எனது பேட்டியை விஜய்க்கு எதிராகக் கட்டமைக்க வேண்டாம்: அஜித்

கரூரில் விஜய்யின் தமிழக வெற்றிக் கழக பிரசாரத்தின்போது ஏற்பட்ட கூட்ட நெரிசல் சம்பவம் குறித்து அண்மையில் ஆங்கில ஊடகம் ஒன்றுக்கு தாம் அளித்திருந்த பேட்டியை விஜய்க்கு எதிராகக் கட்டமைக்க நினைப்பவர்கள் அமைதியாக இருப்பது நல்லது என்று நடிகர் அஜித் குமார் கூறியுள்ளார்.

கரூர் கூட்ட நெரிசல் சம்பவம் குறித்து எழுப்பப்பட்ட கேள்விக்கு அஜித் அளித்த பதில், தமிழக அரசியல் களத்தில் விவாதிக்கப்பட்டு வந்த நிலையில், அதுபற்றி விளக்கமளித்து அவர் மற்றொரு பேட்டி அளித்துள்ளார்.

‘அரசியல் மயமான சினிமா செய்தியாளர்கள்’

“ஆங்கில ஊடகத்திற்கு நான் அளித்திருந்த பேட்டி, இளையர்களுக்கு நல்ல செய்தியைக் கொண்டு சேர்ப்பதற்குப் பதிலாக, ஒருசிலரால் தங்களுக்குச் சாதகமாகப் பயன்படுத்தப்பட்டுள்ளது பற்றி எனக்குத் தெரியும்.

“இங்கே எதையெடுத்தாலும் சர்ச்சையாகத்தான் பார்ப்பார்கள். நேர்மறையான எண்ணங்களுடன் எனக்குப் பிடித்த பாதையில் செல்லவே நான் விரும்புகிறேன். ஒரு காலத்தில் சினிமா செய்தியாளர், விளையாட்டுச் செய்தியாளர், அரசியல் செய்தியாளர் என இருந்தனர். ஆனால் இன்று, அரசியல் செய்தியாளர்களைவிட ஒருசில சினிமா செய்தியாளர்களே அரசியல் மயமாகியுள்ளனர்,” என்று சொன்ன அஜித், தமது நல்ல எண்ணங்கள் சில ஊடகங்களால் சரியாகக் கொண்டு சேர்க்கப்படவில்லை என வருத்தம் தெரிவித்தார்.

சிலர் இதை அஜித்-விஜய் இடையிலான மோதல், இருவரின் ரசிகர்களுக்கும் இடையிலான போர் என்பதுபோல ஆகிவிட்டதாக அவர் சொன்னார்.

கரூர் சம்பவம் தொடர்பில் ஒரு சில ஊடகங்கள் ரசிகர்கள்மீது பழிசுமத்த முற்படுவதாகக் குறிப்பிட்ட அஜித், அதற்கு ஒரு சம்பவத்தைப் பற்றிக் கூற விரும்பினார்.

“என் தந்தை இறந்த பின், அவரது உடலை எடுத்துச் சென்றபோது ஒரு சில ஊடகங்கள் புகைப்படக் கருவிகளுடன் எங்களைப் பின்தொடர்ந்தனர். உயிரில்லாத அந்த உடலைக் காணொளி எடுக்க அவர்கள் முற்பட்டனர். இதனால் அங்கிருந்த ஒவ்வொருவரும் தங்களுடைய உயிரைப் பணயம் வைக்க நேரிட்டது,” என அவர் நினைவுகூர்ந்தார்.

“ஒரு சில ஊடகங்களே இப்படி இருக்க, ரசிகர்களையோ கட்சித் தொண்டர்களையோ குறைகூற என்ன உரிமை இருக்கிறது? ஏற்கெனவே சொன்னதுபோல, நானும் குற்றத்திற்குப் பொறுப்பானவன்தான், என்னிடமும் தவறுகள் உள்ளன. நாம் அனைவரும் குடிமக்களின் கடமையை உணர்ந்து அதைப் பின்பற்ற வேண்டும்,” என்று சொன்ன அஜித், வாக்களிப்பதை தாம் ஒரு குடிமகனின் கடமையாகப் பார்ப்பதாகக் கூறினார்.

தொடர்புடைய செய்திகள்

கரூர் துயரச் சம்பவம்: விஜய்க்கு ஆதரவாக குரல் கொடுத்த அஜித்

கரூர் சம்பவம் குறித்து அஜித் சொன்னது சொந்தக் கருத்து: உதயநிதி

‘விஜய்க்கு நல்லதையே நினைப்பேன்’

தாம் விஜய்க்கு எப்போதும் நல்லதை மட்டுமே நினைத்திருப்பதாகவும் வாழ்த்தியிருப்பதாகவும் சொன்ன அஜித், “எல்லோரும் அவர்கள் குடும்பங்களுடன் மகிழ்ச்சியான வாழ்க்கையை வாழ நான் வாழ்த்துகிறேன்,” என்றார்.