மாணவர் முரசு
இ-பேப்பர்
சிங்கப்பூர்த் தமிழ் எழுத்தாளர் கழகம் தேசிய நூலக வாரியத்தின் ஆதரவோடு வரும் ஞாயிற்றுக்கிமை செப்டம்பர் 7ஆம் தேதி கடந்த “60 ஆண்டுகளில் சிங்கப்பூர்த் தமிழ் இலக்கியம்” என்னும் தலைப்பில் ஒருநாள் கருத்தரங்கிற்கு ஏற்பாடு செய்துள்ளது.
தேசிய நூலகத்தின் 5வது தளத்தில் பாசிபிலிடி அறையில் காலை 9.00 மணி முதல் மாலை 7.00 மணி வரையில் கருத்தரங்கு நடைபெறும்.
எழுத்தாளர் கழகத்தின் மதியுரைஞரான பேராசிரியர், முனைவர் சுப. திண்ணப்பன் கருத்தரங்கிற்குத் தலைமை ஏற்பார். முனைவர் சரோஜினி, செல்லக்கிருஷ்ணன், திரு. ஷாநவாஸ், பேராசிரியர் முனைவர் சித்ரா சங்கரன், திரு. சபாமுத்து நடராசன், பேராசிரியர், முனைவர் அ. வீரமணி ஆகியோர் அமர்வுகளுக்குத் தலைமை ஏற்பர்.
“சிங்கப்பூர்த் தமிழ் இலக்கியம் – சவால்களைக் கடந்து 60 ஆண்டுகள்” என்னும் தலைப்பில் கவிதை பற்றி குமாரி கனகலதாவும் உரைநடை குறித்துத் திரு. சிவானந்தம் நீலகண்டனும், “கடந்த 30 ஆண்டுகளில் சிங்கப்பூர்த் தமிழ் இலக்கியத்திற்கு மின்-தமிழ் தந்துள்ள ஊக்கம்” என்னும் தலைப்பில் திரு.மகேஷ்குமாரும் செல்வி விஷ்ணுவர்த்தினியும், “கடந்த 60 ஆண்டுகளில் அரசு நிறுவனங்கள், தமிழ் அமைப்புகள் ஆகியவற்றின் செயல்பாட்டால் சிங்கப்பூர்த் தமிழ் இலக்கியம் அடைந்துள்ள வளர்ச்சி” என்னும் தலைப்பில் அரசு நிறுவனங்கள் குறித்துத் திரு. எஸ்.என்.வி. நாராயணன், தமிழ் அமைப்புகள் பற்றித் திரு. சித்துராஜ் பொன்ராஜ் ஆகியோரும், “கடந்த 60 ஆண்டுகளில் சிங்கப்பூர்த் தமிழ் இலக்கியத்திற்கு ஊடகங்கள் ஆற்றியுள்ள பங்கு” என்னும் தலைப்பில் அச்சு ஊடகம் பற்றித் திரு. இர்ஷாத் முகம்மதும் வானொலி ஊடகம் குறித்து முனைவர் மீனாட்சி சபாபதியும் தொலைக்காட்சி ஊடகம் பற்றிக் குமாரி பிரியா சூர்யமூர்த்தியும் “கடந்த 60 ஆண்டுகளில் சிங்கப்பூரின் தமிழ் இலக்கிய வளர்ச்சியில் ஆய்வுகள் அளித்துள்ள பங்கும் ஊக்கமும்” என்னும் தலைப்பில் இணைப் பேராசிரியர், முனைவர் ஆ.ரா. சிவகுமாரனும் இணைப் பேராசிரியர், முனைவர் சீதாலட்சுமியும் கட்டுரைகள் படைப்பர்.
“சிங்கப்பூர்த் தமிழ் இலக்கியத்தின் வருங்காலம் – நம்பிக்கையூட்டுகிறதா? கவலையளிக்கிறதா?” என்னும் தலைப்பில் கலந்துரையாடல் நடைபெறும்.
திரு. முகம்மது அலி தலைமையில் நடைபெறும் அக்கலந்துரையாடலில் கவிஞர் பிச்சினிக்காடு இளங்கோ, திரு. சித்துராஜ் பொன்ராஜ், திரு. சரவணப் பெருமாள், திரு. காமேஸ்வரன் மீனாட்சிசுந்தரம், செல்வி கிருஷ்மிதா ஷிவ் ராம், செல்வி சுருதிகா குமார் ஆகியோர் பங்கேற்பர்.
மாலையில் 60 சிறுகதைகள் அடங்கிய ‘SG60 சிங்கையின் மணிவிழாச் சிறுகதைகள்’, 60 கட்டுரைகள் அடங்கிய ‘SG60 சிங்கையின் மணிவிழாக் கட்டுரைகள்’ ஆகிய இரண்டு நூல்கள் வெளியிடப்படும். முன்னாள் நாடாளுமன்ற நியமன உறுப்பினர் திரு. இரா. தினகரன் ஜே.பி. சிறப்பு விருந்தினராகக் கலந்துகொண்டு நூல்களை வெளியிடுவார்.
நூல்களைப் பற்றிக் தேசியக் கல்விக் கழகத்தின் முனைவர் கிங்ஸ்டனும் தொடக்கக் கல்லூரி ஆசிரியர் முனைவர் மன்னை க. இராஜகோபாலனும் கருத்துரைப்பார்கள்.
தொடர்புடைய செய்திகள்
காலை, பிற்பகல் உணவு, மாலைச் சிற்றுண்டி ஆகியவற்றுடன் நடைபெறும் இந்த முழுநாள் கருத்தரங்கிற்கு அனுமதி இலவசம். ஆயினும் பதிவு அவசியம். https://forms.gle/b9LwaJiFZf6Y4Shu5 என்ற இணைப்பில் பதிவு செய்யவும். மேல் விவரங்களுக்கு செயலாளர் திருவாட்டி பிரேமா மகாலிங்கத்தை +65 9169 6996 எண்ணில் தொடர்பு கொள்ளலாம்.