மாணவர் முரசு
இ-பேப்பர்
சிறுமி மேகன் கங் விவகாரத்தில் காவல்துறை அதிகாரிகள் இருவர் செயலாக்க நடைமுறைகளைப் பின்பற்றாதது, கடும் அத்துமீறல் என்றும் அது துயரத்தில் முடிந்தது என்றும் தெரிவிக்கப்பட்டுள்ளது. உள்துறை, சமுதாய, குடும்ப மேம்பாட்டுத் துணையமைச்சர் கோ பெய் மிங் நாடாளுமன்றத்தில் புதன்கிழமை (நவம்பர் 5) அவ்வாறு கூறினார்.
காவல்துறை அதிகாரிகள் அன்றாடம் சிரமமான முடிவுகளை எடுக்கவேண்டியுள்ளது என்றார் திரு கோ. அதனால் நெருக்குதலான நேரத்தில் தவறுகள் நேரக்கூடும் என்று அவர் சொன்னார்.
“இந்த விவகாரத்தில் அதிகாரிகள் இருவர் நெருக்குதலான சூழலில், ஏற்கெனவே நிறுவப்பட்ட செயலாக்க நடைமுறைகளைப் பின்பற்றத் தவறினர்,” என்று திரு கோ குறிப்பிட்டார்.
மேகன் விவகாரத்தில் காவல்துறையின் நடைமுறைகள் குறித்து நாடாளுமன்ற உறுப்பினர்கள் நால்வர் கேள்விகளைக் கேட்டிருந்தனர். அவற்றுக்குப் பதிலளித்துத் திரு கோ பேசினார்.
நான்கு வயது மேகன், தாயார் ஃபூ லி பிங்காலும் அவரின் காதலன் வோங் ஷி ஸியாங்காலும் ஓராண்டு துன்புறுத்தப்பட்ட பிறகு 2020ஆம் ஆண்டு பிப்ரவரியில் மரணமடைந்தார்.
எரிக்கப்பட்ட சிறுமியின் உடலைப் பின்பு கண்டுபிடிக்க முடியவில்லை.
விவகாரத்தில் சம்பந்தப்பட்ட குற்றவாளிகளின் நண்பர் நூவெல் சுவா ருவோஷி மீதான வழக்கு தொடர்கிறது.
மேகன் விவகாரம் குறித்த மறுஆய்வுக்குழுவின் அறிக்கை சென்ற மாதம் (அக்டோபர் 2025) 23ஆம் தேதி வெளியிடப்பட்டது. சமுதாய, குடும்ப மேம்பாட்டு அமைச்சின் பிள்ளைப் பாதுகாப்புச் சேவை, காவல்துறை உட்பட பல்வேறு அமைப்புகளின் குறைபாடுகள் அதில் குறிப்பிடப்பட்டிருந்தன.
தொடர்புடைய செய்திகள்
மேகன் விவகாரத்தில் முதல் அறிக்கையைக் கையாண்ட காவல்துறையின் புலனாய்வு அதிகாரியும் அவரின் மேற்பார்வையாளரும் நடைமுறைகளைப் பின்பற்றத் தவறினர். அந்த விவகாரத்தைக் கண்காணிக்கவும் அது குறித்து வழிகாட்டவும் மேலதிகாரிகளை அவர்கள் அணுகவில்லை. கடமையில் கவனக்குறைவாய் இருந்ததன் தொடர்பில் அதிகாரிகள் இருவரும் விசாரிக்கப்பட்டனர்.
புலனாய்வு அதிகாரி பின்னர் பதவி விலகினார். அவரின் மேற்பார்வையாளருக்கு அபராதம் விதிக்கப்பட்டது.
“காவல்துறை இதிலிருந்து (மேகன் விவகாரம்) பாடம் கற்றுக்கொண்டு, அதன் அதிகாரிகளுக்கான நடைமுறைகளையும் பயிற்சிகளையும் வலுப்படுத்தும்,” என்று திரு கோ கூறினார்.