மாணவர் முரசு
இ-பேப்பர்
பெலம் (பிரேசில்): காப்30 பருவநிலை மாநாடு வெள்ளிக்கிழமை (நவம்பர் 21) நிறைவடையவுள்ள நிலையில், மாறிவரும் சூழலுக்கு ஏற்றவாறு தாங்கள் எத்தகைய முன்னேற்றம் கண்டுள்ளோம் என்பதைக் கணிப்பதில் நாடுகளிடையே அளவுகோல்கள் குறித்த ஒப்பந்தம் எட்டப்படாதது கவலை தருகிறது என நீடித்த நிலைத்தன்மை, சுற்றுப்புற அமைச்சர் கிரேஸ் ஃபூ கூறியுள்ளார்.
இது, பருவநிலை மாற்றத்தால் ஏற்படும் பாதிப்புகளைக் குறைக்கும் நடவடிக்கைகளைக் குறிக்கிறது. கடல்மட்டம் அதிகரிப்பதைச் சமாளிக்க கடலில் அணைக்கட்டுகளை அமைப்பது அத்தகைய நடவடிக்கைகளில் அடங்கும்.
“சிங்கப்பூரைப் போன்ற பல சிறிய நாடுகள், அதிகரிக்கும் கடல்மட்டத்தாலும் கூடுதல் வீரியத்துடன் வீசும் புயல்களாலும் அபாயத்தை எதிர்நோக்குகின்றன. அவை மக்களை அழித்துவிடக்கூடும்,” என்று திருவாட்டி ஃபூ செவ்வாய்க்கிழமை (நவம்பர் 18) செய்தியாளர்களிடம் குறிப்பிட்டார்.
கடற்கரைப் பகுதிகளில் பாதுகாப்பு நடவடிக்கைகளை எடுப்பதும் வெள்ளத்தைச் சமாளிப்பதற்கான உள்கட்டமைப்பும் அவசரத் தேவைகள் என்று அவர் எடுத்துரைத்தார்.
மாறிவரும் பருவநிலையைக் கையாள எடுக்கும் நடவடிக்கைகளில் காணப்படும் முன்னேற்றத்தைக் கணிக்க ஒருமித்த அளவுகோல்கள் இருப்பது இவ்வாண்டின் காப்30 மாநாட்டில் முக்கியப் பங்கு வகிக்கிறது.
பருவநிலை மாற்றத்தால் நாடுகள் அதிகம் பாதிக்கப்படக்கூடிய அம்சங்களை அடையாளம் கண்டு தகுந்த நடவடிக்கை எடுக்க இத்தகைய அளவுகோல்கள் வகைசெய்யும். உதாரணமாக, அதிக வெப்பத்துக்கு ஆளானதால் ஏற்படும் மரணங்களைக் கணக்கெடுத்து அந்தப் போக்கு அதிகரித்தால் அதையும் அடையாளம் கண்டு நிலைமையைக் கையாள தகுந்த நடவடிக்கை எடுக்கலாம்.
காப்30 மாநாட்டை முன்னிட்டு வல்லுநர்கள் ஆயிரக்கணக்கில் இருந்த அளவுகோல்களை 100க்குக் குறைத்தனர். இந்த அளவுகோல்களைப் பின்பற்றுவது குறித்துப் பேச, கிட்டத்தட்ட 200 நாடுகளின் பிரதிநிதிகள் பிரேசிலின் பெலம் நகரில் நடைபெறும் காப்30 மாநாட்டில் கூடியுள்ளனர்.
ஆனால், ஒரு வாரத்துக்கும் மேலாக நீடித்த பேச்சுவார்த்தைகளுக்குப் பிறகு வெளியிடப்பட்ட நகல் ஒப்பந்தத்தில் பல்வேறு அம்சங்கள் இன்னும் விவாதிக்கப்பட்டு வருவதாகக் குறிப்பிடப்பட்டது. நகல் ஒப்பந்தம் கடந்த திங்கட்கிழமை (நவம்பர் 17) வெளியிடப்பட்டது.
தொடர்புடைய செய்திகள்
அதோடு, முழு ஒப்பந்தம் வருங்காத்தில் ஒரு மாநாட்டில் எட்டப்படலாம் என்றும் நகல் ஒப்பந்தத்தில் குறிப்பிடப்பட்டது.
பருவநிலை நெருக்கடிகளை நாடுகள் ஒன்றுபட்டுக் கையாள வேண்டும்; அவற்றால் எல்லை தாண்டிய பாதிப்புகள் ஏற்படக்கூடும் என்று திருவாட்டி ஃபூ எச்சரித்துள்ளார்.