மாணவர் முரசு
இ-பேப்பர்
சிங்கப்பூரில் 18 முதல் 74 வயதிற்குட்பட்ட 500,000க்கும் மேற்பட்டோர் சிறுநீரக நோயால் பாதிக்கப்பட்டுள்ளதாகச் சொல்லப்படுகிறது.
எழுபது வயதை எட்டியோரில் குறைந்தது மூவரில் ஒருவர் சிறுநீரகச் செயலிழப்பால் பாதிக்கப்பட்டுள்ளனர்.
கழிவுநீக்க உறுப்புகளில் ஒன்றான சிறுநீரகம், மனித உடலிலிருந்து நச்சுகள், மற்ற கழிவுகள், உப்பு, அதிகப்படியான நீர் ஆகியவற்றை வெளியேற்றுகிறது. சிறுநீரகத்தின் துப்புரவுப் பணி தடைபடும்போது, உடற்சோர்வு, வீக்கம், குமட்டல், மூச்சுத்திணறல் உள்ளிட்ட பிரச்சினைகள் ஏற்படுகின்றன.
மெல்லக் கொல்லும் நோயாகக் கருதப்படும் நாட்பட்ட சிறுநீரக நோயில் (சிகேடி) ஐந்து நிலைகள் உள்ளன. அதன் தொடக்க நிலையின்போது மனிதர்களிடத்தில் பாதிப்பு தெரிவதில்லை. சிறுநீரகம் அதிகம் பாதிக்கப்பட்ட பின்னரே அதுகுறித்த அறிகுறிகள் தெரியத் தொடங்குகின்றன.
சிறுநீரகங்களின் இயல்பான செயல்பாட்டில் 15 விழுக்காட்டிற்கும் கீழே குறையும்போதுதான் ஒருவர் தீவிரமாகக் கண்காணிக்கப்பட்டு, சிறுநீரக மாற்று அறுவை சிகிச்சை அல்லது ரத்தச் சுத்திகரிப்பிற்குத் தயாராக வேண்டியுள்ளது. இந்த நிலை சிகேடி5, அதாவது சிறுநீரகச் செயலிழப்பு என அழைக்கப்படுகிறது.
இந்நிலையில், நீரிழிவு, மிகை ரத்த அழுத்தம், ரத்தக் கொழுப்பு போன்ற நாட்பட்ட பிரச்சினைகள் தொடக்கத்திலேயே கண்டறியப்பட்டு, கட்டுப்படுத்தப்பட்டால் சிங்கப்பூரில் சிறுநீரக நோய் பாதிப்புகளில் பாதியைத் தடுத்துவிட முடியும் என்று தேசிய சிறுநீரக அறநிறுவனத்தின் மருத்துவ இயக்குநர் டாக்டர் ஜேசன் சூ மதிப்பிட்டுள்ளார்.
சிறுநீரகப் பாதிப்பிலிருந்து முற்றிலும் விடுபட வழியில்லை என்றாலும் பிரச்சினையைத் தொடக்கத்திலேயே கண்டறிந்தால் புதிய மருந்துகள்மூலம் சிறுநீரகச் செயலிழப்பு மோசமடைவதைக் குறிப்பிடத்தக்க அளவு தாமதப்படுத்த முடியும் என்றும் அவர் சொன்னார்.
ரத்தச் சுத்திகரிப்பு செய்துகொள்வோரில் மூவரில் ஒருவர் இதயக் கோளாறுகளால் இறந்துபோவதாகவும் டாக்டர் சூ குறிப்பிட்டார்.
தொடர்புடைய செய்திகள்
நாட்பட்ட சிறுநீரக நோயால் பாதிக்கப்பட்டுள்ளோரின் சிறுநீரகச் செயல்பாடு ஆண்டிற்கு 10 விழுக்காடுவரை குறையக்கூடும்.
நீரிழிவு, மிகை ரத்த அழுத்தம், இதயநோய் உள்ளவர்கள், பருமனாக இருப்பவர்கள், அதிகமாகப் புகைபிடிப்பவர்கள் ஆகியோரும் நாட்பட்ட சிறுநீரக நோய் குடும்பப் பின்னணி உள்ளவர்களும் அந்நோயால் பாதிக்கப்பட வாய்ப்புள்ளதாகச் சொல்லப்படுகிறது.
அத்தகையோர் சிறுநீரகப் பரிசோதனை செய்துகொள்வது நல்லது.
சிங்கப்பூரில் 200க்கும் மேற்பட்ட பொது மருந்தகங்களில் தேசிய சிறுநீரக அறநிறுவனத்தின் இலவசப் பரிசோதனையைச் செய்துகொள்ள முடியும். அதற்கு $30 முதல் $50 வரை கட்டணம் வசூலிக்கப்படும்.
அப்பரிசோதனையை வழங்கும் பொது மருந்தகங்களின் பட்டியலை https://nkfs.org/kidney-failure/kidney-screening-at-gp-clinics/ எனும் இணையப்பக்கத்தில் தெரிந்துகொள்ளலாம்.