சீனாவின் பல பகுதிகளில் ஒலிக்கும் திருமண மணியோசை

பனிமலைச் சிகரங்கள், ரயில் நிலையங்கள், இரவு கேளிக்கை விடுதிகள் என சீனாவின் பல இடங்களில் மக்கள் திருமணச் சடங்குகளை நடத்திவருகின்றனர்.

அதற்கு முக்கியக் காரணம், திருமணங்கள் தம்பதிகள் குடியிருக்கும் இடங்களில் மட்டுமே நடத்தமுடியும் என்று நடப்பில் இருந்த விதியை கடந்த மே மாதம் சீன அரசாங்கம் தளர்த்தியதுதான்.

திருமணங்கள் ஏற்பாடு செய்வதில் இருந்த கட்டுப்பாடுகள் நீங்கி அது எளிதாகவும் இயல்பாகவும் விருப்பத்திற்கேற்ப ஏற்பாடு செய்துகொள்ளும் விதமாகவும் மாற்றப்பட்டுள்ளது. சீன நாட்டில் பிறப்பு விகிதத்தை அதிகரிக்க அரசாங்கம் மேற்கொள்ளும் நடவடிக்கையில் இதுவும் ஒன்று.

உள்ளூர் அரசாங்க அலுவலகங்கள், திருமணப் பதிவுக்கென வசதிகளை ஏற்பாடு செய்துவருகின்றன. பூங்காக்கள், பெரிய சில்லறை விற்பனைப் பேரங்காடிகள், சுற்றுலாத் தலங்கள், இசை விழாக்கள், ரயில் நிலையங்கள் என பல பகுதிகளிலும் அதிகாரிகள் தம்பதிகளுக்கு திருமணப் பதிவு செய்துவைக்க உதவி வருகின்றனர்.

அந்த முயற்சிகள் திருவினையாகி வருகின்றன. அதற்கு சான்றாக அரசாங்கப் புள்ளி விவரங்கள் வெளியிடப்பட்டுள்ளன. குழந்தைப் பிறப்புகளுக்கு சீன அரசாங்கம் திருமணப் பதிவுகளையே பயன்படுத்துகிறது.

அதன்படி, இவ்வாண்டின் மூன்றாம் காலாண்டில் 1.61 மில்லியன் திருமணங்கள் நடந்துள்ளன. இது 2024ஆம் ஆண்டுடன் ஒப்பிடுகையில் 22.5 விழுக்காடு அதிகம். கடந்த பத்து ஆண்டுகளில் கீழ்நோக்கிச் சென்றுகொண்டிருந்த திருமண விகிதத்தை இது வரலாறு காணாத அளவில் நிலைநிறுத்தியுள்ளது.

குறிப்பிட்ட இடங்களில் மட்டுமே திருமணத்தை ஏற்பாடு செய்யாமல் அவரவர் கற்பனைக்கும் வசதிக்கும் ஏற்ப அதனை செய்துகொள்வது சீனாவில் புதிய வசந்த காலத்தை உருவாக்கியுள்ளது என்பது பலரின் கருத்து.

இருப்பினும், உணர்வுகளுக்கு மட்டும் இடங்கொடுக்காமல் கல்வியிலும் பொருளியலிலும் உயர்ந்தபின் பிறகு திருமண உறவைப் பரிசீலிக்க வேண்டும் எனவும் சில சீனர்கள் கருதுகின்றனர்.