மாணவர் முரசு
இ-பேப்பர்
மோனலிசா
மருத்துவப் பணியிலும் சமூக சேவையிலும் சிறந்து விளங்கும் டாக்டர் ஷாமினி ராதாகிருஷ்ணன் இவ்வாண்டின் லீ குவான் இயூ உபகாரச் சம்பளத்தை பெற்ற பெருமைக்குரிய மூவரில் ஒருவர்.
அமெரிக்காவின் ஜான்ஸ் ஹாப்கின்ஸ் பல்கலைக்கழகத்தில் முதுநிலைப் படிப்பை அவர் மேற்கொள்ளவுள்ளார்.
சுகாதார அமைச்சின்கீழ் பொதுச் சுகாதார நிபுணத்துவ பயிற்சியாளராகப் பணிபுரியும் 28 வயது ஷாமினி, இளைய மருத்துவர்களுக்கான தேசிய நல்வாழ்வு குழுவின் முயற்சிகளில் முனைப்புடன் பங்காற்றியிருக்கும் இவர், சுகாதார அமைச்சின் தொற்று நோய்கள் பிரிவில் சுவாச நோய்க்கிருமிகளுக்கான தேசிய கண்காணிப்புப் பிரிவிலும் பணியாற்றி வருகிறார்.
கொவிட்-19 தொற்றுநோய் பரவியபோது மருத்துவப் பணி யைத் தொடங்கிய ஷாமினி 'கொவிட்-19 மீள்திறன் பதக்கம்' பெற்றவர்களில் ஒருவர்.
பெருந்தொற்றுச் சூழலில் நோயாளிகளை கவனித்துக்கொள்வதும் அவர்களின் மன அழுத்தத்தைக் கையாள்வதும் மிகுந்த சவாலாக இருந்ததை நினைவுகூர்ந்தார். குறிப்பாக தொடர்ந்து 30 மணி நேரம் என்-95 முகக்கவசத்துடன் தனிநபர் பாதுகாப்பு சாதனம் அணிந்து பணிபுரிந்தது உடலளவில் சோர்வையும் நோயாளிகளுடன் வாய்மொழி அல்லாத தொடர்பை ஏற்படுத்துவதில் சிரமத்தையும் ஏற்படுத்தியதாகசொன்னார்.
வெளிநாட்டு ஊழியர்கள் மருத்துவ நிலையத்தில் மருத்துவ தொண்டூழியராகவும் பணியாற்றி உள்ளார். பெரும்பாலும் குடும்பத் தின் பொருளாதார வளர்ச்சியிலேயே அக்கறை கொண்டிருக்கும் வெளிநாட்டு ஊழியர்களிடம் உடல்நலனின் முக்கியத்துவத்தைப் புரியவைத்து ஆரோக்கிய வாழ்க்கைமுறையை அவர்களுக்கு நடைமுறையாக்கிய அனுபவங்கள் மனநிறைவை அளித்தன.
மருத்துவம் என்பது சிகிச்சை, மருந்துகளுக்கு அப்பாற்பட்டு, நோயாளிகளின் மனத்தை புரிந்து கொண்டு அவர்களின் உடல்நலனை மேம்படுத்த உதவுவது என்பது இவரின் நம்பிக்கை. அதற்கு மொழி ஒரு தடையாக இருக்கக்கூடாது என மருத்துவ சீன மொழியும் படித்துள்ளார்.
சிங்கப்பூர் மக்களின் சராசரி ஆயுட்காலத்தில் ஆரோக்கியமான காலகட்டத்தை அதிகரிக்க பாடுபட வேண்டும் என்பதே ஷாமினியின் குறிக்கோள்.
"நோய்களுக்கான சிகிச்சை முறைகள் எவ்வளவு முக்கியமோ அதைவிட அந்த நோய்கள் வரமால் தடுப்பது ஆரோக்கியமான சமூக மேம்பாட்டிற்கு அவசியமாகிறது. தொடர்ந்து அதில் அதிக கவனம் செலுத்த விரும்புகிறேன்" என்றார் ஷாமினி.
இவருடன், கல்வி அமைச்சைச் சேர்ந்த திருவாட்டி ஜீன் டான் என் கீ, 37, துணைப் பிரதமர் ஹெங் சுவீ கியட்டின் துணை முதன்மை அந்தரங்கச் செயலாளார் திரு பெக் யிபெங், ஆல்பர்ட், 36 இருவரும் இந்த உபகாரச் சம்பளத்தைப் பெற்றனர்.
monolisa@sph.com.sg