மாணவர் முரசு
இ-பேப்பர்
சிங்கப்பூரும் தாய்லாந்தும் அரிசி விற்பனையை விரிவுபடுத்தும் உடன்பாட்டில் கையெழுத்திட்டுள்ளன. சுகாதாரப் பராமரிப்புத் துறையில் ஆற்றல்களை மெருகேற்றுவதில் ஒத்துழைப்பை வலுப்படுத்தவும் இரு தரப்பும் இணங்கின. மூப்படையும் சமூகத்தினரின் தேவைகளை நிறைவேற்ற அது கைகொடுக்கும்.
தாய்லாந்துப் பிரதமர் அனுட்டின் சார்ன்விராக்குன் சிங்கப்பூருக்கு வருகை புரிந்துள்ள வேளையில் இரண்டு புரிந்துணர்வுக் குறிப்புகள் வெள்ளிக்கிழமை (நவம்பர் 7) கையெழுத்தாயின. இவ்வாண்டு (2025) செப்டம்பரில் பதவியேற்ற பிறகு அவர் மேற்கொள்ளும் முதல் வெளிநாட்டுப் பயணம் இது.
சிங்கப்பூரும் தாய்லாந்தும் இரு தரப்பு உறவில் 60ஆம் ஆண்டு நிறைவை அனுசரிக்கின்றன. அதனையொட்டி இவ்வாண்டு இரு தரப்பும் பல உடன்பாடுகளைச் செய்துகொண்டுள்ளன.
இரு நாடுகளும் கடந்த 60 ஆண்டில் நம்பிக்கை, மரியாதை, உண்மையான நட்பு ஆகியவற்றின் அடிப்படையில் உறவை வலுப்படுத்திக் கொண்டுள்ளதாகச் சிங்கப்பூர்ப் பிரதமர் லாரன்ஸ் வோங் கூறினார். புரிந்துணர்வுக் குறிப்புகள் கையெழுத்திடப்பட்ட பிறகு, செய்தியாளர் கூட்டத்தில் அவர் பேசினார்.
இரு தரப்பு உறவு உன்னத நிலையில் உள்ளது; பொருளியல் தொடர்புகள் உறுதியாக இருக்கின்றன; தற்காப்பு ஒத்துழைப்பு நெடுங்காலமாக நீடிக்கிறது; இரு நாட்டு மக்களுக்கும் இடையிலான உறவுகளும் வலுவான நிலையில் இருப்பதாக அவர் சொன்னார்.
பல அம்சங்களில் உறவு வலுவாக இருந்தாலும் இரு தரப்பும் இணைந்து செயல்படுவதற்கு இன்னும் ஏராளமான வாய்ப்புகள் உள்ளதாகத் திரு வோங் குறிப்பிட்டார்.
சிங்கப்பூரும் தாய்லாந்தும் முதியோர்நலன், முதியோர் நல்வாழ்வுச் சேவை முதலிய துறைகளில் சேர்ந்து பணியாற்ற இணங்கின. அதன் தொடர்பிலான உடன்பாட்டில் சிங்ஹெல்த் குழுமமும் தாய்லாந்து மருத்துவச் சேவைத் துறையும் கையெழுத்திட்டன.
சாங்கி பொது மருத்துவமனை கூட்டுத் திட்டத்தை வழிநடத்தும் என்று சிங்கப்பூரின் சுகாதார அமைச்சு தெரிவித்தது.
தொடர்புடைய செய்திகள்
செய்தியாளர் கூட்டத்தில் திரு அனுட்டின் பேசியபோது, தமது வருகை அர்த்தமுள்ள வகையிலும் சரியான நேரத்திலும் அமைந்திருப்பதாகச் சொன்னார். இரு நாடுகளும் பல்வேறு துறைகளில் ஒத்துழைப்பை வலுப்படுத்துவதாக அவர் குறிப்பிட்டார்.
இணைய மோசடிகளைக் கையாள்வதில் இரு தரப்பும் அக்கறை கொண்டிருப்பதாகவும் தாய்லாந்துப் பிரதமர் கூறினார்.
மின்னிலக்கத் தொழில்நுட்பம், பகுதிமின்கடத்திகள், மின்வாகனங்கள், தரவு நிலையங்கள், உயிரியல் தொழில்நுட்பம் முதலிய துறைகளிலும் சேர்ந்து செயலாற்றத் தலைவர்கள் இருவரும் உறுதி தெரிவித்தனர்.