மாணவர் முரசு
இ-பேப்பர்
பாரிஸ்: ஐரோப்பிய விமானத் தயாரிப்பு நிறுவனம் ஏர்பஸ், ஏ320 விமானங்களில் கிட்டத்தட்ட 6,000 விமானங்களை மீட்டுக்கொள்வதாக அறிவித்துள்ளது.
மீட்டுக்கொள்ளப்படும் விமானங்களுக்கு உடனடியான பழுதுபார்ப்பு தேவை இருப்பதாக ஏர்பஸ் கூறியது.
இதனால் அனைத்துலக அளவில் அந்த ரகத்தைச் சேர்ந்த விமானங்களில் பாதிக்கும் மேற்பட்டவற்றின் செயல்பாடுகள் பாதிக்கப்பட்டுள்ளன.
அமெரிக்காவின் ‘தேங்ஸ்கிவிங்’ பண்டிகை நேரத்தில் நேர்ந்துள்ள இந்த நடவடிக்கை, குடும்பத்தினரைக் காணச் செல்லும் பயணிகளுக்கு இடையூறுகளை ஏற்படுத்தியுள்ளது.
கடந்த 55 ஆண்டுகளாகச் செயல்படும் ஏர்பஸ் நிறுவனத்திற்கு இந்நடவடிக்கை ஆகப் பெரும் பின்னடைவு.
விமானங்கள் மென்பொருளின் குறைபாட்டால் பாதிக்கப்பட்டுள்ளன. முன்னதாகப் பயன்படுத்தப்பட்ட மென்பொருளுக்கு விமானங்களை மாற்றுவதில் சிக்கல்கள் அவ்வளவாக இல்லை என்றாலும் விமானம் தரையைவிட்டு மீண்டும் புறப்படுவதற்கு முன்னதாக பழுதுபார்க்கும் பணி தேவைப்படும் என்று தெரிவிக்கப்பட்டது.
இந்தப் பணிகளால் விமானச் சேவையில் தாமதங்கள் அல்லது தடைகள் ஏற்படும் என்று அமெரிக்கா, ஐரோப்பா முதல் இந்தியா வரையில் உள்ள விமானச் சேவை நிறுவனங்கள் தெரிவித்தன.
சிங்கப்பூர் மலிவுக் கட்டண விமான நிறுவனமான ஸ்கூட்டுக்குச் சொந்தமான 21 விமானங்கள் பாதிக்கப்பட்டுள்ளன. இருந்தபோதும், பழுதுபார்க்கும் பணிகள் நவம்பர் 29க்குள் நிறைவடையும் என்று அந்நிறுவனம் கூறியது.
தொடர்புடைய செய்திகள்
உலகின் மிகப்பெரிய A320 விமானங்களை இயக்கும் அமெரிக்கன் ஏர்லைன்ஸ் (American Airlines), அதன் 480 A320 விமானங்களில் சுமார் 340 விமானங்களுக்குப் பழுதுபார்ப்பு தேவைப்படும் என்று முதலில் கூறியது.
ஜெர்மனியின் லுஃப்தான்சா (Lufthansa), இந்தியாவின் இண்டிகோ (IndiGo) உட்பட மற்ற விமான நிறுவனங்களும் பழுதுபார்க்கும் பணிகளைச் செய்வதற்காக தங்கள் விமானங்களில் சிலவற்றைச் சிறிது காலத்திற்குச் சேவையில் இருந்து அகற்றுவதாகக் கூறின.
இங்கிலாந்தைத் தளமாகக் கொண்ட ஈஸிஜெட் (easyJet) நிறுவனம் ஏற்கெனவே பணியை முடித்துவிட்டதாகக் கூறியது.
ஜப்பானின் ஏஎன்ஏ ஹோல்டிங்ஸ் (ANA Holdings) நவம்பர் 29ல் 65 விமானங்களைச் சேவையிலிருந்து அகற்றியது. இது சுமார் 9,400 பயணிகளைப் பாதித்தது என்று அந்த விமான நிறுவனம் அறிக்கை ஒன்றில் குறிப்பிட்டது.
கொரியன் ஏர் (Korean Air), 10 ஏர்பஸ் விமானங்களில் நவம்பர் 30ஆம் தேதி காலைக்குள் பணிகள் முடிவடையும் என்று கூறியது.
தென்கொரியாவின் ஆசியானா ஏர்லைன்ஸ் (Asiana Airlines) அதன் விமான அட்டவணையில் குறிப்பிடத்தக்க இடையூறுகள் எதையும் எதிர்பார்க்கவில்லை என்று கூறியது. ஏனெனில் அதன் 17 விமானங்கள் மட்டுமே திரும்பப் பெறும் நடவடிக்கையால் பாதிக்கப்பட்டுள்ளன.
ஆஸ்திரேலியாவின் தேசியக் கொடியைத் தாங்கிச் செல்லும் விமான நிறுவனமான குவாண்டாஸின் (Qantas) மலிவு விலை பிரிவான ஜெட்ஸ்டார் ஏர்வேஸ் (Jetstar Airways) திரும்பப் பெறும் நடவடிக்கையால் பாதிக்கப்பட்டுள்ளதாகக் கூறியது. ஆனால் குவாண்டாஸ் அதன் சொந்த விமானங்களில் எந்தப் பாதிப்பும் இல்லை என்று கூறியது.