்பட்டது.
சிங்கப்பூர் முழுவதும் வெவ்வேறு உணவு விற்பனை இடங்களில் மூன்று வேளைகளில் வழங்கப்படும் காப்பி-ஓ, வன்தான் நூடல்ஸ், பீஹூன், சிக்கன் சாப் உள்ளிட்ட 18 உணவு, பானங்களை ஆய்வுக் குழுவினர் ஆராய்ந்த னர்.
இதற்காக 26 குடியிருப்புப் பேட்டைகளில் உள்ள 636 காப்பிக் கடைகள், 101 உணவு நிலையங்கள், 94 உணவங்காடி நிலையங்கள், 829 உணவு விற்பனை இடங்களுக்கு அவர்கள் சென்றனர். ஆய்வு உதவியாளர்கள் ஹேனியல் லிம், மிண்டி சோங் ஆகியோருடன் சேர்ந்து ஆய்வாளர் டியோ கே கீ இந்த ஆய்வை நடத்தியிருக்கிறார்.
ஆய்வில் பங்கேற்றவர்களில் பாதிக்கும் மேற்பட்டோர் உணவங்காடி நிலையங்கள், உணவு நிலையங்கள், காப்பிக் கடைகள், உணவு விடுதி, உணவுக் கூடங்கள், சாலையோரக் கடைகளில் உணவுக்காக அதிகம் செலவழித்ததாக ஆய்வு தெரிவிக்கிறது.
இரண்டு காலகட்டங்களில் திரட்டப்பட்ட தரவுகளை ஒப்பிட்டால் பெரும்பாலான கடைக்காரர்கள் உணவு விலையை அதிகரிக்கவில்லை அல்லது சிறிதளவே உயர்த்தியிருந்தன என்பது தெரிய வந்தது.
மனிதவளப் பற்றாக்குறை, நேரமின்மை காரணமாக முதல் சுற்று தகவல்களைத் திரட்டிய பிறகு இரண்டாவது முறையாக 829 இடங்களில் 50 இடங்களுக்கு மட்டுமே மறுபடியும் செல்ல முடிந்தது என்பதை ஆய்வாளர்கள் சுட்டிக்காட்டியிருந்தனர். அப்படி மறுபடியும் சென்ற கடைகளில் விலை 30 காசுக்கு மேல் உயர்த்தப்படவில்லை.
பெரும்பாலான உணவுகளின் விலை 10 காசுக்கு மேல் அதிகரிக்கவில்லை என்பது ஆய்வில் தெரிந்தது.
மத்திய வட்டாரத்தில் சிக்கன் சாப், பானங்களின் விலை குறைவாக இருந்தது. காயா டோஸ்ட், இரண்டு அரை வேக்காடு முட்டைகள், காப்பி அல்லது தேநீரை உள்ளடக்கிய காலை உணவு செட், ஃபிஷ்பால் நூடல்ஸ் ஆகியவை தெற்கு வட்டாரங்களில் விலை குறைவாக இருந்தன. மேற்கு வட்டாரத்தில் பரோட்டா விலை குறைந்து காணப்பட்டது.
மிக மலிவாக காப்பி-ஓவின் விலை $1.09ஆக இருந்தது.
விலை அதிகமாக $1.81க்கு ஐஸ்டு மைலோ விற்கப்பட்டது,
ஒரு சாதாரண பரோட்டா, முட்டை பரோட்டா செட் சராசரி $2.97க்கு விற்கப்பட்டது. சிக்கன் சாப் ஆக அதிக விலையைக் கொண்டிருந்தது. அதன் சராசரி விலை $7.58.