மாணவர் முரசு
இ-பேப்பர்
மக்கள் செயல் கட்சிக்கும் (மசெக) தேசிய தொழிற்சங்க காங்கிரசுக்கும் (என்டியுசி) இடையிலான நீண்டகால, நெருங்கிய, பரஸ்பர பலனளிக்கக்கூடிய உறவு இருப்பதால் நெருக்கடிகளை எதிர்கொள்ளவும் வளர்ச்சியைத் தக்கவைக்கவும் வாழ்வாதாரங்களைப் பாதுகாக்கவும் கடினமான முடிவுகளை எடுக்க முடிகிறது என்று துணைப் பிரதமர் கான் கிம் யோங் வியாழக்கிழமையன்று (நவம்பர் 13) தெரிவித்தார்.
என்டியுசி தொழிற்சங்கப் பேராளர்கள் மாநாட்டில் பேசிய திரு கான், புவிசார் அரசியல், தொழில்நுட்பம், மக்கள்தொகை ஆகியவை மாறிவரும் நிலையில் அரசாங்கம், தொழிலாளர் இயக்கம், முதலாளிகள் எனும் முத்தரப்புப் பங்காளித்துவத்தின் முக்கியத்துவத்தை மேற்கோள்காட்டினார்.
“மாற்றங்களைப் பொறுப்புள்ள வகையில் சமாளிக்கும் நாடாக சிங்கப்பூர் உள்ளது என்பதை வர்த்தகங்களுக்கும் முதலீட்டாளர்களுக்கும் முத்தரப்புப் பங்காளித்துவம் நம்பிக்கையைத் தருகிறது. கொள்கைகள் அறிவுபூர்வமானவை என்றும் முன்னுரைக்கப்படக்கூடியவை என்றும் பலன்கள் முதலாளிகளுக்கும் ஊழியர்களுக்குமானவை என்பதையும் அது எடுத்துக்காட்டுகிறது.
என்டியுசி தொழிற்சங்கப் பேராளர்கள் மாநாடு டௌன்டவுன் ஈஸ்ட்டில் நடைபெற்றது.
அதில் சிறப்பு விருந்தினராக துணைப் பிரதமர் கான் கலந்துகொண்டார்.
வேலைகள் என்று வரும்போது இக்காலகட்டத்தில் பல மாற்றங்கள் ஏற்பட்டிருக்கும்போதிலும் ஒவ்வோர் ஊழியரின் ஆர்வம், கௌரவம், மேம்பாடு ஆகியவற்றுக்கு முக்கியத்துவம் கொடுப்பதில் என்டியுசி கையாளும் அணுகுமுறை தொடர்வதாகத் திரு கான் கூறினார்.
காலத்துக்கு ஏற்ப வளர்ச்சி அடையும், மாற்றங்களைத் தழுவிக்கொள்ளும் ஆற்றல் தனக்கு இருப்பதை என்டியுசி நிரூபித்திருப்பதாக அவர் தெரிவித்தார்.
மேம்படுத்தப்பட்ட உள் ஒருங்கிணைப்புடன் இளையர்கள், இணையத்தள ஊழியர்கள், நிபுணர்கள், மேலாளர்கள், நிர்வாகிகள் ஆகியோருடனான தொடர்பை விரிவுபடுத்தியிருப்பதன் மூலம் இது சாத்தியமானது என்றார் அவர்.
தொடர்புடைய செய்திகள்
காலத்துக்கு ஏற்ற தொழிலாளர் இயக்கமாகத் திகழ இப்பிரிவினர்களுடனான தொடர்பை மேலும் வலுப்படுத்தும் முயற்சிகளையும் வாய்ப்புகளையும் அவர் மேற்கோள் காட்டினார்.
செயற்கை நுண்ணறிவு, தானியங்கி முறை, மின்னிலக்கம் உட்பட தொழில்நுட்பத்தில் ஏற்பட்டிருக்கும் மாற்றங்கள் உற்பத்தித்திறனை மேம்படுத்தக்கூடியவை என்று திரு கான் கூறினார்.
ஆனால், இந்த மாற்றங்களுக்கு ஏற்ப தங்கள் ஆற்றலை மேம்படுத்திக்கொள்வது குறித்து நிறுவனங்களும் ஊழியர்களும் கவலைப்படுவதாக அவர் தெரிவித்தார்.
இதற்குத் தீர்வு காணும் வண்ணம், என்டியுசி செயல்பட்டு வருவதாக அவர் பாராட்டினார்.
செயற்கை நுண்ணறிவு தொடர்பான திட்டங்களை அது நடத்தி வருவதை அவர் சுட்டினார்.
நிறுவனங்களும் ஊழியரணியும் இணைந்து செயல்படுவதை இந்தத் திட்டங்கள் உறுதி செய்வதாகத் திரு கான் கூறினார்.
இதன்மூலம் மேலும் சிறந்த வாழ்க்கைத் தொழில்களும் சம்பளமும் கிடைக்கும் என்றார் அவர்.