மாணவர் முரசு
இ-பேப்பர்
பெட்டாலிங் ஜெயா: அமெரிக்காவின் சமரச முயற்சியால் எட்டப்பட்ட சண்டை நிறுத்த உடன்பாட்டை முழுமையாகச் செயல்படுத்துவதில் உறுதியாக இருப்பதாகத் தாய்லாந்து, கம்போடியா, அமெரிக்கா, மலேசியா ஆகிய நாடுகளின் தலைவர்கள் தெரிவித்துள்ளனர்.
கடந்த மாதம் கோலாலம்பூரில் நடந்த 47வது ஆசியான் உச்சநிலை மாநாட்டில், அமெரிக்க அதிபர் டோனல்ட் டிரம்ப், மலேசியப் பிரதமர் அன்வார் இப்ராகிம் ஆகியோரின் முன்னிலையில் தாய்லாந்தும் கம்போடியாவும் அமைதி உடன்படிக்கையில் கையெழுத்திட்டன.
அவ்விரு நாடுகளுக்கும் இடையே இந்த வாரம் எல்லைப் பதற்றம் மீண்டும் தலைதூக்கியதால் மேற்குறிப்பிட்ட அறிவிப்பு வெளியாகியுள்ளது.
தாய்லாந்து பிரதமர் அனுடின் சார்ன்விரகுல், கம்போடியப் பிரதமர் ஹுன் மானெட், மலேசியப் பிரதமர் அன்வார், அமெரிக்க அதிபர் டிரம்ப் ஆகியோர் அண்மையப் பூசல் குறித்து தொலைபேசி மூலம் கலந்துரையாடினர்.
அதில், எந்தவொரு வர்த்தகப் பேச்சுவார்த்தையையும் நிறுத்தாமல், கண்ணிவெடிகளை அகற்றுவதில் விரைந்து செயல்பட தலைவர்கள் அனைவரும் ஒப்புக்கொண்டதாக ஞாயிற்றுக்கிழமை (நவம்பர் 16) வெளியிட்ட தமது சமூக ஊடகப் பதிவில் மலேசியப் பிரதமர் கூறினார்.
மேலும், “இந்தப் பிரச்சினையைத் தீர்ப்பதில் முனைப்புகாட்டிய அமெரிக்க அதிபரை நான் பாராட்டுகிறேன்,” என்றார் திரு அன்வார்.
சண்டை நிறுத்தத்தைத் தற்காலிகமாய்க் கைவிடுவதாகத் தாய்லாந்து இந்த வாரம் அறிவித்தது. கம்போடியா வைத்த புதிய கண்ணிவெடிகளில் தனது படைவீரர்கள் காயமுற்றதாகக் குற்றஞ்சாட்டியது தாய்லாந்து.
அது மன்னிப்புக் கேட்கவேண்டும் என்கிறது பேங்காக். ஆனால், அதனை மறுக்கிறது நோம் பென்.
தொடர்புடைய செய்திகள்
இதற்கிடையே, தாய்லாந்து, அமெரிக்காவுடனான வர்த்தகப் பேச்சு தொடரும் என்று கூறியுள்ளது. தனக்கும் கம்போடியாவுக்கும் இடையிலான எல்லைப் பூசலுக்கும் அதற்கும் தொடர்பில்லை என்று தாய்லாந்து சனிக்கிழமை (நவம்பர் 15) தெரிவித்தது.
இருதரப்பு வர்த்தகக் கட்டமைப்பைப் பற்றி வாஷிங்டனும் பேங்காக்கும் சென்ற மாதம் (அக்டோபர் 2025) அறிவித்தன. அதன்படி, தாய்லாந்துப் பொருள்களுக்கு அமெரிக்கா 19 தீர்வையை விதிக்கும்.
மற்ற சில பொருள்களுக்குத் தீர்வையை அறவே அகற்றுவது குறித்தும் அமெரிக்கா யோசித்து வருகிறது.