மாணவர் முரசு
இ-பேப்பர்
ஜகார்த்தா: இந்தோனீசியத் தலைநகர் ஜகார்த்தாவில் பள்ளிக்கூட வளாகத்தில் அமைந்திருந்த பள்ளிவாசலில் வெள்ளிக்கிழமை (நவம்பர் 7) நிகழ்ந்த இரண்டு வெடிப்பில் 55 பேர் காயமுற்றதாக அதிகாரிகள் தெரிவித்துள்ளனர். அவற்றுக்குக் காரணம் 17 வயது மாணவர் என்று சந்தேகிக்கப்படுகிறது.
வெடிப்புகள் நார்த் ஜகார்த்தா உயர்நிலைப் பள்ளியில் உள்ளூர் நேரப்படி பிற்பகல் 12.15 மணிக்கு ஏற்பட்டன. மாணவர்களிடையே அவை அதிகப் பதற்றத்தை ஏற்படுத்தின.
“பள்ளியில் உடனடியாகப் பெருங்குழப்பம் உண்டானது. அனைவரும் வகுப்பறைகளைவிட்டு வெளியேறித் திடலுக்குச் சென்றனர்,” என்று 16 வயது மாணவர் முகம்மது ரிஸ்கி முஸாஃபர் ஏஎஃப்பியிடம் தெரிவித்தார்.
“மாணவர்கள் பலர் காயமடைந்தனர். அவர்களில் அதிகமானோர் மருத்துவமனைக்குக் கொண்டுசெல்லப்பட்டனர்,” என்றார் அவர். பள்ளிக்கூட வளாகத்தில் உள்ள பள்ளிவாசலில் வெள்ளிக்கிழமை வழிபாடு தொடங்குவதற்கு முன்னர் வெடிப்பு நேர்ந்ததாகவும் அந்த மாணவர் குறிப்பிட்டார்.
காவல்துறையினர் வெடிப்புக்கான காரணத்தை விசாரித்து வருகின்றனர்.
கடற்படைக்குச் சொந்தமான நிலப்பகுதியில் பள்ளிக்கூடம் அமைந்துள்ளது. அங்கு ராணுவத்தினரும் ஓய்வுபெற்ற அதிகாரிகளும் அதிக எண்ணிக்கையில் வசிக்கின்றனர்.
மருத்துவமனைகளில் சேர்க்கப்பட்ட 55 பேரில் இன்னும் 33 பேருக்கு மருத்துவச் சிகிச்சை வழங்கப்படுவதாக ஜகார்த்தா காவல்துறையின் பேச்சாளர் புடி ஹெர்மான்ட்டோ கூறினார்.
சந்தேக நபர் ஒரு மாணவர் என்றும் காயமுற்ற அவருக்கு அறுவைச் சிகிச்சை மேற்கொள்ளப்படுகிறது என்றும் தேசியக் காவல்துறைத் தலைவர் தெரிவித்தார். பல்வேறு தகவல்களின் அடிப்படையில் சந்தேக நபரின் நோக்கத்தை அறிந்துகொள்ள முயல்வதாக அவர் சொன்னார்.
தொடர்புடைய செய்திகள்
அரசியல், பாதுகாப்பு ஒருங்கிணைப்புத் துணை அமைச்சர் லோட்விக் ஃபிரெட்ரிக் பாலஸ், எந்த உடனடி முடிவுக்கும் வரவேண்டாம் என்று பொதுமக்களைக் கேட்டுக்கொண்டார்.
“இது பயங்கரவாத நடவடிக்கை என்ற முடிவுக்கு வரவேண்டாம்,” என்று அவர் குறிப்பிட்டார்.
இந்தோனீசியாவில் தேவாலயங்களும் மேற்கத்திய இலக்குகளும் தாக்குதலுக்கு உள்ளாவது புதிதல்ல. ஆனால் பொதுவாகப் பள்ளிவாசல்கள் தாக்குதல்களில் குறிவைக்கப்படமாட்டா.
இந்நிலையில், இந்தோனீசியக் காவல்துறையினர் விசாரணையின்போது சந்தேகத்திற்குரிய வெடிமருந்துப் பொருள்களைக் கண்டுபிடித்துள்ளனர்.
சந்தேக நபரின் உடல்நிலை தேறிவருவதாகவும் காவல்துறைத் தலைவர் லிஸ்ட்டியோ சிகிட் பிரபோவோ சனிக்கிழமை (நவம்பர் 8) கூறினார்.
“சில தடயங்கள் கிடைத்துள்ளன. எழுதப்பட்ட சில குறிப்புகள் காணப்பட்டன. வெடிமருந்துப் பொருள்களும் கண்டெடுக்கப்பட்டன. அவற்றால் வெடிப்பு நிகழ்ந்திருக்கக்கூடும்,” என்றார் அவர்.
சமூக ஊடகம், குடும்பத்தார் எனப் பல வழிகளின் மூலம் தகவல்களைத் திரட்டுவதாகவும் அவர் தெரிவித்தார்.