மாணவர் முரசு
இ-பேப்பர்
காஸா நகரம்: இஸ்ரேல் காஸாவில் 45 பாலஸ்தீனர்களின் சடலங்களைத் திங்கட்கிழமை (நவம்பர் 3) ஒப்படைத்திருக்கிறது. அவற்றையும் சேர்த்து, இஸ்ரேல் 270 உடல்களைக் கொடுத்துள்ளதாக ஹமாஸ் நிர்வகிக்கும் காஸாவில் செயல்படும் சுகாதார அமைச்சு தெரிவித்தது.
அண்மையில் அமெரிக்க அதிபர் டோனல்ட் டிரம்ப் பரிந்துரைத்த சண்டை நிறுத்த உடன்பாட்டை இஸ்ரேலும் ஹமாசும் ஏற்றுக்கொண்டன. மாண்டுபோன இஸ்ரேலியர் ஒவ்வொருவரின் சடலத்திற்கும் பதிலாக 15 பாலஸ்தீனர்களின் உடல்களை இஸ்ரேல் கொடுக்கவேண்டும் என்று அதன்படி இணக்கம் காணப்பட்டது.
ஞாயிற்றுக்கிழமை, ஹமாஸ் அதன்வசம் இருந்த மூவரின் உடல்களை இஸ்ரேலியத் தரப்பிடம் கொடுத்தது. தடயவியல் அடையாளச் சோதனைகளைத் தொடர்ந்து அவை பாலஸ்தீனக் குழுவால் பிணைபிடிக்கப்பட்ட மூவரின் உடல்கள்தாம் என்பதை இஸ்ரேல் அடுத்த நாள் உறுதிப்படுத்தியது. 2023ஆம் ஆண்டு அக்டோபர் 7ஆம் தேதி ஹமாஸ் நடத்திய தாக்குதல்களைத் தொடர்ந்து பலரை அக்குழு பிணைபிடித்துச் சென்றது.
அவர்களில் அப்போது 21 வயது நிரம்பியிருந்த அமெரிக்க இஸ்ரேலியர் கேப்டன் ஓமெர் நியூட்ரா, 19 வயது கார்ப்பரல் ஓஸ் டேனியல், 40 வயது கர்னல் ஆசாஃப் ஹமாமி முதலியோரும் அடங்குவர். அவர்கள் மூவரையும் ஹமாஸ் கொன்றதாக நம்பப்படுகிறது.
அண்மைச் சண்டை நிறுத்தம் அக்டோபர் 10ஆம் தேதி நடப்புக்கு வந்தது. அப்போது காஸாவில் ஹமாசின்வசம் 48 பிணையாளிகள் இருந்தனர். அவர்களில் உயிருடன் இருந்த 20 பேரை ஹமாஸ் விடுவித்துவிட்டது. மாண்டுபோயிருந்த 28 பேரின் சடலங்களை அது திருப்பிக்கொடுக்கத் தொடங்கியது.
இஸ்ரேலியத் தரப்பினரிடம் இதுவரை 20 பேரின் உடல்கள் ஒப்படைக்கப்பட்டுள்ளன. அவர்களில் 18 பேர் இஸ்ரேலியர்கள், ஒருவர் தாய்லாந்தையும் எஞ்சியவர் நேப்பாளத்தையும் சேர்ந்தவர்கள்.
சடலங்களைத் திருப்பிக்கொடுப்பதை ஹமாஸ் தாமதப்படுத்துவதாக இஸ்ரேல் குற்றஞ்சாட்டுகிறது. பலரின் சடலங்கள் காஸாவின் இடிபாடுகளுக்குக் கீழே புதையுண்டிருப்பதால் அவற்றை மீட்பது மெதுவடைந்துள்ளதாகப் பாலஸ்தீனக் குழு கூறுகிறது.
