மாணவர் முரசு
இ-பேப்பர்
சிங்கப்பூரின் சென்ற மாத ஏற்றுமதி தொடர்ந்து ஐந்தாவது மாதமாக சரிந்தது
சிங்கப்பூரின் சென்ற மாத எண்ணெய் சாரா உள்நாட்டு உற்பத்திப் பொருள்கள் ஏற்றுமதி ஆண்டு அடிப்படையில் 15.6 விழுக்காடு குறைந்தது. தொடர்ந்து ஐந்தாவது மாதமாக ஏற்றுமதி சரிந்துள்ளது.
சென்ற மாதம் மின்னணுப் பொருள்கள், மின்னணு சாராப் பொருள்கள் என இரு பிரிவுகளிலும் ஏற்றுமதி குறைந்தது.
கடந்த ஜனவரி மாதம் சிங்கப்பூரின் ஏற்றுமதி 25 விழுக்காடு வீழ்ச்சி கண்டது.
'எண்டர்பிரைஸ் சிங்கப்பூர்' அமைப்பு நேற்று இந்தத் தகவல்களை வெளியிட்டது.
கடந்த 2019ஆம் ஆண்டு ஜூன் மாதத்திற்குப் பிறகு எண்ணெய் சாரா உள்நாட்டு உற்பத்திப் பொருள்களின் ஏற்றுமதி மிகவும் குறைந்திருப்பதை வல்லுநர்கள் சுட்டினர்.
மாத அடிப்படையில், எண்ணெய் சாராப் பொருள்களின் ஏற்றுமதி எட்டு விழுக்காடு குறைந்து $13.3 பில்லியன் ஆனது. புளூம்பெர்க் நிறுவன ஆய்வாளர்களின் முன்னுரைப்பைவிடவும் அது அதிகம்.
ஜனவரி மாதம் எண்ணெய் சாராப் பொருள்களின் ஏற்றுமதி 0.9 விழுக்காடு வளர்ச்சி கண்டிருந்தது.
மின்னணுப் பொருள்களின் ஏற்றுமதி சென்ற மாதம் 26.5 விழுக்காடு குறைந்தது.
ஒப்புநோக்க, அதற்கு முந்தைய மாதம் அது 26.8 விழுக்காடாக இருந்தது.
உலகளாவிய நிலையில் பொருளியல் வளர்ச்சி தொடர்ந்து குறைவாகவே இருப்பதால் மின்னணுப் பொருள்களின் ஏற்றுமதியும் குறைவாகவே இருக்கும் என்கின்றனர் வல்லுநர்கள்.
தென்கொரியா, தைவான் போன்றவற்றிலும் இந்த ஆண்டுத் தொடக்கத்தில் இருந்து கணினிச் சில்லு ஏற்றுமதி குறைந்திருப்பதை அவர்கள் சுட்டினர்.
சிங்கப்பூரின் மின்னணு சாராப் பொருள்களின் ஏற்றுமதி சென்ற மாதம் 12.1 விழுக்காடு குறைந்தது. ஒப்புநோக்க, இந்த ஆண்டு ஜனவரியில் அது 24.5 விழுக்காடாகப் பதிவானது.
சிங்கப்பூரின் ஏற்றுமதிப் பட்டியலில் முன்னிலை வகிக்கும் 10 சந்தைகளுக்கும் சென்ற மாதம் ஏற்றுமதி குறைந்ததாகத் தெரிவிக்கப்பட்டுள்ளது.
ஐரோப்பிய ஒன்றியம், ஹாங்காங், தைவான் ஆகிய சந்தைகளுக்கான ஏற்றுமதி ஈரிலக்க வீழ்ச்சி கண்டது.
கடந்த ஜனவரி மாதம் ஐரோப்பிய ஒன்றியத்துக்கான ஏற்றுமதி அதிகரித்தது.
ஆனால் சென்ற மாதம் அது ஆண்டு அடிப்படையில் 34.2 விழுக்காடு குறைந்தது.
மருந்துப் பொருள்கள், பெட்ரோலியப் பொருள்கள் போன்றவற்றின் ஏற்றுமதி குறைந்தது இதற்குக் காரணம்.
ஆசியான் வட்டார நாடுகளுக்கு இடையிலான வர்த்தகம் சென்ற மாதம் சற்றே மேம்பட்டது. தாய்லாந்து, இந்தோனீசியா, மலேசியா போன்ற நாடுகளுடனான வர்த்தகம் மீட்சி கண்டது.
சீனாவிற்கான ஏற்றுமதி குறைவாகவே இருந்தாலும் ஜனவரி மாத அளவிற்கு மோசமில்லை என்று கூறப்பட்டது.
சென்ற மாதம் சீனாவிற்கான ஏற்றுமதி 11.3 விழுக்காடு குறைந்தது. ஜனவரி மாதம் அது 41.1 விழுக்காடாகப் பதிவானது. அமெரிக்காவிற்கான ஏற்றுமதி சென்ற மாதம் 8.7 விழுக்காடு அதிகரித்தது.
இந்த ஆண்டின் முதற்பாதியில் ஏற்றுமதி குறைவாகவே இருக்கும் என்று வல்லுநர்கள் முன்னுரைத்துள்ளனர்.
ஏற்றுமதி, நான்கு விழுக்காடு முதல் ஏழு விழுக்காடு வரை குறையக்கூடும் என்பது அவர்கள் முன்னுரைப்பு. நாணயக் கொள்கை மேலும் கடுமையாக்கப்படல், பொருளியல் மந்தநிலை குறித்த கவலை போன்ற அம்சங்களால் சிங்கப்பூரின் ஏற்றுமதி குறையும் என்று எதிர்பார்க்கப்படுவதாக அவர்கள் குறிப்பிட்டனர்.