மாணவர் முரசு
இ-பேப்பர்
வீடமைப்பு வளர்ச்சிக் கழகம் பல்வேறு பேட்டைகளில் கிட்டத்தட்ட 7,000 வீடுகளை நேற்று விற்பனைக்கு விட்டது. இவற்றில் 1,500 வீடுகள் எஞ்சிய வீடுகளின் விற்பனைப் பட்டியலில் உள்ளவை. ஐந்து வீடமைப்புத் திட்டங்களுக்கு உட்பட்ட 5,495 தேவைக்கேற்ப கட்டி விற்கப்படும் (பிடிஓ) வீடுகளும் விற்பனைக்கு வந்தவற்றுள் அடங்கும். முதிர்ச்சியடைந்த பேட்டைகளான பிடோக், காலாங்/வாம்போ மற்றும் சிராங்கூன் வட்டாரங்களில் அமல்படுத்தப்பட்ட பிடிஓ திட்டங்கள் அவை.
இதர இரண்டு திட்டங்கள் முதிர்ச்சியடையாத தெங்கா வீடமைப்புப் பேட்டைக்குரியவை. விற்பனைக்கு விடப்படும் பிடிஓ வீடுகளில் 90 விழுக்காட்டுக்கான காத்திருப்புக் காலம் நான்காண்டுகளுக்கும் குறைவு.
அதேநேரம் ஐந்து பிடிஓ திட்டங்களில் நான்கிற்கான காத்திருப்புக் காலம் மூன்றாண்டு ஒரு மாதம் முதல் மூன்றாண்டு எட்டு மாதம் வரை இருக்கும் என்று வீவக நேற்று தெரிவித்தது.
விற்பனைக்கு விடப்பட்டுள்ள வட்டாரங்களில் பிடோக் மற்றும் சிராங்கூன் வீடுகளுக்கு வலுவான தேவை இருக்கும் என்று தான் எதிர்பார்ப்பதாக அது கூறியது.
பிடோக்கில் இதற்கு முன்னர் 2016 நவம்பரில் பிடிஓ வீடுகள் விற்பனைக்கு விடப்பட்டன. அதேபோல சிராங்கூனில் 2014 ஜனவரியில் மூத்தோருக்கான 150 ஸ்டூடியோ வீடுகளுக்கான விற்பனை நடைபெற்றது.
தற்போது விற்பனைக்கு வந்துள்ளவற்றில் 1,640 வீடுகள் பிடோக் சவுத் பிளாசம் திட்டத்தில் இடம்பெற்றுள்ளவை. தானா மேரா எம்ஆர்டி நிலையத்தின் அருகிலுள்ள தளத்தில் அந்த வீடுகள் இடம்பெறும். பிடோக் சவுத் ரோடு மற்றும் பிடோக் சவுத் அவென்யூ 3 ஆகிய பகுதிகளால் சூழப்பட்ட பகுதி அது.
புதிய வீடுகளுக்கான விலை விவரங்களையும் கழகம் வெளியிட்டுள்ளது. பிடோக் சவுத் பிளாசம் ஐந்தறை வீடுகளுக்கான விலை $588,000 முதல் $737,000 வரையிலும் நான்கறை வீடுகளின் விலை $488,000 முதல் $587,000 வரையிலும் இருக்கும். அதேபோல, மூவறை வீடுகளின் விலை $320,000க்கும் $396,000க்கும் இடைப்பட்டு இருக்கும் என்றது கழகம்.
விற்பனைக்கு விடப்பட்ட வீடுகளில் சிராங்கூன் நார்க் விஸ்தாவில் உள்ள 330 வீடுகளும் அடங்கும். சிராங்கூன் அவென்யூ 1க்கும் இயோ சூ காங் ரோட்டுக்கும் இடைப்பட்ட தளத்தில் அந்த வீடுகள் அமையும். இங்குள்ள ஐந்தறை வீடுகளின் விலை $558,000க்கும் $658,000க்கும் இடைப்பட்டதாக இருக்கும். நான்கறை வீடுகளின் விலை $397,000 முதல் $496,000 வரை இருக்கும்.
இந்த இரு பேட்டைகளில் விற்பனைக்கு விடப்பட்ட ஐந்தறை வீடுகள் இம்மாதம் விற்பனைக்கு விடப்பட்ட மொத்த ஐந்தறை வீடுகளில் 40 விழுக்காட்டுக்கும் மேல்.
ஃபேரர் பார்க் அரினாவில் 569 வீடுகள் விற்பனைக்கு விடப்படுகின்றன. இவற்றில் நான்கறை மற்றும் மூவறை வீடுகள் மட்டும் இருக்கும். இவற்றின் விலை $362,000க்கும் $642,000க்கும் இடைப்பட்டதாக இருக்கும்.
இந்த வீடுகளுக்கான திட்டம் முதன்மை வட்டார பொது வீடமைப்பு முறையின்கீழ் அமைந்துள்ளது. இந்த வீடுகளுக்கான குறைந்தபட்ச குடியிருப்பு காலம் 10 ஆண்டுகள்.