மாணவர் முரசு
இ-பேப்பர்
டெல் அவிவ்: காஸாவிலிருந்து ஹமாஸ் வெளியேற்றப்பட வேண்டும் என்று இஸ்ரேலியப் பிரதமர் பெஞ்சமின் நெட்டன்யாகு கூறியிருக்கிறார்.
காஸாவில் போரை முடிவுக்குக் கொண்டுவருவதற்கான அமெரிக்க அதிபர் டோனல்ட் டிரம்ப்பின் திட்டத்தை ஐக்கிய நாட்டுப் பாதுகாப்பு மன்றம் ஏற்றுக்கொண்ட மறுநாள் செவ்வாய்க்கிழமை (நவம்பர் 18) அவர் அவ்வாறு தெரிவித்துள்ளார். அந்தத் திட்டத்தில் பாலஸ்தீன கிளர்ச்சிக் குழுவுக்குப் பொது மன்னிப்பு வழங்குவது பற்றிக் குறிப்பிடப்பட்டுள்ளது.
இவ்வாண்டு (2025) செப்டம்பர் மாதம் திரு நெட்டன்யாகு வெள்ளை மாளிகைக்குச் சென்றபோது வெளிப்படையாகத் திட்டத்திற்கு ஆதரவு தெரிவித்தார். அவரின் அண்மைய அறிவிப்பு, அமெரிக்காவுடன் கருத்து வேறுபாடுகள் இருப்பதைப் போன்ற தோற்றத்தை ஏற்படுத்தியுள்ளது.
ஹமாஸ் அமைப்பும் இத்திட்டத்தின் சில பகுதிகளுக்கு எதிர்ப்பு தெரிவித்திருக்கிறது.
இஸ்ரேலிய, ஹமாஸ் தரப்புகளின் வலுவான நிலைப்பாடு, திட்டத்தை முன்னெடுத்துச் செல்வதற்குத் தடையாய் இருப்பதாக அரசதந்திரிகள் கூறுகின்றனர். குறிப்பிட்ட காலக்கெடுவும் நடைமுறைப்படுத்துவதற்கான வழிகளும் திட்டத்தில் சரியாகத் தெரிவிக்கப்படவில்லை என்று கருதப்படுகிறது. இருப்பினும் அதற்கு வலுவான அனைத்துலக ஆதரவு இருக்கிறது.
திரு நெட்டன்யாகு, செவ்வாய்க்கிழமை எக்ஸ் தளத்தில் பல பதிவுகளை வெளியிட்டார். அவற்றில் ஒன்றில் டிரம்ப்பை அவர் பாராட்டினார். திட்டம், அமைதிக்கும் வளப்பத்திற்கும் இட்டுச்செல்லும் என்று இஸ்ரேலிய அரசாங்கம் நம்புவதாக இன்னொரு பதிவில் திரு நெட்டன்யாகு தெரிவித்திருந்தார்.
பாலஸ்தீன ஆணையம் காஸாவில் எந்த விதத்தில் ஈடுபட்டாலும் அதற்கு அவர் எதிர்ப்பு தெரிவிக்கிறார். ஹமாஸ் காஸாவைவிட்டுச் செல்லவேண்டும் என்றும் திரு நெட்டன்யாகு இப்போது சொல்கிறார்.
அதன் பொருள், காஸாவில் ஹமாஸ் இருக்கக்கூடாது என்பதை உறுதிசெய்வதே என்று இஸ்ரேலிய அரசாங்கத்தின் பேச்சாளர் கூறினார்.
தொடர்புடைய செய்திகள்
திரு டிரம்ப்பின் 20 அம்சத் திட்டத்தில், ஹமாஸ் பற்றி வேறுவிதமாகக் குறிப்பிடப்பட்டுள்ளது. ஆயுதங்களைக் கைவிடவும் அமைதியாகச் சேர்ந்துவாழவும் உறுதிகூறும் ஹமாஸ் குழுவின் உறுப்பினர்களுக்குப் பொது மன்னிப்பு வழங்கப்படும் என்று அது சொல்கிறது. அதே நேரம், அங்கிருந்து வெளியேற விரும்புவோர், பாதுகாப்பான முறையில் மூன்றாம் நாடுகளுக்கு அனுப்பிவைக்கப்படுவர் என்றும் அதில் குறிப்பிடப்பட்டுள்ளது.
ஆனால், ஹமாஸ் குழு கலைக்கப்பட வேண்டும் என்றோ காஸாவை விட்டு வெளியேற வேண்டும் என்றோ திட்டத்தில் எதுவும் கூறப்படவில்லை.