பூனை வளர்க்க அனுமதி கிட்டலாம்: மூத்த துணையமைச்சர் டான்

07 May 2023 - 5:30 am

2 mins read

சிங்கப்பூரின் வீடமைப்பு வளர்ச்சிக் கழகக் (வீவக) குடியிருப்புகளில் செல்லப்பிராணிகளாகப் பூனைகளை வளர்ப்பதற்கான அனுமதி வழங்கப்படக்கூடும்.

இருப்பினும் பொதுச் சுகாதாரத்தைப் பாதுகாப்பது முக்கியம் என்று தேசிய வளர்ச்சி மூத்த துணையமைச்சர் டான் கியட் ஹாவ் கூறியிருக்கிறார்.

பூனைகள் மூலம் 'ரேபிஸ்' தொற்றுவியாதி பரவுவதைத் தடுக்க வேண்டும் என்றார் அவர்.

ஈஸ்ட் கோஸ்ட் பூங்காவில் நேற்று நடைபெற்ற 'பெட்ஸ் டே அவுட்' எனும் செல்லப்பிராணிகளுக்கான நிகழ்ச்சியில் கலந்துகொண்டு அவர் உரையாற்றினார்.

விலங்குநல மருத்துவச் சேவையான 'ஏவிஎஸ்' அண்மையில் நடத்திய கருத்தாய்வின் முடிவுகளை அவர் தமது உரையில் தெரிவித்தார்.

சென்ற ஆண்டு செப்டம்பர் மாதத்திலிருந்து நவம்பர் மாதம் வரை அந்தக் கருத்தாய்வு நடத்தப்பட்டது.

அதில் 30,000க்கு மேற்பட்டோர் கலந்துகொண்டனர்.

அவர்களில் கிட்டத்தட்ட 90 விழுக்காட்டினர் பூனைகளைச் செல்லப்பிராணிகளாக வீவக வீடுகளில் வளர்ப்பதற்கு ஆதரவு தெரிவித்தனர்.

பூனைகள் குடியிருப்புப் பேட்டைகளை அசுத்தப்படுத்துவதால் சிலர் அதிருப்தி தெரிவித்தனர்.

அடுத்த மாதம் முதல் இதன் தொடர்பில் கலந்துரையாடல்கள் நடத்தப்படும் எனக் கூறப்பட்டது.

பூனை வளர்ப்போர், பூனை வளர்க்காதோர், வீதிகளில் உள்ள பூனைகளைப் பராமரிப்போர், வீடமைப்பு வளர்ச்சிக் கழகம், விலங்குநல ஆர்வலர் குழு உறுப்பினர்கள் உள்ளிட்டோர் அந்தக் கலந்துரையாடல்களில் பங்குபெறுவர்.

சிங்கப்பூரர்கள் 1960ஆம் ஆண்டில் அடுக்குமாடிக் குடியிருப்புகளில் வசிக்கத் தொடங்கியதில் இருந்து வீடமைப்பு வளர்ச்சிக் கழக வீடுகளில் விலங்குகளையும் பறவைகளையும் வளர்க்கத் தடை விதிக்கப்பட்டது.

பின்னர் நாய், சிறிய விலங்குகள் போன்றவற்றுக்கு விலக்கு அளிக்கப்பட்டாலும் பூனைகளுக்கு அந்தத் தடை இன்றும் நடப்பில் உள்ளது.

பூனைகளுக்கு 'ரேபிஸ்' நோய்த்தொற்று ஏற்படக்கூடும். அவற்றிடமிருந்து அது மனிதர்களுக்கும் பரவக்கூடும் என்கின்றனர் மருத்துவ வல்லுநர்கள்.

சிங்கப்பூரில் 1953 முதல் பூனைகளிடமிருந்து மனிதர்களுக்குப் பரவக்கூடிய 'ரேபிஸ்' நோய் யாரையும் தொற்றவில்லை என்பதைத் தமது உரையில் குறிப்பிட்ட திரு டான், அதனை மெத்தனமாக எடுத்துக்கொள்ள இயலாது என்பதை வலியுறுத்தினார்.

'ஏவிஎஸ்' கருத்தாய்வில் பங்குபெற்ற பெரும்பாலானோர் பூனைகளுக்கு தொடர்புத்தடம் கண்டறிய உதவும் 'மைக்ரோசிப்' சில்லுகளைப் பொருத்துதல், முதல்முறை செல்லப்பிராணி வளர்ப்போர் அடிப்படை அம்சங்களுக்கான பயிற்சி எடுப்பதைக் கட்டாயமாக்குதல் போன்றவற்றைப் பரிந்துரைத்தனர்.

மொத்தத்தில் அக்கம் பக்கத்தினருக்கு தொந்தரவு தராத வகையில் பூனை வளர்ப்போர் கவனமாக இருக்கவேண்டும் என்று மூத்த துணையமைச்சர் டான் கியட் ஹாவ் வலியுறுத்தினார்.

வீதிகளில் வசிக்கும் பூனைகளுக்கு இனப்பெருக்கக் கட்டுப்பாட்டு நடவடிக்கைகளை மேற்கொள்வதற்கு கருத்தாய்வில் கலந்துகொண்ட பெரும்பாலோர் ஆதரவு தெரிவித்ததாகக் கூறப்பட்டது.

பொதுமக்கள் தங்கள் கருத்துகளை https://go.gov.sg/avs-cat-management என்ற இணையத்தள முகவரி மூலம் பகிர்ந்துகொள்ளலாம்.

இச்செய்தியைப் பகிரவும்