மாணவர் முரசு
இ-பேப்பர்
சிங்கப்பூரில் பதிவு செய்யப்பட்டுள்ள 85,000 மின்-ஸ்கூட்டர்களில் பெரும்பாலானவற்றுக்குப் பாதுகாப்புச் சான்றிதழ் இல்லை என்று இங்குள்ள சில்லறை விற்பனை கடைகள் தெரிவித்துள்ளன. இந்தச் சான்றிதழ்கள் 2021ஆம் ஆண்டுக்குப் பிறகு கட்டாயமாக்கப்படும். பாதுகாப்புச் சான்றிதழ் இல்லாத கிட்டத்தட்ட 80,000 மின்-ஸ்கூட்டர்கள் வரை இருக்கக்கூடும் என்று ‘மோபொட்’ தெரிவித்திருக்கிறது.
2014ஆம் ஆண்டு செயல்படத் தொடங்கிய ‘மோபொட்’ கடை, இதுவரை 15,000 மின்-ஸ்கூட்டர்களை விற்றதாகத் தெரிவித்தது. விற்கப்பட்ட அந்த ஸ்கூட்டர்களில் மூன்று விழுக்காடுதான் பாதுகாப்புச் சான்றிதழைக் கொண்டுள்ளதாக அந்தக் கடை கூறியது.
பதிவு செய்யப்பட்ட மின்-ஸ்கூட்டர்களில் 70 முதல் 80 விழுக்காடு வரையிலான ஸ்கூட்டர்களுக்குப் பாதுகாப்புச் சான்றிதழ் இல்லை என்று கிட்டத்தட்ட 30 கடைக்காரர்களைப் பிரதிநிதிக்கும் சிங்கப்பூர் சில்லறை விற்பனை கடைக்காரர்கள் சங்கம் தெரிவித்துள்ளது. கடந்தாண்டு செப்டம்பர் மாதத்தில் புதிய UL2272 தரநிலை அறிமுகம் செய்யப்பட்டதற்கு முன்னர் அந்த மின்-ஸ்கூட்டர்கள் வாங்கப்பட்டன. சான்றிதழ் இல்லாத ஸ்கூட்டர்களின் விலை குறைவாகவும் அவற்றுக்கு மின் சக்தி அதிகமாகவும் இருப்பதால் வாடிக்கையாளர்கள் அவற்றை அதிகம் நாடுவதாகக் கடைக்காரர்கள் கூறுகின்றனர்.
ஜூலை மாதம் முதல் பாதுகாப்புச் சான்றிதழ்கள் இல்லாத ஸ்கூட்டர்களை விற்க கடைக்காரர்களுக்கு அனுமதி கிடையாது. ஆனால் ஏற்கெனவே இத்தகைய மின்-ஸ்கூட்டர்களை ஜூன் மாதத்திற்குள் வாங்கியுள்ள வாடிக்கையாளர்கள் அடுத்தாண்டு டிசம்பர் 31ஆம் தேதி வரை அவற்றைப் பயன்படுத்த முடியும்.
இதையும் படிக்க: தனிநபர் நடமாட்டச் சாதனங்கள்; எல்டிஏ மறுஆய்வு
அண்மையில் இரண்டு அடுக்குமாடி வீடுகளில் இந்த ஸ்கூட்டர்களை மின்னேற்றம் செய்யும்போது தீச்சம்பவங்கள் நடந்தன. இதில் 40 வயது ஆடவர் ஒருவர் உயிரிழந்தார். இதற்கடுத்து UL2272 தரநிலை பற்றிய கலந்துரையாடல்கள் மீண்டும் நடந்து வருகின்றன.
