நீரிழிவை எதிர்கொள்ளும் இரண்டு வாழ்க்கைச் சக்கரங்கள்

ஒவ்வோர் ஆண்டும் நவம்பர் 14ஆம் தேதி கடைப்பிடிக்கப்படும் உலக நீரிழிவு தினம், உலகளாவிய பொதுச் சுகாதார மருத்துவ நிலையான நீரிழிவின் அபாயம் குறித்த விழிப்புணர்வை ஏற்படுத்துகிறது.

நீரிழிவுக்கு எதிரான போராட்டத்தையும் தங்கள் அன்றாட வாழ்க்கையைச் சமாளிக்கும் இருவரின் உணர்வுபூர்வமான பயணங்களையும் இக்கட்டுரை ஆராய்கிறது.

இளம்பருவத்தில் தண்ணீரை விட இனிப்புப் பானங்களை அதிகம் பருகி வந்த நவீன் நம்பியார், எதிர்காலத்தில் நீரிழிவு தன் வாழ்க்கையைப் புரட்டிப்போடும் என்பதை எதிர்பார்க்கவில்லை.

ஏழு ஆண்டுகளுக்கு முன்பு தயார்நிலை தேசிய சேவையாளர் பயிற்சிக்குச் செல்ல வேண்டியபோது நவீனுக்கு மருத்துவப் பரிசோதனை செய்யப்பட்டது.

அப்போது மருத்துவர் தம்மிடம் கூறிய செய்தியைக் கேட்டு நவீன் இடிந்துபோனார்.

தமக்கு இரண்டாம் வகை நீரிழிவு உள்ளது என்றும் உடனடியாக வாழ்க்கைமுறையில் மாற்றங்கள் செய்யாவிட்டால் அது தீங்கிழைக்கும் என்றும் மருத்துவர் கூறியது இன்றும் நவீனின் காதுகளில் ஒலிக்கின்றன.

தற்போது 44 வயதாகும் நவீன், 30களின் நடுப்பகுதியில் தமக்கு நீரிழிவு ஏற்பட்டதை நினைத்து வருந்தினார்.

“என் பிள்ளைகளின் திருமணத்திற்கு நான் உயிருடன் இருப்பேனா என்றெல்லாம் என்னை நினைக்க வைத்தது நீரிழிவு,” என்று சோகம் ததும்பிய குரலில் சொன்னார் நவீன்.

தொடர்புடைய செய்திகள்

நீரிழிவைத் தடுக்கும் மத்திய தரைக்கடல் உணவுப் பழக்கம்

விளையாட்டுகள், உடற்பயிற்சி என சுறுசுறுப்பாக இருந்தாலும் தமக்கு நீரிழிவு இருப்பதால் வாழ்க்கைமுறையை தகவமைத்துக்கொள்ள வேண்டிய நிலை இவருக்கு ஏற்பட்டது.

தம் தந்தைக்கும் நீரழிவு இருப்பதாகக் கூறிய நவீன், ஆரோக்கியமான உணவு வகைகளைச் சாப்பிடுவது, போதுமான அளவு தண்ணீர் பருகுவது என மெதுமெதுவாக மாற்றங்களைப் பின்பற்றி வருகிறார்.

இரண்டு பிள்ளைகளுக்குத் தந்தையான இவர், சுயதொழில் புரிவதுடன் நன்யாங் பலதுறைத் தொழிற்கல்லூரியில் துணை விரிவுரையாளராகவும் இருக்கிறார்.

ரத்தத்தில் அன்றாடம் சர்க்கரை அளவைக் கண்காணிக்க ‘டெக்ஸ்கோம்’ எனும் கருவியை இவர் பயன்படுத்துகிறார்.

இது தோல்மீது ஒட்டக்கூடிய பட்டை போன்ற ஒரு கருவியாகும். ரத்த சர்க்கரை அளவை தினமும் 280 முறை வரை அளவீடுகளை வழங்குவதோடு இது 24 மணி நேரமும் செயல்படக்கூடியது.

தம் நண்பர்கள் அக்கருவியைப் பரிந்துரைத்ததாகச் சொன்ன நவீன், அதைப் பயன்படுத்தத் தொடங்கியவுடன் வாழ்க்கை மாறியதாகச் சொன்னார்.

“இந்தக் கருவியில் எந்நேரமும் என் ரத்த சர்க்கரை அளவு காட்டப்படும். இதனால், என்னால் எந்த உணவை உட்கொண்டால் ரத்த சர்க்கரை அளவு அதிகரிக்கிறது அல்லது குறைகிறது என்பதை எளிதில் கண்காணிக்க முடியும்,” என்றார் நவீன்.

தமக்கு மனைவியும் பிள்ளைகளும் பேராதரவாக இருப்பதாகவும், தற்போது தன்னால் முடிந்தவரை துடிப்பான வாழ்க்கைமுறையை மேற்கொண்டு ஆரோக்கியமான உணவு வகைகளைச் சாப்பிடும் பழக்கத்தைப் பின்பற்றி வருவதாகவும் சொல்கிறார் இவர்.

வயது பாராமல் பலரையும் பாதிக்கும் ஒரு மருத்துவ நிலையாக நீரிழிவு இருப்பதால், ஆண்டுக்கு ஒருமுறையாவது மருத்துவப் பரிசோதனைக்குச் செல்லும்படி இளையர்களுக்கு நவீன் அறிவுறுத்துகிறார்.

அண்மைய தேசிய மக்கள் சுகாதாரக் கணக்கெடுப்பின்படி, கடந்த நான்கு ஆண்டுகளில் சிங்கப்பூரில் நீரிழிவு பாதிப்பு 8.5 விழுக்காட்டிலிருந்து 9.1 விழுக்காடாக உயர்ந்துள்ளது.

வரும் ஆண்டுகளில் சிங்கப்பூரில் ஒரு மில்லியன் பேர் நீரிழிவுடன் வாழ நேரிடலாம் என்று சுகாதார அமைச்சு கணித்துள்ள நிலையில், நீரிழிவு பாதிப்பை எதிர்கொள்ள அவசரமாகச் செயல்பட வேண்டியுள்ளது.

நாட்பட்ட நோய்களைப் பொறுத்தமட்டில், 2020ல் இந்தியர்களிடம் நீரிழிவு பாதிப்பு 14.2 விழுக்காடாக இருந்தது. இது, சீனர்களிடம் இருந்த 8.2 விழுக்காட்டைவிட அதிகம்.

சிங்கப்பூரில் நீரிழிவுக்கு எதிரான போராட்டத்தை முன்னெடுக்கும் ஒரே அமைப்பு என்ற வகையில், சிங்கப்பூர் நீரிழிவு அமைப்பு தன் இலக்கில் உறுதியாக உள்ளதாக அதன் நிர்வாக இயக்குநர் பிரசில்லா கான் கூறினார்.

“நீரிழிவு பராமரிப்பு, கல்வி, தடுப்பு ஆகியவற்றில் எங்கள் முயற்சிகளைத் தீவிரப்படுத்த நாங்கள் கடமைப்பட்டுள்ளோம். தனிநபர்களுக்கு நீரிழிவைச் சமாளிக்க அல்லது தடுக்க தேவையான புரிதலையும் ஆதரவையும் அளிப்பதும் ஆரோக்கியமான, மீள்தன்மை கொண்ட நாட்டைக் கட்டமைப்பதும் எங்கள் குறிக்கோள்,” என்றார் அவர்.

நீரிழிவுடன் வாழப் பழகிக்கொண்டார்

தற்போது 76 வயதாகும் திருவாட்டி இளங்கோவன் குமுதவல்லிக்கு, 30 ஆண்டுகளுக்கும் மேலாக நீரிழிவு பாதிப்புள்ளது.

நீரிழிவு வந்துவிட்டதே என்று முடங்கிவிடாமல் அதை ஏற்று அதோடு வாழ இவர் பழகிக்கொண்டார்.

தம் பெற்றோருக்கு நீரிழிவு இருந்ததால் தமக்கும் அப்பாதிப்பு ஏற்பட சாத்தியம் இருந்ததை நினைவுகூர்ந்த இவர், நீரிழிவு ஏற்பட்ட பிறகு வாழ்க்கையை மாற்றக் கற்றுக்கொண்டார்.

ஆரோக்கியமாகச் சாப்பிடுவது, வயதானாலும் உடற்பயிற்சியைத் தொடர்வது போன்றவை குமுதவல்லியின் தாரக மந்திரம்.

ரேஸ் கோர்ஸ் சாலையில் அமைந்துள்ள ஸ்ரீ நாராயண மிஷன் துடிப்பான மூப்படைதல் நிலையத்தில் வாரத்திற்கு மூன்று முறை திருவாட்டி குமுதவல்லி இதர மூத்தோருடன் இணைந்து உடற்பயிற்சிகளில் ஈடுபட்டு வருகிறார். துடிப்பான மூத்தோரான இவர், சைவ உணவுக்கு மாறியுள்ளார். குறைவாக சோறு எடுத்துக்கொண்டு உணவில் அதிக காய்கறிகளைச் சேர்த்துக்கொள்கிறார்.

இவரின் மூன்று பிள்ளைகளுக்கு நீரிழிவு இல்லாவிட்டாலும் வீட்டில் சீரான உணவு முறையைப் பின்பற்றும்படி அவர்களிடம் வலியுறுத்தி வருகிறார்.

துடிப்பாகச் செயல்படும் திருவாட்டி இளங்கோவன் குமுதவல்லி. - படம்: அனுஷா செல்வமணி