சிங்டெல்லின் புதிய ‘ஊழியரில்லாக் கடை’

சிங்டெல் நிறுவனம், ஊழியரில்லாத கடை ஒன்றைத் திறந்துள்ளது. ‘அன்பொக்ஸ்ட்’ என்ற பெயருள்ள அந்தக் கடையில் வாடிக்கையாளர்களின் தேவைகளைக் கவனிப்பதற்கு ஊழியர்கள் இருக்கமாட்டார்கள். மாறாக அங்கு மனித இயந்திரம் ஒன்று வாடிக்கையாளர்களுடன் உரையாடி அவர்களுக்குத் தேவைப்படுவதைப் பரிந்துரைக்கும். கைத்தொலைப்பேசி கட்டணங்களைச் செலுத்துதல், முன்கட்டண (prepaid) அட்டைகளில் பணம் நிரப்புதல், மாற்று சிம் அட்டைகளைப் பெறுதல் உள்ளிட்டவற்றையும் வாடிக்கையாளர்கள் இந்தக் கடையில் செய்யலாம்.

20 பிக்கரிங் ஸ்திரீட்டில் உள்ள இந்தக் கடை, நகர்த்தக் கூடியதாக உள்ளது. சில மாதங்களுக்கு ஓர் இடத்தில் இருந்த பின்னர் அந்தக் கடை மற்றோர் இடத்திற்கு நகரும்.

‘அன்பொக்ஸ்ட்’ கடை இன்றைய வாடிக்கையாளரின் தேவையை நிறைவு செய்வதாகவும் சில்லறைத் துறையின் எதிர்காலத்தை இப்போதே காட்டுவதாகவும் சிங்டெல்லின் சிங்கப்பூர் பயனீட்டாளர் பிரிவைச் சேர்ந்த யுவேன் குவான் மூன் தெரிவித்தார்.

வாடிக்கையாளர்களுடன் உரையாடி அவர்களுக்குச் சேவை செய்ய மனிதர்கள் தேவைப்படாத காலம் நெருங்கிக்கொண்டிருப்பதை இது போன்ற கடைகள் காட்டுவதாகக் கருதப்படுகிறது.