பிலிப்பீன்ஸ் செனட்டருக்குக் கைதாணை பிறப்பித்த அனைத்துலகக் குற்றவியல் நீதிமன்றம்

ஹேக்: அனைத்துலகக் குற்றவியல் நீதிமன்றம், பிலிப்பீன்ஸ் செனட்டர் ரோனால்ட் டெலா ரோசாவுக்குக் கைதாணை பிறப்பித்திருக்கிறது. அந்நாட்டின் முன்னாள் அதிபர் ரோட்ரிகோ டுட்டர்டேயின் சர்ச்சைக்குரிய போதைப்பொருள்களுக்கு எதிரான போரில் அவர் சம்பந்தப்பட்டிருக்கக்கூடும் என்பதே அதற்குக் காரணம்.

அரசாங்க அதிகாரிகளுக்கு எதிரான புகார்களை விசாரிக்கும் அதிகாரியான பிலிப்பீன்சின் ஜீசஸ் கிறிஸ்பின் ரெமுல்லா, உள்ளூர் வானொலி நிலையத்திடம் அதனைத் தெரிவித்தார். நாடு கடத்தப்படுவதற்குச் சாத்தியமுள்ள குற்றம் அது என்றார் அவர்.

அவ்வாறு செய்ய அனைத்துலகக் குற்றவியல் நீதிமன்றம் முறையாகக் கோரிக்கை விடுக்கவேண்டும் என்று அவர் சொன்னார். இதற்கு முன்னர் நீதியமைச்சராகச் சேவையாற்றியவர் திரு ரெமுல்லா.

காவல்துறையின் முன்னாள் தலைவரான திரு டெலா ரோசா, திரு டுட்டர்டே தொடங்கிய போதைப்பொருளுக்கு எதிரான இயக்கத்தை 2016ஆம் ஆண்டிலிருந்து 2018 வரை மேற்பார்வையிட்டவர். அப்போதுதான் செனட்டர் பதவிக்குப் போட்டியிட்டார் திரு டெலா ரோசா. மே மாதம் அவர் மீண்டும் தேர்ந்தெடுக்கப்பட்டார்.

திரு டுட்டர்டே மார்ச் மாதத்திலிருந்து நெதர்லாந்தில் தடுத்துவைக்கப்பட்டுள்ளார். அவர் முன்னெடுத்த போதைப்பொருளுக்கு எதிரான இயக்கத்தில் ஆயிரக்கணக்கானோர் மாண்டனர். மனிதகுலத்திற்கு எதிரான குற்றங்களின் தொடர்பில் திரு டுட்டர்டே விசாரணையை எதிர்நோக்குகிறார்.

திரு டெலா ரோசா, கைதாணை குறித்து உடனடியாகக் கருத்து எதனையும் சொல்லவில்லை.