மாணவர்களுக்கு கல்வி உதவி நிதி வழங்கிய சிங்கப்பூர் இலங்கைத் தமிழர் சங்கம்

2 mins read
dbf12f3c-a179-47d4-814f-21ba4c5f27d5
கலாசார, சமூக, இளையர்துறைத் துணை அமைச்சர் தினேஷ் வாசுதாஸ், நிகழ்ச்சியில் சிறப்பு விருந்தினராகக் கலந்துகொண்டு, கல்வி உதவி நிதி பெற்ற மாணவர்களை வாழ்த்தினார். - படம்: கீர்த்திகா ரவீந்திரன்
multi-img1 of 2

சிங்கப்பூரின் 60வது ஆண்டுநிறைவுக் கொண்டாட்டங்களின் ஒரு பகுதியாக உயர்நிலைப் பள்ளி, பலதுறைத் தொழிற்கல்லூரி, தொழில்நுட்பக் கல்விக் கழகம், பல்கலைக்கழகங்களில் பயிலும் மாணவர்கள் 40 பேருக்கு கல்வி உதவி நிதி வழங்கியுள்ளது சிங்கப்பூர் இலங்கைத் தமிழர் சங்கம்.

ஷங்ரிலா ஹோட்டலில் ஞாயிற்றுக்கிழமை (நவம்பர் 9) நடைபெற்ற சங்கத்தின் வருடாந்தர விருந்து நிகழ்ச்சியில் மாணவர்கள் உதவி நிதி பெற்றனர்.

சிங்கப்பூர் இந்தியர் மேம்பாட்டுச் சங்கத்தின் (சிண்டா) மரின் பரேட் குடும்பச் சேவை நிலையங்களிலிருந்து ஆதரவு பெற்றுவரும் மாணவர்களுக்கு இந்த கல்வி உதவி நிதி அளிக்கப்பட்டது.

வழங்கப்பட்ட மொத்தத் தொகை கிட்டத்தட்ட S$30,000 என்று தெரிவித்தது சிங்கப்பூர் இலங்கைத் தமிழர் சங்கம்.

நிகழ்ச்சியில் சிறப்பு விருந்தினராகக் கலந்துகொண்டு, கல்வி உதவி நிதி பெற்ற மாணவர்களை வாழ்த்தினார் கலாசார, சமூக, இளையர்துறைத் துணை அமைச்சர் தினேஷ் வாசுதாஸ்.

“கடந்து வந்த பாதையைப் பறைசாற்றி நாட்டிற்குத் திருப்பித்தர உறுதிபூண்டுள்ள ஒரு சமூகத்தை இந்த முயற்சி பெரிதும் பிரதிபலிக்கிறது,” என்றார் அவர்.

அவருடன் உள்துறை, சமுதாய, குடும்ப மேம்பாட்டுத் துணையமைச்சர் கோ பெய் மிங்கும் நிகழ்ச்சிக்கு வருகையளித்தார்.

உதவி நிதி பெற்றவர்களில் ஒருவரான ஸ்ரீசக்தி நெடுஞ்செழியன், 23, நன்யாங் தொழில்நுட்பப் பல்கலைக்கழகத்தில் கணினிப் பொறியியல் பயின்று வருகிறார்.

மாணவராக இருந்தாலும் கல்வி சார்ந்த தனிப்பட்ட நிதிச் சவால்களைத் தான் எதிர்கொள்வதாக அவர் தெரிவித்தார்.

“இதுபோன்ற முயற்சிகள் நிதி குறித்த எனது கவலைகளைப் போக்க உதவுகின்றன,” என்றார் அவர்.

சிங்கப்பூர்த் தொழில்நுட்பக் கல்விக் கழகத்தில் பயிலும் சித்தாரா, 21, இந்த முயற்சி மேலும் பல மாணவர்களுக்கு உதவ வேண்டும் என்று கேட்டுக்கொண்டார்.

தேசிய நிலைத் தேர்வுகளில் சிறப்புத் தேர்ச்சி பெற்ற மாணவர்கள் ஐவருக்குச் சிறப்பு விருதுகள் வழங்கப்பட்டன.

மேலும், சிங்கப்பூர் இலங்கைத் தமிழர்கள் சமூகத்தில் கலை, மருத்துவம், கல்வி போன்ற துறைகளில் நீண்ட காலம் பங்காற்றியவர்களுக்குச் சிறப்பு வாழ்நாள் சாதனையாளர், சிறப்புச் சேவையாளர் விருதுகள் அளிக்கப்பட்டன.

விருந்து நிகழ்ச்சியில் விருதளிப்பு மட்டுமன்றி ஆடல், பாடல், ஆடை அலங்கார நடை போன்ற அங்கங்களும் இடம்பெற்றன.

தொன்றுதொட்ட இலங்கைத் தமிழர்களின் வரலாறு, மரபு, கலாசாரத்தை எடுத்துக்கூறும் சிறப்புக் கண்காட்சியும் ஷங்ரிலா ஹோட்டல் வளாகத்தில் அமைக்கப்பட்டிருந்தது.

குறிப்புச் சொற்கள்