மாணவர் முரசு
இ-பேப்பர்
நாட்டை ஆளும் மக்கள் செயல் கட்சியின் அமைச்சரவை தற்போது பெரும்பாலும் நான்காம் தலைமுறை (4ஜி) மற்றும், அனுபவம் மிகுந்த சில மூன்றாம் தலைமுறைத் தலைவர்களையும் கொண்டுள்ளது.
எனினும், அடுத்த பொதுத் தேர்தலின்போது இத்தகைய தலைமைத்துவத்தில் ஐந்தாம் தலைமுறை உறுப்பினர்கள் இருக்கும் நிலை தென்படக்கூடும் என்று நம்பிக்கை தெரிவித்தார் பிரதமர் லாரன்ஸ் வோங்.
எக்ஸ்போ அரங்கில் நடைபெற்ற கட்சி மாநாட்டில் நேர்த்தியான அரசியல் களத்தை அமைத்திட மசெக அதன் அணியைப் புதுப்பித்து வருவது குறித்து பேசிய திரு வோங், அடுத்த தேர்தலுக்குள் 5ஜி தலைமைத்துவம் வடிவம் பெற்றுவிடும், என்று நம்புவதாகச் சொன்னார்.
அரசியலுக்குள் நுழைந்து மசெகவின் நோக்கத்துடன் இணங்கி, நாட்டிற்கு சேவை செய்ய வேண்டும் என்ற உறுதியுடன் கூடிய திறமையான சிங்கப்பூரர்களைத் தேடும் பணி தொடர்ந்து நடைபெற்று வருவதாகக் கூறிய திரு வோங், அடுத்த பொதுத் தேர்தல் வரும்போது, அது 2030 அல்லது அதற்கு முன்னதாகவோ இருந்தாலும், மசெக சிஙகப்பூரர்களைச் சந்திக்க தயாராக இருக்க வேண்டும் என்றும் கேட்டுக்கொண்டார்.
அவசரம் என்றால் அப்போது புரியவில்லை, இப்போது புரிகிறது
2006ஆம் ஆண்டு திரு லீ சியன் லூங் பிரதமராகவும், தாம் அவரின் முதன்மை தனிச்செயலாளராகவும் இருந்தபோது நடைபெற்ற கலந்துரையாடலை மாநாட்டு மேடையில் நினைவுகூர்ந்தார் திரு வோங்.
‘‘அப்போது பொதுத் தேர்தல் முடிந்த வேளை. இனி சற்று இளைப்பாறலாம் என்று திரு லீயிடம் கூறினேன். ஆனால் அவர் அப்படியல்ல. கட்சியைப் புதுப்பிப்பது உள்பட பல அவசர வேலைகள் உள்ளன,’’ என்றார்.
‘அதைக் கேட்டவுடன் ‘பிரதமராகப் பதவியேற்றாகிவிட்டது. நிச்சயம் அவருக்கு நேரம் இருக்கும் என்று என் மனத்தில் எண்ணிக்கொண்டேன். அவர் சொன்னது அப்போது புரியவில்லை. ஆனால் இப்போது நான் பிரதமராக இருக்கையில் அந்த அவசரத்தேவையை உணர்கிறேன்,’’ என்று விவரித்தார் திரு வோங்.
‘‘நாம் என்ன சொன்னோம் என்பதை வைத்து அல்ல, நாம் என்ன செய்கிறோம் என்பதை வைத்து மசெகவின் திறனை மக்கள் அறிவர். அப்போது அவர்கள் நாம் வாக்குறுதிகளை நிறைவேற்றினோமா? அவர்கள் வாழ்வை மேம்படுத்தினோமா? என்று கேட்பார்கள். எனவே நேரத்தை விரயம் செய்யாது உடனுக்குடன் நாம் செயல்படுத்த பல அவசரப் பணிகள் உள்ளன,” என்றார்.
தொடர்புடைய செய்திகள்
மேலும் “அடுத்த தலைமுறைக்குக் கற்றுக்கொள்ளவும், அவர்கள் ஆயத்தமாகவும் குறிப்பாகச் சக சிங்கப்பூரர்களின் நம்பிக்கையை வெல்ல போதுமான நேரத்தையும் கொடுக்க வேண்டும். ஒரு வாய்ப்பைத் தவறவிட்டால், ஐந்து ஆண்டுகளை இழக்க நேரிடும். அது நெடிய காலம்,’’ என்று கூறினார் திரு வோங்.
எனினும், நல்லவேளையாக அண்மைய தேர்தலில் 27 புதிய நாடாளுமன்ற உறுப்பினர்களுக்கு இடங்கொடுக்கும் வகையில் கட்சி சிறப்பாகச் செயல்பட்டது என்று சொன்ன திரு வோங், தங்கள் தொகுதிகளில் சிறந்த தாக்கத்தை ஏற்படுத்திய மூன்று எம்பிக்கள் பெயரைக் குறிப்பிட்டு அவர்கள் ஆற்றி வரும் பணிகளையும் பட்டியலிட்டார்.
பிரதமர், வெஸ்ட் கோஸ்ட் - ஜூரோங் வெஸ்ட் குழுத்தொகுதி நாடாளுமன்ற உறுப்பினர் டாக்டர் ஹமீது ரசாக், வெஸ்ட் கோஸ்ட் - ஜூரோங் வெஸ்ட் குழுத் தொகுதி நாடாளுமன்ற உறுப்பினர் திருவாட்டி கசேண்ட்ரா லீ, மற்றும் ஈஸ்ட் கோஸ்ட் குழுத் தொகுதியின் திருவாட்டி ஹஸ்லினா அப்துல் ஹலிம் ஆகிய மூவரையும் பாராட்டினார்.