மாணவர் முரசு
இ-பேப்பர்
உள்ளூர் அறநிறுவனமான ‘ரஹ்மத்தான் லில் அலாமின்’ (RLAF), பாகிஸ்தானிலும் ஆப்கானிஸ்தானிலும் இயற்கைப் பேரிடர்களால் பாதிக்கப்பட்ட மக்களுக்காக நிதி திரட்டுகிறது.
திங்கட்கிழமை (செப்டம்பர் 15) தொடங்கிய நிதித் திரட்டு அக்டோபர் 5 வரை நீடிக்கும். இயற்கைப் பேரிடர்களால் பாதிக்கப்பட்டுள்ள பாகிஸ்தான், ஆப்கானிஸ்தான் மக்களின் துயர்துடைக்க குறைந்தபட்சம் $100,000 திரட்ட அந்த அறநிறுவனம் இலக்கு வகுத்துள்ளது.
நன்கொடைப் பிரசார இயக்கம் மூலம் திரட்டப்படும் தொகை தேடி மீட்கும் பணிகளுக்கு ஆதரவளிப்பதோடு, உணவு, சுத்தமான குடிநீர், அவசரச் சுகாதாரச் சேவை, மருத்துவப் பொருள்கள், மனநலம் மற்றும் உளவியல் உதவி போன்றவற்றுக்கும் பயன்படும்.
இவற்றுடன், பாதிக்கப்பட்ட அவ்விரு நாடுகளின் மக்களுக்கும் தேவையான இதர அத்தியாவசியப் பொருள்களை வாங்கவும் இந்த நன்கொடை நிதி பயன்படும் என்று ‘ஆர்எல்ஏஎஃப்’ அறநிறுவனம் செவ்வாய்க்கிழமை (செப்டம்பர் 16) தனது அறிக்கையில் குறிப்பிட்டது.
ஆப்கானிஸ்தானில் ஆகஸ்ட் 31ஆம் தேதி 6 ரிக்டர் அளவு நிலநடுக்கம் ஏற்பட்டது. நாட்டின் ஆக மோசமான அந்த நிலநடுக்கத்திலும் செப்டம்பர் 2ஆம் தேதி நிகழ்ந்த மற்றொரு நிலநடுக்கத்திலும் சிக்கி 2,200க்கும் மேற்பட்டோர் உயிரிழந்தனர். குறைந்தபட்சம் 8,000 மக்கள் வீடுகளை இழந்தனர்.
அதேபோல, பாகிஸ்தானில் ஆகஸ்ட் மாத நடுப்பகுதியில் ஏற்பட்ட பெருவெள்ளத்தில் 2,000க்கும் மேற்பட்ட கிராமங்கள் மூழ்கின. இரண்டு மில்லியனுக்கும் மேற்பட்ட மக்கள் மாற்று இடங்களில் தங்க வைக்கப்பட்டனர். அந்த வெள்ளத் துயரில் சிக்கி பலியானோரின் எண்ணிக்கை 33க்கு அதிகரித்தது.
இவ்விரு நாடுகளின் மக்களுக்கும் நன்கொடை அளிக்க விரும்புவோர், பேநவ் மூலமாகவும் இணைய வங்கி மூலமாகவும் பணம் அனுப்பலாம்.
நன்கொடைக்கான காசோலைகளை அறநிறுவனத்தின் உட்லண்ட்ஸ் முகவரிக்கு அனுப்பலாம். யூசோப் இஷாக் பள்ளிவாசல், 10 உட்லண்ட்ஸ் டிரைவ் 17, சிங்கப்பூர் 737740 என்பது அந்த முகவரி.
தொடர்புடைய செய்திகள்
திரட்டப்படும் நன்கொடை அனைத்தும் சிங்கப்பூர் செஞ்சிலுவைச் சங்கம் மூலம், பாதிக்கப்பட்ட நாடுகளின் மக்களுக்கு அனுப்பப்படும் என்று ‘ஆர்எல்ஏஎஃப்’ அறநிறுவனம் தெரிவித்துள்ளது.