இங்கிலீஷ் பிரிமியர் லீக் ஆட்டங்களைக் காண ஆண்டுச் சந்தா

இங்கிலீஷ் பிரிமியர் லீக் (இபிஎல்) காற்பந்துப் போட்டிகளைச் சிங்கப்பூர் ரசிகர்கள் கண்டுகளிக்க ஆண்டுச் சந்தா திட்டத்தின் விவரங்களை ஸ்டார்ஹப் நிறுவனம் வியாழக்கிழமை (மே 21) வெளியிட்டது.

இவ்வாண்டு ஜூன் 1ஆம் தேதிமுதல் இத்திட்டம் ரசிகர்களுக்கு அமலாகும். ஸ்டார்ஹப் வாடிக்கையாளர்களுக்கு $238 எனவும் அந்நிறுவன வாடிக்கையாளர் அல்லாதோருக்கு $380 எனவும் கட்டணம் வகுக்கப்பட்டது.

‘பிரீமியர்+ ஏனுவல் பாஸ்’(Premier+ Annual Pass) என அழைக்கப்படும் அத்திட்டப்படி, இங்கிலாந்தின் தலைசிறந்தக் குழுக்களை மிகவும் விரும்பித் தொடரும் உள்ளூர்க் காற்பந்து ரசிகர்களுக்குக் கட்டணம் கவர்ச்சியாக அமையும் என்று எதிர்பார்க்கப்படுகிறது.

ஸ்டார்ஹப் நிறுவனத்தின் தற்போதைய ‘இபிஎல்’ காற்பந்தாட்டத் தொகுப்புத் திட்டப்படி, இரு தேர்வுகளின் மாதச் சந்தா $40.74 முதல் $69.90 வரை வசூலிக்கப்படுகிறது. சிங்டெல் வாடிக்கையாளர்கள் ஆட்டங்களைக் காணவிரும்பினால், பகிர்வு ஏற்பாட்டின்கீழ் அவர்கள் $69.90 கட்டணமாகச் செலுத்துகின்றனர்.

முன்னாள் இபிஎல் காற்பந்து ஆட்டக்காரர்கள்

ஸ்டார்ஹப் நடத்திய செய்தியாளர் கூட்டத்தில் இத்திட்டங்கள் வெளியிடப்பட்டபோது, ‘இபிஎல்’ அமைப்பின் சிறப்பு வருகையாளர்களாக முன்னாள் ஆட்டக்காரர்களான மான்செஸ்டர் புனைடெட் குழுவின் நிமெஞ்சா விடிச், செல்சி குழுவின் ஜோ கோல் இருவரும் இருந்தனர்.