மாணவர் முரசு
இ-பேப்பர்
பேங்காக்: பேங்காக்கில் உள்ள வஜிரா மருத்துவமனைக்கு முன்னால் அமைந்துள்ள சாம்சென் சாலை புதைகுழி சரிசெய்யப்பட்டு போக்குவரத்துக்கு மீண்டும் திறந்து விடப்படுவது புதன்கிழமை (அக்டோபர் 8) முதல் காலவரையின்றி ஒத்திவைக்கப்பட்டுள்ளது. ஏனெனில் சம்பந்தப்பட்ட அமைப்புகள் முதலில் சாம்சென் காவல் நிலையக் கட்டடத்தை இடிக்க வேண்டும் என்று போக்குவரத்து அமைச்சர் அக்டோபர் 7ஆம் தேதி தெரிவித்தார்.
அக்டோபர் 8ஆம் தேதி திட்டமிடப்பட்டபடி பாதிக்கப்பட்ட சாலையில் போக்குவரத்து ஓரளவு மீண்டும் தொடங்கும் வகையில், புதைகுழியில் பழுதுபார்ப்புப் பணிகளைச் சரியான நேரத்தில் முடிக்க முடியவில்லை என்று துணைப் பிரதமரும் போக்குவரத்து அமைச்சருமான பிபாட் ரட்சகிட்பிரகர்ன் கூறினார்.
காவல் நிலையக் கட்டடம் இடிக்கப்பட்ட பின்னரே மருத்துவமனைக்கு முன்னால் போக்குவரத்தை மீண்டும் திறந்துவிட முடியும் என்று திரு பிபாட் விளக்கினார்.
அக்டோபர் 6ஆம் தேதி தாமும் பிரதமர் அனுட்டின் சார்ன்விரகுலும் பழுதுபார்க்கும் இடத்தை ஆய்வு செய்ததாகவும், அதன் பிறகு, கட்டமைப்பு நிலையற்றதாகவும், பாதுகாப்பற்றதாகவும் இருப்பதாகக் கூறி, முழு காவல் நிலையத்தையும் இடிப்பதற்குப் பிரதமர் உத்தரவிட்டதாகவும் அவர் கூறினார்.
“எனவே, முதலில் காவல் நிலையத்தை இடிக்க வேண்டும். அதுவரை முன்னர் உறுதியளித்தபடி அந்தச் சாலையில் போக்குவரத்தை மீண்டும் தொடங்க முடியாது,” என்று திரு பிபாட் கூறினார்.
பேங்காக் ஆளுநர் சாட்சார்ட் சிட்டிபண்ட், அந்த இடத்தில் மேலும் நிலம் உறுதியற்றதாக இருப்பதாகவும், இதனால் காவல் நிலையத்தின் அடித்தளப் பகுதியில் கூடுதல் சேதம் ஏற்பட்டதாகவும் தெரிவித்ததைத் தொடர்ந்து, அக்டோபர் 6ஆம் தேதி சாம்சென் காவல் நிலையத்தை இடிக்கும் பணி தொடங்கியது.
பிரதான அடித்தளத் தூண்களில் ஒன்று உடைந்து, அச்சேதம் மற்றொரு தூணுக்கும் பரவியது. இதனால் கட்டடத்தின் சுமை தாங்கும் ஆற்றல் கணிசமாகக் குறைந்தது.
ஊழியர்களுக்கு ஏற்படும் ஆபத்தைக் குறைக்கும் வகையில் இயந்திர மனிதர்கள் (ரோபோ) மூலம் இடிப்புப் பணிகள் மேற்கொள்ளப்படுவதாக திரு பிபாட் கூறினார்.
தொடர்புடைய செய்திகள்
“இடமாற்றம் மற்றும் புதைகுழி பழுதுபார்ப்பு எப்போது நிறைவடையும் என்று என்னால் சொல்ல முடியாது. ஆனால் அதை விரைவில் முடிக்க முயற்சிப்போம்,” என்று அவர் மேலும் கூறினார்.