மாணவர் முரசு
இ-பேப்பர்
சான் சால்வடோர்: இந்தியா அல்லது ஆப்பிரிக்காவில் இருந்து வரும் பயணிகளுக்கு மத்திய அமெரிக்க நாடான எல் சால்வடோர் 1,000 அமெரிக்க டாலர் (ரூ.80,000க்கு மேல்) கட்டணம் விதிக்கிறது. வரியைச் சேர்த்து, கட்டணம் 1,130 டாலராக இருக்கும்.
எல் சால்வடோர் வழியாக அமெரிக்காவுக்குப் புலம்பெயர்வோர் எண்ணிக்கையைக் கட்டுப்படுத்தும் நோக்கில் இந்த நடவடிக்கை எடுக்கப்படுவதாக டைம்ஸ் ஆஃப் இந்தியா செய்தி நிறுவனம் தெரிவித்தது.
இந்தியக் கடப்பிதழில் அல்லது 50க்கும் மேற்பட்ட ஆப்பிரிக்க நாடுகளில் ஏதேனும் ஒன்றின் கடப்பிதழில் பயணம் செய்வோர் இக்கட்டணம் செலுத்த வேண்டும் என்று எல் சால்வடோர் துறைமுக ஆணையம் அதன் இணையப் பக்கத்தில் அக்டோபர் 20ஆம் தேதி குறிப்பிட்டது.
அக்டோபர் 23ஆம் தேதி இக்கட்டண முறை நடப்புக்கு வந்ததாக ஆணையம் கூறியது.
கட்டண வசூல் மூலம் திரட்டப்படும் நிதி, நாட்டின் பிரதான அனைத்துலக விமான நிலையத்தை மேம்படுத்த பயன்படுத்தப்படும் என்று ஆணையம் தெரிவித்தது.
செப்டம்பரில் முடிவடைந்த 2023 நிதியாண்டில், அமெரிக்க சுங்கத்துறை மற்றும் எல்லைச் சுற்றுக்காவல் பிரிவு சாதனை அளவாக 3.2 மில்லியன் குடியேறிகளைப் பதிவு செய்தது.
ஆப்பிரிக்காவில் இருந்தும் மற்ற பகுதிகளில் இருந்தும் மத்திய அமெரிக்கா வழியாக ஏராளமான குடியேறிகள் அமெரிக்காவுக்கு நுழைகின்றனர்.
ஆப்பிரிக்காவைச் சேர்ந்த 57 நாடுகளில் இருந்தும் இந்தியாவில் இருந்தும் வரும் பயணிகளின் விவரம் குறித்து எல் சால்வடோர் அதிகாரிகளிடம் விமான நிறுவனங்கள் அன்றாடம் தெரியப்படுத்த வேண்டும்.
