சீனக் கடற்படையின் சாதனை: மூன்றாவது விமானம் தாங்கி போர்க் கப்பல்

பெய்ஜிங்: உலகின் தலைசிறந்த கடற்படையாகத் திகழவேண்டும் என்ற சீனாவின் இலக்கை உறுதிசெய்யும் வகையில் அந்நாட்டின் ஆகப்பெரிய விமானந்தாங்கி போர்க்கப்பல் ராணுவச் சேவையில் அறிமுகமானது.

கடந்த புதன்கிழமை (நவம்பர் 5) நடந்த அதிகாரபூர்வ நிகழ்வில் சீன அதிபர் ஸி ஜிங்பிங் தலைமைதாங்கி, அதன் வரலாற்று முக்கியத்துவத்தை வெளிப்படுத்தினார்.

மின்காந்தத்தைக் கொண்டு தாக்குதல் நடத்தக்கூடிய தொழில்நுட்ப வல்லமைபெற்ற அந்த போர்க் கப்பல், சீனாவின் அதிநவீன வடிவமைப்புத் திறனையும் வட்டார வலிமையையும் உலகுக்கு பறைசாற்றுகிறது.

அமெரிக்கக் கடற்படையின் ஆதிகத்தைக் கட்டுக்குள் வைக்கக்கூடிய சீனாவின் இந்த ராணுவ முன்னேற்றம் இந்தோ பசிபிக் வட்டாரத்தையும் கடந்து உலகின் ஒட்டுமொத்தத் தற்காப்பையும் மறுஆய்வுக்கு உட்படுத்தியுள்ளது என்று நிபுணர்கள் கருத்துரைத்தனர்.

‘புஜியான்’ என்று பெயரிடப்பட்டுள்ள அந்த 80,000 டன் எடைகொண்ட பெருங்கப்பல் உலகிலேயே மூன்றாவது பெரிய விமானந் தாங்கி போர்க் கப்பலாகும். அமெரிக்காவின் ‘நிமிட்ஸ்’, ‘போர்ட்’ வகை போர்க் கப்பல்கள் 100,000 டன் எடைக்கும் மேற்பட்டு, முதல் இரண்டு இடங்களை வகிக்கின்றன. மேலும் அமெரிக்காவிடம் 11 விமானந் தாங்கி போர்க்கப்பல்கள் சேவையில் இயங்குகின்றன.

கடந்த 2023ஆம் ஆண்டு, பிரிட்டனில் உள்ள அனைத்துலக உத்திப்பூர்வ ஆய்வு கல்விக் கழகம் வெளியிட்ட தகவல்களின்படி, அமெரிக்காவின் கடற்படை 219 கப்பல்களைச் சேவையில் வைத்திருந்த நிலையில் சீனாவிடம் 234 கப்பல்கள் இருந்துள்ளன.

நீர்மூழ்கிக் கப்பல்களையும் உள்ளடக்கி உலகின் ஆகப் பெரிய கடற்படை ஏற்கெனவே சீனாவிடம் உள்ளது என்பதே உண்மை.