மாணவர் முரசு
இ-பேப்பர்
காஸா நகரம்: இஸ்ரேலிய ராணுவம் மேலும் ஒரு சடலத்தை ஹமாஸ் குழுவிடமிருந்து பெற்றிருப்பதாகத் தெரிவித்துள்ளது.
அந்தச் சடலம், தென் காஸாவின் கான் யூனிஸ் வட்டாரத்தில் கண்டுபிடிக்கப்பட்டதாக ஹமாஸ் கூறியது. செம்பிறைச் சங்கத்தின் வழியாக இஸ்ரேலுக்கு அது அனுப்பிவைக்கப்பட்டுள்ளது.
இதற்கு முன்னர் ஹமாஸ், உயிருடன் இருந்த 20 பிணையாளிகளை இஸ்ரேலிடம் ஒப்படைத்தது. 28 சடலங்களில் 22ஐயும் அது இஸ்ரேலிடம் திருப்பிக் கொடுத்துள்ளது. எஞ்சிய ஆறு சடலங்களில் ஐந்து, இஸ்ரேலியர்களுடையவை. ஒன்று தாய்லாந்து நாட்டவருடையது.
எல்லாச் சடலங்களையும் கொடுக்காததற்காக ஹமாசை இஸ்ரேல் குறைகூறியது. இடிபாடுகளுக்கு இடையே அவர்களைக் கண்டுபிடிப்பது சிரமம் என்று ஹமாஸ் சொன்னது.
அமெரிக்கா முன்னெடுத்த சண்டை நிறுத்த உடன்பாட்டின்படி, முதற்கட்டத்தில் இஸ்ரேல், அதன் சிறைகளில் உள்ள 250 பாலஸ்தீனக் கைதிகளையும் காஸாவில் தடுத்துவைக்கப்பட்டிருந்த 1,718 பேரையும் விடுவித்தது.
இஸ்ரேலும் அதன் வசமிருந்த 285 பாலஸ்தீனர்களின் சடலங்களை ஒப்படைத்தது.
காஸா வட்டாரத்திற்கான உதவியைக் கூட்டுவது, இஸ்ரேலியப் படையில் ஒரு பகுதியினரை மீட்டுக்கொள்வது, சண்டையை நிறுத்துவது முதலியவை உடன்பாட்டில் இடம்பெற்றுள்ளன. ஆனால் உடன்பாட்டை மீறுவதாக இரு தரப்பும் ஒன்றை மற்றொன்று குறைகூறுகின்றன.
சென்ற மாதம் (அக்டோபர் 2025) 19ஆம் தேதி படை வீரர்கள் இருவரையும் அதற்கு அடுத்த நாள் படைவீரர் ஒருவரையும் ஹமாஸ் கொன்றதாக இஸ்ரேல் குற்றஞ்சாட்டியது. அவற்றுக்குப் பதிலடியாக இஸ்ரேல் வான்வழித் தாக்குதல்களை நடத்தியது.
தொடர்புடைய செய்திகள்
சண்டை நிறுத்தம் நடப்புக்கு வந்த பிறகு, இஸ்ரேலிய ராணுவ நடவடிக்கைகளில் 240க்கும் மேற்பட்டோர் மாண்டதாக ஹமாசின் சுகாதார அமைச்சு கூறுகிறது.