மாணவர் முரசு
இ-பேப்பர்
வாஷிங்டன்: அமெரிக்க நிதி அமைச்சர் ஸ்காட் பெசென்ட், சீனாவுடன் அரிய வகைக் கனிமவளங்கள் குறித்த உடன்பாடு விரைவில் கைகூடும் என்று கூறியிருக்கிறார். இம்மாத (நவம்பர் 2025) இறுதிக்குள் அது சாத்தியமாகும் என்று அவர் நம்பிக்கை தெரிவித்தார்.
அமெரிக்க அதிபர் டோனல்ட் டிரம்ப்பும் சீன அதிபர் ஸி ஜின்பிங்கும் சென்ற மாத இறுதியில் தென்கொரியாவில் சந்தித்துப் பேசினர். அப்போது அரியவகைக் கனிமவளங்கள் குறித்து உத்தேச உடன்பாடு எட்டப்பட்டது. அதன்படி, குறிப்பிட்ட சிலவகைத் தாதுப்பொருள்களுக்கான ஏற்றுமதித் தடையை ஓராண்டுக்கு நிறுத்திவைக்கப் பெய்ஜிங் ஒப்புக்கொண்டது.
அரியவகைக் கனிமவளங்களைப் பொறுத்தவரை உலக அளவில் ஆதிக்கம் செலுத்துகிறது சீனா. மோட்டார்வாகனம், மின்னணு, தற்காப்பு உள்ளிட்ட தொழில்துறைகளுக்குத் தேவையான மின்னணுப் பொருள்களைத் தயாரிப்பதில் அவை அத்தியாவசியமானவை.
“உடன்பாட்டின் விவரங்களை இன்னும் முடிவுசெய்யவில்லை. நன்றிதெரிவிக்கும் நாளுக்குள் அதை எட்டிவிடுவோம் என்ற நம்பிக்கை உள்ளது,” என்று ஃபாக்ஸ் செய்தி ஊடகத்திடம் திரு பெசென்ட் ஞாயிற்றுக்கிழமை (நவம்பர் 16) கூறினார்.
“இரு நாடுகளின் அதிபர்களுக்கும் இடையில் கொரியாவில் நடைபெற்ற பேச்சுக்குப் பிறகு, சீனா உடன்பாடுகளை மதித்து நடக்கும் என்று நம்புகிறோம்,” என்றார் அவர்.
ஆனால் பெய்ஜிங் அவ்வாறு செய்யவில்லை என்றால், பதிலடி கொடுக்க அமெரிக்காவுக்குப் பல வழிகள் உள்ளன என்றார் திரு பெசென்ட்.
உடன்பாட்டின்படி, அரியவகைக் கனிமங்கள் ஏப்ரல் 4ஆம் தேதிக்கு முன்பு எவ்வாறு தடையின்றிச் சென்றனவோ அதே நிலைக்குத் திரும்பும் என்று அமெரிக்க நிதியமைச்சர் உறுதியளித்தார். திரு டிரம்ப் நிர்வாகம் அப்போது அதிரடியாய்த் தீர்வைகளை விதித்ததைத் தொடர்ந்து சீனாவும் கனிமவள ஏற்றுமதிக்குத் தடைவிதித்தது.
இரு நாடுகளின் அதிபர்களும் இணங்கியபடி, வாஷிங்டன், சீனப் பொருள்களுக்கான தீர்வையைக் குறைக்கும். பதிலுக்கு, பெய்ஜிங், அமெரிக்காவிடமிருந்து 2025ஆம் ஆண்டுக்குள் குறைந்தது 12 மில்லியன் டன் சோயாபீன்சையும் 2026ல் 25 மில்லியன் டன் சோயாபீன்சையும் வாங்கும்.
