மாணவர் முரசு
இ-பேப்பர்
புத்ரஜெயா: சீனாவிலிருந்து மலேசியாவுக்கு விசா இன்றி பயணம் செய்யும் நடைமுறை அடுத்த ஐந்து ஆண்டுகளுக்கு நீடிக்கப்பட்டுள்ளது. அந்த ஐந்து ஆண்டுகளில் மலேசியப் பயணிகளும் விசா இன்றி சீனாவுக்குச் செல்ல முடியும்.
நடப்பிலிருக்கும் விசா இல்லாப் பயண நடைமுறையை மலேசியாவும் சீனாவும் நீட்டிப்பது தென்கிழக்காசிய நாடுகளின் பொருளியலுக்கு நன்மை தரும் என்று நிபுணர்கள் குறிப்பிட்டனர்.
சீன அதிபர் ஸி ஜின்பிங் ஏப்ரல் 16ஆம் தேதி மலேசியா சென்றிருந்தபோது புதிய இருதரப்பு ஒப்பந்தத்துடன் மொத்தம் 31 இணக்கக் குறிப்புகளும் கையெழுத்தாயின.
அப்போது செய்யப்பட்ட ஒப்பந்தங்களில் ஒன்று புதிய விசா நடைமுறை.
“அதைக் கூடுதலாக ஐந்தாண்டுகளுக்கு நீட்டிக்க ஒப்புக்கொண்டோம். அது முடிந்த பிறகு மீண்டும் ஐந்தாண்டுக்கு நீட்டிப்பதற்கான வாய்ப்புக்கும் இணக்கம் தெரிவிக்கப்பட்டது,” என்று மலேசிய உள்துறை அமைச்சர் சைஃபுடின் நசுத்தியன் இஸ்மாயில் தெரிவித்தார்.
விசா இல்லாத நடைமுறையால் சீனப் பயணிகள் 90 நாள்கள்வரை மலேசியாவில் தங்க முடியும். அதே போன்ற ஏற்பாட்டை மலேசியர்களுக்கும் சீனா வழங்கியுள்ளது என்றார் அவர்.
அந்த நடைமுறை பொருளியல் வளர்ச்சியை ஊக்குவிக்கிறது என்ற திரு சைஃபுடின், சீனாவிலிருந்து வரும் சுற்றுப்பயணிகள் எண்ணிக்கை கணிசமாக உயர்ந்துள்ளதையும் சுட்டிக்காட்டினார்.
ஏப்ரல் மாத நிலவரப்படி இவ்வாண்டு இதுவரை 900,000 சுற்றுப்பயணிகள் சீனாவிலிருந்து மலேசியா சென்றுள்ளனர்.
தொடர்புடைய செய்திகள்
அது, விசா இல்லா நடைமுறையைத் தொடர மலேசிய அரசாங்கத்தை ஊக்குவிக்கிறது என்று திரு சைஃபுடின் குறிப்பிட்டார்.