மலேசிய தேசிய தினக் கொண்டாட்டம்: முக்கியச் சுற்றுலாத் தலங்களை வெளிப்படுத்திய அலங்கார ஊர்திகள்

கோலாலம்பூர்: மலேசியாவின் தேசிய தினக் கொண்டாட்டம் திங்கட்கிழமை (ஆகஸ்ட் 31) காலை கோலாகலமாகத் தொடங்கியது.

இந்தக் கொண்டாட்டத்தில் மலேசியாவின் முக்கியச் சுற்றுலாத் தலங்களை வெளிப்படுத்திய வண்ணமயமான அலங்கார ஊர்திகள் அணிவகுத்துச் சென்றன.

தேசிய, இயற்கையும் பாரம்பரியமும் இதில் பிரமிக்க வைக்கும் வகையில் காட்சிப்படுத்தப்பட்டன என்று த ஸ்டார் ஊடகம் தகவல் தெரிவித்தது.

அலங்கார ஊர்திகளில் மலேசிய மழைக்காடுகளின் மறுவடிவமைப்புகளும், கொடிகளுக்கு இடையே வீற்றிருக்கும் மலேசிய தேசியப் பறவையான ‘ஹோர்ன்பில்’ உருவமும் இடம்பெற்றிருந்தன.

ஊர்திகள் கினபாலு மலை போன்ற மலேசியாவின் மிகவும் பிரபலமான இயற்கை சுற்றுலாத் தலங்கள் பலவற்றையும் வெளிப்படுத்தின.

‘விசிட் மலேசியா 2026’ பிரசாரத்தின் அதிகாரபூர்வச் சின்னங்களான விரா, மன்ஜா இரண்டும் பெரிய ஊர்தி ஒன்றில் இருந்து பொதுமக்களை நோக்கி கையசைத்துக் கொண்டே சென்றன.

இது மக்களிடையே பேரார்வத்தை எழுப்பியது.

முன்னதாக, முக்கிய விருந்தினர்களான மலேசிய மாமன்னர் சுல்தான் இப்ராகிம், மலேசிய அரசியார் ராஜா ஸரித் சோஃபியா இருவரின் வருகையைத் தொடர்ந்து, 2026 தேசிய தினக் கொண்டாட்ட அணிவகுப்பு அதிகாரபூர்வமாகத் தொடங்கியது.

இவையும் உங்களுக்குப் பிடிக்கலாம்

அனைத்துவகைச் செய்திகளும் ஒரே இடத்தில்.

பிரியங்கா காந்தியின் மகன் ரெஹான் வதேராவின் கண்காட்சியில் சர்ச்சை

22 Oct 2026 - 10:23 PM

வேலைச் செலவினம் தொடர்பில் 3,000க்கு மேற்பட்டோர் தவறான தகவல் சமர்ப்பிப்பு

22 Oct 2026 - 4:15 PM

உலகின் சிறந்த விமான நிறுவனம் விருதை வென்ற எஸ்ஐஏ

22 Oct 2026 - 9:00 PM

இலவச முகக்கவசங்களை 22% மட்டுமே பெற்றுக்கொண்டனர்: புகைமூட்டப் பணிக்குழு

22 Oct 2026 - 8:08 PM

காலை 8 மணிக்கு வருகையளித்த மன்னர் தம்பதியரை பிரதமர் அன்வார் இப்ராகிம் வரவேற்றார். மன்னர் தம்பதியர் அரச மரியாதையுடனும் தேசிய கீதத்துடனும் வரவேற்கப்பட்டனர்.

அதன் பின்னர் சுல்தான் இப்ராகிம் அணிவகுப்பைப் பார்வையிட்டார்.

சுங்கை பெசி பெர்டானா முகாமைச் சேர்ந்த முதலாவது அரச மலாய் படைப்பிரிவின் நான்கு அதிகாரிகள், 103 வீரர்களைக் கொண்ட முதன்மை அணிவகுப்புப் படையினரிடமிருந்து அரச மரியாதையை மாமன்னர் பெற்றுக்கொண்டார்.

புத்ராஜெயா வான்வெளியில் ஜாலூர் கெமிலாங் (தேசியக் கொடி), ஆயுதப்படைகள், ராணுவம், மலேசியக் கடற்படை, மலேசிய விமானப்படை ஆகியவற்றின் கொடிகளுடன் அலங்கரிக்கப்பட்ட ஐந்து ஹெலிகாப்டர்களின் வான்வழி சாகசம் இடம்பெற்றது.

41வது அரச பீரங்கிப் படைப்பிரிவினரின் 14 குண்டுகள் முழங்க, ஜாலூர் கெமிலாங் கொடி ஏற்றப்பட்டு தேசிய கீதம் மீண்டும் இசைக்கப்பட்டது.

தீயணைப்பு, மீட்புத் துறையின் துணை ஆணையர் அப்துல் ரசாக் மூடா தலைமையில், தீயணைப்பு, மீட்புத் துறையின் 69 பணியாளர்களுடன் சைகை மொழி மொழிபெயர்ப்பாளர் நூர் அலியா நடாஷாவும் இணைந்து பற்றுறுதி எடுத்துக்கொள்ளும் நிகழ்வு நடைபெற்றது.

அதனைத் தொடர்ந்து தேசிய தினக் கொண்டாட்டத்தின் பல அங்கங்கள் தொடர்ந்தன.

தொடர்பு அமைச்சின் ‘உப்பின் & இப்பின்’ அலங்கார ஊர்தி பார்வையாளர்களை வெகுவாகக் கவர்ந்தது. தங்களுக்குப் பிடித்தமான கேலிச்சித்திரக் கதாபாத்திரங்களைக் கண்ட குழந்தைகள் ஆரவாரத்துடன் மகிழ்ச்சியை வெளிப்படுத்தினர்.

வெயிலையும் பொருட்படுத்தாமல் மலேசிய அரச காவல் துறையின் ‘கே9’ மோப்ப நாய்கள் தங்களை வழிநடத்துபவர்களுடன் அமைதியாக அணிவகுத்துச் சென்றபோது, ஆயிரக்கணக்கான மக்கள் ஆரவாரம் செய்து தங்களது கைகளை அசைத்தனர்.

புத்ராஜெயா சதுக்கத்தில் நடைபெற்ற தேசிய தினக் கொண்டாட்டத்தில் கலந்துகொண்ட, பங்கேற்ற அனைவருக்கும் பிரதமர் அன்வார் இப்ராகிம் பாராட்டும் நன்றியும் தெரிவித்துக் கொண்டார்.

அங்கு திரண்டிருந்த மக்களுடன் அவர் கலந்துரையாடினார். புகைப்படம் எடுக்க விரும்பிய மக்களின் விருப்பத்தையும் அவர் பூர்த்தி செய்தார்.