இந்தோனீசிய எரிமலைக் குமுறல்; செய்தியாளர்கள் ஐவரைக் காணவில்லை

ஜகார்த்தா: இந்தோனீசியாவின் அனாக் கிரக்கத்தாவ் எரிமலைக் குமுறலில் காணாமற்போன எட்டுப் பேரைத் தேடும் பணியில் அந்நாட்டின் மீட்புக் குழுக்கள் செவ்வாய்க்கிழமை (செப்டம்பர் 8) ஈடுபட்டன.

காணாமற்போனவர்களில் செய்தி வெளியிடச் சென்ற செய்தியாளர்கள் ஐவரும் அடங்குவர். இந்தோனீசிய தேசிய மீட்பு அமைப்பு இத்தகவல்களைத் தெரிவித்தது.

அந்தச் செய்தியாளர்க் குழு தலைநகர் ஜகார்த்தாவுக்கு அருகிலுள்ள பகுதியிலிருந்து திங்கட்கிழமை (செப்டம்பர் 7) ஒரு படகில் புறப்பட்டதாக அமைப்பு தெரிவித்தது. அவர்கள் இன்னும் திரும்பவில்லை என்றும் அந்தப் படகின் உரிமையாளருக்கு அவர்களிடமிருந்து தகவல் ஏதும் வரவில்லை என்றும் அமைப்பு குறிப்பிட்டது.

அந்த இந்தோனீசியச் செய்தியாளர்கள் ஐவரும் எரிமலை குமுறலைப் படமெடுக்க அப்பகுதிக்குச் சென்றனர்.

அனாக் கிரக்கத்தாவ் எரிமலை குமுறலால் இந்தோனீசியாவில் பல விமான நிலையங்கள் பெரிதும் பாதிக்கப்பட்டன. ஜகார்த்தா, அண்டை நகரங்கள் ஆகியவை எரிமலை சாம்பலால் ‘போர்த்தப்பட்டன’.

சம்பந்தப்பட்ட செய்தியாளர்கள் உள்ளூர், அனைத்துலக ஊடகங்களுக்கு வேலை செய்பவர்கள். இந்தோனீசிய அரசாங்கம் நடத்தும் அந்தாரா செய்தி நிறுவனம், இந்தோனீசிய இணையத்தளமான ஐநியூஸ், துருக்கிய அரசாங்கம் நடத்தும் அனாடோலு செய்தி நிறுவனம் ஆகியவறை அவற்றில் அடங்கும்.

தேடல் பணிகளில் மீட்புப் பணியாளர்கள், காவல்துறையினர், சம்பந்தப்பட்ட படகுக்கு உரிமை வகிக்கும் நிறுவனம் ஆகிய தரப்புகள் ஈடுபட்டன.